ପୁରୀ: ଶ୍ରୀଜଗନ୍ନାଥଙ୍କ ଅଣସର ନୀତିର ଆଜି ଏକାଦଶ ଦିନ ଏବଂ ଦଶମୀ ତିଥି। ଦଇତାପତି ସେବାୟତମାନଙ୍କ ଗୁପ୍ତ ଉପଚାର ପରେ ମହାପ୍ରଭୁଙ୍କ ଶରୀରରୁ ଜ୍ୱରର ତାତି ହ୍ରାସ ପାଇଥିବା ବିଶ୍ୱାସ କରାଯାଏ। ଏହି ପବିତ୍ର ଦିନରେ ଶୟନ ଅବସ୍ଥାରୁ ଉଠି ଶ୍ରୀବିଗ୍ରହମାନେ ଚକାବିଜେ ନୀତି ସମ୍ପନ୍ନ କରିବେ।
ଅନ୍ୟପଟେ, ଶ୍ରୀବିଗ୍ରହଙ୍କ ସମ୍ପୂର୍ଣ୍ଣ ଆରୋଗ୍ୟ କାମନାରେ ଆଜି ରାଜବୈଦ୍ୟ ପାରମ୍ପରିକ ଔଷଧ ଦଶମୂଳମୋଦକ ପ୍ରସ୍ତୁତ କରି ଶ୍ରୀମନ୍ଦିର ଗାରଦରେ ଜିମା ଦେବେ। ଆସନ୍ତାକାଲି ମହାପ୍ରଭୁ ଦଶମୂଳମୋଦକ ସେବନ କରିବା ପରେ ସମ୍ପୂର୍ଣ୍ଣ ସୁସ୍ଥ ହେବେ ବୋଲି ପରମ୍ପରାରେ ବିଶ୍ୱାସ ରହିଛି।
ଉଲ୍ଲେଖଯୋଗ୍ୟ ଯେ, ଅଣସର ପଞ୍ଚମୀରେ ଶ୍ରୀଜିଉଙ୍କୁ ଫୁଲୁରୀ ତେଲ ଲାଗି କରାଯାଇଥିଲା। ଏହାପରେ କ୍ରମାଗତ ଚାରି ଦିନ ଧରି ଓଷ ଲାଗି ନୀତି ସମ୍ପନ୍ନ ହୋଇଥିବାବେଳେ ଆଜି ଦଶମୀ ତିଥିରେ ଚକାବିଜେ ନୀତି ଅନୁଷ୍ଠିତ ହେଉଛି।
ସ୍ନାନପୂର୍ଣ୍ଣିମାରେ ୧୦୮ ଘଟ ଜଳରେ ମହାସ୍ନାନ ପରେ ଅସୁସ୍ଥ ହୋଇଥିବା ଶ୍ରୀଜଗନ୍ନାଥ, ଶ୍ରୀବଳଭଦ୍ର ଓ ଦେବୀ ସୁଭଦ୍ରା ଅଣସର ତାଟି ଭିତରେ ଦଇତାପତି ସେବାୟତମାନଙ୍କ ଗୁପ୍ତ ସେବା ଓ ଉପଚାର ପାଇ ଏବେ ଧୀରେ ଧୀରେ ସୁସ୍ଥ ହେଉଛନ୍ତି। ଆଜିର ଚକାବିଜେ ନୀତି ଏହି ସୁସ୍ଥତାର ଏକ ଗୁରୁତ୍ୱପୂର୍ଣ୍ଣ ପର୍ବ ବୋଲି ଗଣାଯାଏ।
ଆଜି ଶ୍ରୀମନ୍ଦିରରେ ମଧ୍ୟାହ୍ନ ଧୂପ ଓ ଭୋଗମଣ୍ଡପ ନୀତି ଶେଷ ହେବା ପରେ ଜୟବିଜୟ ଦ୍ୱାର ବନ୍ଦ କରାଯିବ। ପରେ ବେହେରଣ ଦ୍ୱାର ଖୋଲାଯାଇ ଅଣସରର ଦଶମୀ ନୀତି ଆରମ୍ଭ ହେବ। ଦଇତାପତି ସେବାୟତମାନେ ଶ୍ରୀବିଗ୍ରହଙ୍କୁ ଚକା ଉପରେ ବିଜେ କରାଇବେ। ଏହା ପରେ ଚକଟା ଓ ପଣା ଭୋଗ ଲାଗି କରାଯାଇ ଦଶମୀର ସମସ୍ତ ନୀତି ସମ୍ପନ୍ନ ହେବ।