ଭୁବନେଶ୍ୱର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଓଡ଼ିଶା ସରକାର ରାଜ୍ୟରେ ଶିଳ୍ପ ନିବେଶକୁ ପ୍ରୋତ୍ସାହନ ଦେବା ସହ ନିଯୁକ୍ତି ସୃଷ୍ଟି ଦିଗରେ ନିରନ୍ତର ପଦକ୍ଷେପ ନେଉଛନ୍ତି। ‘ସମୃଦ୍ଧ ଓଡ଼ିଶା ୨୦୩୬’ ଲକ୍ଷ୍ୟକୁ ଆଗେଇ ନେବା ଦିଗରେ ଆଉ ଏକ ପଦକ୍ଷେପ ସ୍ୱରୂପ ୧୪୯ତମ ରାଜ୍ୟସ୍ତରୀୟ ସିଙ୍ଗଲ ୱିଣ୍ଡୋ କ୍ଲିୟାରାନ୍ସ ଅଥରିଟି (SLSWCA) ବୈଠକ ଅନୁଷ୍ଠିତ ହୋଇଛି। ମୁଖ୍ୟ ଶାସନ ସଚିବ ଅନୁ ଗର୍ଗ, ଆଇଏଏସ୍ଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ମୋଟ ୨,୭୮୦.୧୦ କୋଟି ଟଙ୍କାର ୧୪ଟି ଶିଳ୍ପ ନିବେଶ ପ୍ରସ୍ତାବକୁ ଅନୁମୋଦନ ମିଳିଛି। ଏହି ପ୍ରକଳ୍ପଗୁଡ଼ିକ ମାଧ୍ୟମରେ ରାଜ୍ୟରେ ୧୪,୧୦୪ଟି ନିଯୁକ୍ତି ସୁଯୋଗ ସୃଷ୍ଟି ହେବାର ସମ୍ଭାବନା ରହିଛି। ଖାଦ୍ୟ ପ୍ରକ୍ରିୟାକରଣ, କୃଷି ଓ ଖାଦ୍ୟ ପ୍ରକ୍ରିୟାକରଣ, ବୟନ ଓ ପୋଷାକ, ରସାୟନ ଓ ରସାୟନିକ ଉତ୍ପାଦ, ମେଡିକାଲ ଡିଭାଇସ୍, ଫାର୍ମା, ଇଏସ୍ଡିଏମ୍, ଇସ୍ପାତ, ଲୁହା ଓ ଫେରୋ ଆଲଏଜ୍, ଇସ୍ପାତ ଡାଉନ୍ଷ୍ଟ୍ରିମ୍ ଉତ୍ପାଦନ ଏବଂ ଭିତ୍ତିଭୂମି ଭଳି ବିଭିନ୍ନ କ୍ଷେତ୍ରରେ ଏହି ନିବେଶ ହେବ।
ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ ହଲ୍ଦୀରାମ୍ ସ୍ନାକ୍ସ ଫୁଡ୍ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧା/କଟକରେ ସ୍ନାକ୍ସ ଓ ବେକ୍ଡ୍ ପ୍ରଡକ୍ଟ ଉତ୍ପାଦନ ୟୁନିଟ୍ ସ୍ଥାପନ କରିବ। ଏଥିରେ ୫୦୦ କୋଟି ଟଙ୍କାର ନିବେଶ ସହ ୮୦୦ଟି ନିଯୁକ୍ତି ସୁଯୋଗ ସୃଷ୍ଟି ହେବ। କୃଷି ଓ ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ ଟିୱାନା ନ୍ୟୁଟ୍ରିସନ୍ ଗ୍ଲୋବାଲ୍ ପ୍ରାଇଭେଟ୍ ଲିମିଟେଡ୍ ୧୪୦ କୋଟି ଟଙ୍କା ନିବେଶରେ ଗୋଖାଦ୍ୟ ଉତ୍ପାଦନ ୟୁନିଟ୍ ସ୍ଥାପନ କରିବ ଏବଂ ୨,୫୦୦ ନିଯୁକ୍ତି ସୁଯୋଗ ସୃଷ୍ଟି କରିବ। ସେହିପରି ପ୍ରିମିୟମ୍ ଚିକ୍ ଫିଡ୍ସ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧା, କଟକ ଓ ନୟାଗଡ଼ରେ ୧୦୫.୩୮ କୋଟି ଟଙ୍କା ନିବେଶରେ ଚିକ୍ ଫିଡ୍ ଉତ୍ପାଦନ ୟୁନିଟ୍ ସ୍ଥାପନ କରିବ। ଏହା ଦ୍ୱାରା ୧,୦୫୪ଟି ନିଯୁକ୍ତି ସୁଯୋଗ ମିଳିବ। ବୟନ ଓ ପୋଷାକ କ୍ଷେତ୍ରରେ ସାହାନା କ୍ଲଥିଂ କମ୍ପାନୀ ପ୍ରାଇଭେଟ୍ ଲିମିଟେଡ୍ ଢେଙ୍କାନାଳରେ ନିଟେଡ୍ ବେବି ଓ କିଡ୍ସ ୱେୟାର ପାଇଁ ରେଡିମେଡ୍ ଗାର୍ମେଣ୍ଟ ଉତ୍ପାଦନ ୟୁନିଟ୍ ସ୍ଥାପନ କରିବ। ୨୫୧.୪୫ କୋଟି ଟଙ୍କାର ଏହି ପ୍ରକଳ୍ପରୁ ୫,୧୦୪ଟି ନିଯୁକ୍ତି ସୃଷ୍ଟି ହେବ। ପ୍ରତିମା ଏଗ୍ରୋ ସ୍ପିନିଂ ମିଲ୍ ପ୍ରାଇଭେଟ୍ ଲିମିଟେଡ୍ ବଲାଙ୍ଗିରରେ ୧୨୫ କୋଟି ଟଙ୍କା ନିବେଶରେ କଟନ୍ ୟାର୍ନ, କମ୍ବର ନଏଲ୍, ଲିକରିନ୍ ୱେଷ୍ଟ୍, ଫ୍ଲାପ୍ ଷ୍ଟ୍ରିପ୍ ଓ ହାର୍ଡ ୱେଷ୍ଟ୍ ପାଇଁ ଟେକ୍ସଟାଇଲ୍ ପ୍ରୋସେସିଂ ୟୁନିଟ୍ ସ୍ଥାପନ କରିବ ଏବଂ ୪୦୦ଟି ନିଯୁକ୍ତି ସୃଷ୍ଟି ହେବ।
ରସାୟନ ଓ ରସାୟନିକ ଉତ୍ପାଦ କ୍ଷେତ୍ରରେ ତିନିଟି ପ୍ରସ୍ତାବକୁ ଅନୁମୋଦନ ମିଳିଛି। ପ୍ରାସୋଲ୍ କେମିକାଲ୍ସ ଲିମିଟେଡ୍ ଗଞ୍ଜାମରେ ୪୫୦ କୋଟି ଟଙ୍କା ନିବେଶରେ ଫସ୍ଫରସ୍ ଆଧାରିତ ଡେରିଭେଟିଭ୍ ଉତ୍ପାଦନ ପ୍ଲାଣ୍ଟ୍ ସ୍ଥାପନ କରିବ। ଏଥିରୁ ୪୫୮ଟି ନିଯୁକ୍ତି ସୁଯୋଗ ମିଳିବ। ନ୍ୟୁ ଜେନେରେସନ୍ ମ୍ୟାନୁଫାକ୍ଚରିଂ ପ୍ରାଇଭେଟ୍ ଲିମିଟେଡ୍ ସୁନ୍ଦରଗଡ଼ରେ ୮୦ କୋଟି ଟଙ୍କା ନିବେଶରେ କୋଲ୍ ଟାର୍ ଡିଷ୍ଟିଲେସନ୍ ଓ ବାଇପ୍ରଡକ୍ଟ ଉତ୍ପାଦନ ପ୍ଲାଣ୍ଟ୍ ସ୍ଥାପନ କରିବ। ଏହା ଦ୍ୱାରା ୩୦୧ଟି ଚାକିରି ସୃଷ୍ଟି ହେବ। ହାସଭାନ୍ ରସାୟନ ପ୍ରାଇଭେଟ୍ ଲିମିଟେଡ୍ ନୂଆପଡ଼ାରେ ୫୫ କୋଟି ଟଙ୍କା ନିବେଶରେ ବଲ୍କ ଡ୍ରଗ୍ ଇଣ୍ଟରମିଡିଏଟ୍ସ ପାଇଁ ଉତ୍ପାଦନ ୟୁନିଟ୍ ସ୍ଥାପନ କରିବ ଏବଂ ୭୦ଟି ନିଯୁକ୍ତି ସୁଯୋଗ ମିଳିବ। ମେଡିକାଲ ଡିଭାଇସ୍ ଓ ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ରକୁ ମଧ୍ୟ ଏହି ଅନୁମୋଦନରେ ସାମିଲ କରାଯାଇଛି। ସସ୍ତାସୁନ୍ଦର ହେଲ୍ଥବଡି ଲିମିଟେଡ୍ ଖୋର୍ଦ୍ଧାରେ ୫୬ କୋଟି ଟଙ୍କା ନିବେଶରେ ମେଡିକାଲ ଡିଭାଇସ୍ ଉତ୍ପାଦନ ୟୁନିଟ୍ ସ୍ଥାପନ କରିବ ଏବଂ ୧,୦୫୦ଟି ନିଯୁକ୍ତି ସୃଷ୍ଟି କରିବ। ଇଏସ୍ଡିଏମ୍ କ୍ଷେତ୍ରରେ ସିର୍ମା ଏସ୍ଜିଏସ୍ ଟେକ୍ନୋଲୋଜି ଲିମିଟେଡ୍ ଖୋର୍ଦ୍ଧାରେ ୩୦୦ କୋଟି ଟଙ୍କା ନିବେଶରେ ପ୍ରିଣ୍ଟେଡ୍ ସର୍କିଟ୍ ବୋର୍ଡ ଆସେମ୍ବଲି ଓ ବକ୍ସ ବିଲ୍ଡ ପାଇଁ ଉତ୍ପାଦନ ୟୁନିଟ୍ ସ୍ଥାପନ କରିବ। ଏହି ପ୍ରକଳ୍ପରୁ ୫୦୦ଟି ନିଯୁକ୍ତି ସୁଯୋଗ ସୃଷ୍ଟି ହେବ।
ଖଣିଜ ଓ ଧାତୁ ଆଧାରିତ ଶିଳ୍ପ କ୍ଷେତ୍ରରେ ମଧ୍ୟ ନିବେଶ ଜାରି ରହିଛି। ମହାତ୍ରିପୁରାସୁନ୍ଦରୀ ମିନେରାଲ୍ସ ଆଣ୍ଡ ମେଟାଲ୍ସ ପ୍ରାଇଭେଟ୍ ଲିମିଟେଡ୍ କେନ୍ଦୁଝରରେ ଫେରୋ ଆଲଏଜ୍, କ୍ରୋମ୍ ଡେରିଭେଟିଭ୍ସ, ମେଟାଲ୍ସ ରିକଭରି ଓ କ୍ରୋମ୍ ଓର୍ ବେନିଫିସିଏସନ୍ ପାଇଁ ଏକ ସମନ୍ୱିତ କମ୍ପ୍ଲେକ୍ସ ସ୍ଥାପନ କରିବ। ଏଥିରେ ୧୬୦ କୋଟି ଟଙ୍କା ନିବେଶ ହେବା ସହ ୧,୪୬୦ଟି ନିଯୁକ୍ତି ସୁଯୋଗ ସୃଷ୍ଟି ହେବ। ଇସ୍ପାତ ଡାଉନ୍ଷ୍ଟ୍ରିମ୍ କ୍ଷେତ୍ରରେ ଶ୍ରୀ ଜଗନ୍ନାଥ ଇସ୍ପାତ ପ୍ରାଇଭେଟ୍ ଲିମିଟେଡ୍ କଟକରେ କଲର୍ କୋଟେଡ୍ ସିଟ୍, କରଗେଟେଡ୍ ଜିଆଇ ସିଟ୍, ପ୍ଲେନ୍ ଜିଆଇ ସିଟ୍ ଓ ଜିଆଇ ଷ୍ଟ୍ରକ୍ଚରାଲ୍ କମ୍ପୋନେଣ୍ଟ୍ ଉତ୍ପାଦନ ୟୁନିଟ୍ ସ୍ଥାପନ କରିବ। ୯୦.୯୪ କୋଟି ଟଙ୍କାର ଏହି ପ୍ରକଳ୍ପରୁ ୨୩୦ଟି ନିଯୁକ୍ତି ସୁଯୋଗ ମିଳିବ। ଏନ୍କେଏସ୍ ଆର୍ଥବିଲ୍ଡ ଲିମିଟେଡ୍ ଢେଙ୍କାନାଳରେ ୬୦.୯୮ କୋଟି ଟଙ୍କା ନିବେଶରେ ଷ୍ଟ୍ରକ୍ଚରାଲ୍ ଷ୍ଟିଲ୍ ଉତ୍ପାଦନ ୟୁନିଟ୍ ସ୍ଥାପନ କରିବ ଏବଂ ୧୪୮ଟି ନିଯୁକ୍ତି ସୃଷ୍ଟି ହେବ।
ଭିତ୍ତିଭୂମି କ୍ଷେତ୍ରରେ ଶିଳ୍ପ ଯୋଗାଯୋଗକୁ ଆହୁରି ସୁଦୃଢ଼ କରିବା ପାଇଁ ମହାନଦୀ କୋଲ୍ଫିଲ୍ଡସ୍ ଲିମିଟେଡ୍ (MCL) ଅନୁଗୁଳ ଜିଲ୍ଲାରେ ସୁଭଦ୍ରା କୋଲ୍ ମାଇନ୍ସ ପାଇଁ ଏକ ପ୍ରାଇଭେଟ୍ ରେଲୱେ ସାଇଡିଂ ବିକଶିତ କରିବ। ଏହା ବର୍ତ୍ତମାନର ଅନୁଗୁଳ-ବଳରାମ ସାଇଡିଂ ସହ ସଂଯୋଗ ହେବା ସହ ଇଷ୍ଟ କୋଷ୍ଟ ରେଲୱେର ଖୋର୍ଦ୍ଧା ରୋଡ୍ ଡିଭିଜନ୍ ଅଧୀନରେ ପ୍ରସ୍ତାବିତ ଗୋପାଳପ୍ରସାଦ ଷ୍ଟେସନ୍ ସହ ଯୋଡ଼ି ହେବ। ଏହି ପ୍ରକଳ୍ପରେ ୪୦୫.୩୫ କୋଟି ଟଙ୍କା ନିବେଶ ହେବା ସହ ୨୯ଟି ନିଯୁକ୍ତି ସୁଯୋଗ ସୃଷ୍ଟି ହେବ। ମୋଟ ୨,୭୮୦.୧୦ କୋଟି ଟଙ୍କାର ସଂଯୁକ୍ତ ନିବେଶ ଏବଂ ୧୪,୧୦୪ଟି ସମ୍ଭାବ୍ୟ ନିଯୁକ୍ତି ସୃଷ୍ଟି ସହ ଏହି ଏସ୍ଏଲ୍ଏସ୍ଡବ୍ଲ୍ୟୁସିଏ ଅନୁମୋଦନ ରାଜ୍ୟରେ ଉତ୍ପାଦନ, ଖାଦ୍ୟ ପ୍ରକ୍ରିୟାକରଣ, ବୟନ, ରସାୟନ, ଇଲେକ୍ଟ୍ରୋନିକ୍ସ, ମେଡିକାଲ ଡିଭାଇସ୍, ଫାର୍ମା, ଖଣିଜ ଆଧାରିତ ଶିଳ୍ପ ଓ ଭିତ୍ତିଭୂମି କ୍ଷେତ୍ରରେ ନିରନ୍ତର ନିବେଶକୁ ପ୍ରତିଫଳିତ କରୁଛି। ସିଙ୍ଗଲ ୱିଣ୍ଡୋ କ୍ଲିୟାରାନ୍ସ ବ୍ୟବସ୍ଥା ମାଧ୍ୟମରେ ସମନ୍ୱିତ ଓ ସମୟବଦ୍ଧ ଅନୁମୋଦନ ପ୍ରଦାନ କରାଯାଇ ନିବେଶକମାନଙ୍କୁ ପ୍ରକଳ୍ପଗୁଡ଼ିକୁ ଶୀଘ୍ର ରୂପାୟନ ଦିଗରେ ଆଗେଇ ନେବାରେ ସହାୟତା କରାଯାଉଛି। ‘ସମୃଦ୍ଧ ଓଡ଼ିଶା ୨୦୩୬’ର ଲକ୍ଷ୍ୟ ଅନୁରୂପ ନିବେଶ ଆକର୍ଷଣ, ଶିଳ୍ପ ବିକାଶ, ମୂଲ୍ୟ ସଂଯୋଜନ ଓ ରାଜ୍ୟର ବିଭିନ୍ନ ଅଞ୍ଚଳରେ ନିଯୁକ୍ତି ସୃଷ୍ଟି ଉପରେ ରାଜ୍ୟ ସରକାରଙ୍କ ଗୁରୁତ୍ୱକୁ ଏହି ଅନୁମୋଦନଗୁଡ଼ିକ ପୁନର୍ବାର ସ୍ପଷ୍ଟ କରିଛି।