ବ୍ରହ୍ମପୁର/ଭୁବନେଶ୍ୱର: ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାରେ ଗିରଫ ହୋଇ ଦୀର୍ଘ ୧୦ ମାସ ଜେଲରେ ରହିବା ପରେ ସର୍ତ୍ତମୂଳକ ଜାମିନରେ ମୁକୁଳିଛନ୍ତି ବ୍ରହ୍ମପୁରର ପୂର୍ବତନ ବିଧାୟକ ତଥା ଗଞ୍ଜାମ ଜିଲ୍ଲା ବିଜେଡି ସଭାପତି ବିକ୍ରମ କୁମାର ପଣ୍ଡା। ଓଡ଼ିଶା ଉଚ୍ଚ ନ୍ୟାୟାଳୟରୁ ଜାମିନ ମିଳିବା ପରେ ଆଜି ସେ ବ୍ରହ୍ମପୁର ମଣ୍ଡଳ କାରାଗାରରୁ ବାହାରକୁ ଆସିଛନ୍ତି। ଜେଲରୁ ବାହାରିବା ପରେ ସେ “ଧର୍ମର ବିଜୟ ହୋଇଛି” ବୋଲି ପ୍ରତିକ୍ରିୟା ଦେଇଛନ୍ତି।
ସୋମବାର ହାଇକୋର୍ଟଙ୍କ ପକ୍ଷରୁ ବିକ୍ରମଙ୍କୁ ସର୍ତ୍ତମୂଳକ ଜାମିନ ମଞ୍ଜୁର କରାଯାଇଥିଲା। ଆଜି ଜାମିନ ସମ୍ପର୍କିତ ଆବଶ୍ୟକୀୟ କାଗଜପତ୍ର ବ୍ରହ୍ମପୁରର ତୃତୀୟ ଏଡିଜେ କୋର୍ଟରେ ଦାଖଲ କରାଯିବା ପରେ ତାଙ୍କର ମୁକ୍ତି ପ୍ରକ୍ରିୟା ଶେଷ ହୋଇଥିଲା। କୋର୍ଟଙ୍କ ସର୍ତ୍ତ ଅନୁସାରେ ୧୦ ଦିନରୁ ଅଧିକ ସମୟ ଜିଲ୍ଲା ବାହାରକୁ ଗଲେ କୋର୍ଟଙ୍କ ଅନୁମତି ନେବାକୁ ପଡ଼ିବ, ବିନା ଅନୁମତିରେ ସେ ରାଜ୍ୟ କିମ୍ବା ଦେଶ ବାହାରକୁ ଯାଇପାରିବେ ନାହିଁ, କୌଣସି ସାକ୍ଷୀଙ୍କୁ ଧମକ କିମ୍ବା ଚମକ ଦେଇପାରିବେ ନାହିଁ, କୋର୍ଟଙ୍କ ନିର୍ଦ୍ଦେଶ ଅନୁସାରେ ଆବଶ୍ୟକ ସମୟରେ ଉପସ୍ଥିତ ରହିବେ ଏବଂ ଦୁଇ ଜଣ ଜାମିନଦାରଙ୍କ ବଦଳରେ ଏହି ଜାମିନ ପ୍ରଦାନ କରାଯାଇଛି।
ବିକ୍ରମ ପଣ୍ଡା ଜେଲରୁ ବାହାରିବା ସମୟରେ କାରାଗାର ଫାଟକ ସମ୍ମୁଖରେ ବିଜେଡିର ବହୁ ବରିଷ୍ଠ ନେତା, ଶୁଭେଚ୍ଛୁ, କର୍ମୀ ଓ ପରିବାର ଲୋକେ ଉପସ୍ଥିତ ଥିଲେ। ସେଠାରେ ଦଳୀୟ ନେତା ଦେବୀ ପ୍ରସାଦ ମିଶ୍ର, ପ୍ରତାପ ଜେନା, ସଞ୍ଜୟ ଦାସବର୍ମା ଓ ଚିନ୍ମୟ ସାହୁ ପ୍ରମୁଖ ଉପସ୍ଥିତ ରହି ତାଙ୍କୁ ସ୍ୱାଗତ କରିଥିଲେ। ଜେଲରୁ ବାହାରିବା ପରେ ଶତାଧିକ ସମର୍ଥକ ଓ କର୍ମୀ ତାଙ୍କୁ ଏକ ବିଶାଳ ଶୋଭାଯାତ୍ରାରେ ତାଙ୍କ ବାସଭବନକୁ ନେଇଥିଲେ।