ନୂଆଦିଲ୍ଲୀ: ବାରାଣସୀରୁ ଦିଲ୍ଲୀ ଯାଉଥିବା ଏୟାର ଇଣ୍ଡିଆର ବିମାନ ୧୨୫୩ ଲକ୍ଷ୍ନୌର ଚୌଧୁରୀ ଚରଣ ସିଂହ ଅନ୍ତର୍ଜାତୀୟ ବିମାନବନ୍ଦରରେ ଜରୁରୀକାଳୀନ ଅବତରଣ କରିଛି। ଜରୁରୀକାଳୀନ ଅବତରଣ ଯୋଗୁଁ ବିମାନରେ ଥିବା ଯାତ୍ରୀମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ବିମାନର ପଛ ପାର୍ଶ୍ୱରେ ଥିବା କାର୍ଗୋ କମ୍ପାର୍ଟମେଣ୍ଟରେ ଧୂଆଁ ଦେଖାଯିବା ପରେ ଅବତରଣ କରାଯାଇଥିଲା। ପାଇଲଟ୍ ସତର୍କତାମୂଳକ ପଦକ୍ଷେପ ନେଇ ଲକ୍ଷ୍ନୌ ବିମାନବନ୍ଦରରେ ବିମାନକୁ ସୁରକ୍ଷିତ ଭାବରେ ଅବତରଣ କରିଥିଲେ। ବିମାନରେ ଥିବା ସମସ୍ତ ୧୫୫ ଜଣ ଯାତ୍ରୀ ଏବଂ କର୍ମଚାରୀ ସୁରକ୍ଷିତ ଅଛନ୍ତି।
ସୂଚନା ଅନୁଯାୟୀ, ଏୟାର ଇଣ୍ଡିଆର ବିମାନ ଆଇଏକ୍ସ-୧୨୫୩ ବାରାଣସୀରୁ ଦିଲ୍ଲୀ ଅଭିମୁଖେ ଯାତ୍ରା କରିଥିଲା। ଉଡ଼ାଣ ସମୟରେ ପଛ ପାର୍ଶ୍ୱ କାର୍ଗୋ କମ୍ପାର୍ଟମେଣ୍ଟରେ ଧୂଆଁ ଚିହ୍ନଟ ହୋଇଥିଲା। ଏହା ପରେ ସୁରକ୍ଷା ଦୃଷ୍ଟିରୁ ବିମାନକୁ ଲକ୍ଷ୍ନୌ ବିମାନବନ୍ଦରକୁ ସ୍ଥାନାନ୍ତରିତ କରାଯାଇଥିଲା। ସକାଳ ପ୍ରାୟ ୮:୫୨ ରେ ବିମାନଟି ଲକ୍ଷ୍ନୌ ବିମାନବନ୍ଦରରେ ସୁରକ୍ଷିତ ଭାବରେ ଅବତରଣ କରିଥିଲା।