ଦିନସାରା ଝାଳ, ଧୂଳି ଓ ପ୍ରଦୂଷଣର ସାମ୍ନା କରିବା ପରେ ମୁହଁ ମଳିନ ଓ ନିର୍ଜୀବ ଦେଖାଯିବା ସ୍ୱାଭାବିକ। ଏହା ସହ ପାଗର ପରିବର୍ତ୍ତନ ଯୋଗୁଁ ତ୍ୱଚାରେ ଶୁଷ୍କତା, ରୁକ୍ଷତା କିମ୍ବା ଚିପ୍ଚିପା ଅନୁଭବ ମଧ୍ୟ ହୋଇପାରେ। ଏଭଳି ସମୟରେ ତ୍ୱଚାକୁ ସତେଜ ଓ ହାଇଡ୍ରେଟେଡ୍ ରଖିବା ପାଇଁ ଘରେ ତିଆରି କାକୁଡ଼ି ଫେସ୍ ମିଷ୍ଟ ଏକ ସରଳ ବିକଳ୍ପ ହୋଇପାରେ।
କାକୁଡ଼ିରେ ପାଣିର ପରିମାଣ ଅଧିକ ଥିବାରୁ ଏହା ତ୍ୱଚାକୁ ସତେଜ ଅନୁଭବ ଦେଇପାରେ। ଏଥିରେ ଗୋଲାପ ଜଳ ଓ ଆଲୋଭେରା ଜେଲ୍ ମିଶାଇ ଘରେ ସହଜରେ ଏହି ମିଷ୍ଟ ପ୍ରସ୍ତୁତ କରିହେବ।
ଆବଶ୍ୟକ ସାମଗ୍ରୀ
୧ଟି କାକୁଡ଼ି
ଅଧ କପ୍ ଗୋଲାପ ଜଳ
୧ ଚାମଚ ଆଲୋଭେରା ଜେଲ୍
୩–୪ ବୁନ୍ଦା ଟି’ ଟ୍ରି ଅଏଲ୍ — ବ୍ରଣ ପ୍ରବଣ ତ୍ୱଚା ପାଇଁ, ଇଚ୍ଛାଧୀନ
୧ଟି ସଫା ସ୍ପ୍ରେ ବୋତଲ
କିପରି ତିଆରି କରିବେ?
ପ୍ରଥମେ କାକୁଡ଼ିକୁ ଭଲ ଭାବେ ଧୋଇ ଛୋଟ ଛୋଟ ଖଣ୍ଡ କରନ୍ତୁ। ଏହାକୁ ମିକ୍ସରରେ ପକାଇ ପେଷ୍ଟ ପ୍ରସ୍ତୁତ କରନ୍ତୁ। ଏବେ ସଫା କପଡ଼ା କିମ୍ବା ସୂକ୍ଷ୍ମ ଚାଲୁଣୀରେ ପେଷ୍ଟକୁ ଛାଣି କାକୁଡ଼ି ରସ ବାହାର କରନ୍ତୁ।
ଏହି ରସରେ ଅଧ କପ୍ ଗୋଲାପ ଜଳ ଓ ଗୋଟିଏ ଚାମଚ ଆଲୋଭେରା ଜେଲ୍ ମିଶାନ୍ତୁ। ଆବଶ୍ୟକ ହେଲେ ୩–୪ ବୁନ୍ଦା ଟି’ ଟ୍ରି ଅଏଲ୍ ମିଶାଇପାରିବେ। ସମସ୍ତ ସାମଗ୍ରୀକୁ ଭଲ ଭାବେ ମିଶାଇ ସ୍ପ୍ରେ ବୋତଲରେ ଭରନ୍ତୁ। ଏବେ ପ୍ରସ୍ତୁତ ଆପଣଙ୍କ ଘରୋଇ କାକୁଡ଼ି ଫେସ୍ ମିଷ୍ଟ।
କିପରି ବ୍ୟବହାର କରିବେ?
ମୁହଁ ସଫା କରିବା ପରେ କିମ୍ବା ଦିନରେ ତ୍ୱଚା ଶୁଷ୍କ ଓ ରୁକ୍ଷ ଲାଗିଲେ ଏହି ମିଷ୍ଟକୁ ମୁହଁରେ ହାଲୁକା ଭାବେ ସ୍ପ୍ରେ କରନ୍ତୁ। ସ୍ପ୍ରେ କରିବା ପୂର୍ବରୁ ବୋତଲକୁ ଭଲ ଭାବେ ହଲାଇ ନିଅନ୍ତୁ। ଆଖି ଓ ଆଖି ଚାରିପାଖର ଅଞ୍ଚଳକୁ ଏଡ଼ାଇ ଚାଲନ୍ତୁ।
କାକୁଡ଼ି ମିଷ୍ଟ ତ୍ୱଚାକୁ ସତେଜ ଅନୁଭବ ଦେବା ସହ ଆର୍ଦ୍ରତା ଧରିରଖିବାରେ ସହାୟକ ହୋଇପାରେ। ତେବେ ଏହାକୁ ମଏଶ୍ଚରାଇଜର୍ର ବିକଳ୍ପ ଭାବେ ନେବା ଉଚିତ୍ ନୁହେଁ।
ଘରେ ତିଆରି ହେଉଥିବାରୁ ଏହି ମିଷ୍ଟକୁ ଅଧିକ ପରିମାଣରେ ପ୍ରସ୍ତୁତ ନକରି ଅଳ୍ପ ପରିମାଣରେ ତିଆରି କରି ଥଣ୍ଡା ସ୍ଥାନରେ ରଖିବା ଉଚିତ୍। ଦୁର୍ଗନ୍ଧ, ରଙ୍ଗ କିମ୍ବା ଗଠନରେ ପରିବର୍ତ୍ତନ ଦେଖାଦେଲେ ଏହାକୁ ବ୍ୟବହାର କରନ୍ତୁ ନାହିଁ।