କଟକ: କଟକରୁ ଜବତ ହୋଇଥିବା ପନିରକୁ ନେଇ ଆସିଛି ବଡ଼ ଖବର। ପନିର ନାଁରେ ବଜାରରେ ବିଷ ବିକ୍ରି ହେଉଛି। ଯାହା ଗତ ଅଗଷ୍ଟ ୧୯ ତାରିଖରେ କଟକ ଲିଙ୍କ ରୋଡ୍ରୁ କେଏମ୍ସି (କେଏମସି) ଖାଦ୍ୟ ସୁରକ୍ଷା ଟିମ୍ ଦ୍ୱାରା ଜବତ ହୋଇଥିବା ପ୍ରାୟ ୭୩ କ୍ୱିଣ୍ଟାଲ ପନିର ସମ୍ପୂର୍ଣ୍ଣ ଅପମିଶ୍ରିତ ବୋଲି ପ୍ରମାଣିତ ହୋଇଛି। ସଂଗୃହୀତ ପନିର ନମୁନାର ପରୀକ୍ଷଣ ହରିୟାଣାରେ ହୋଇଥିଲା, ଯାହାର ରିପୋର୍ଟ ଆଜି ରାଜ୍ୟ ଖାଦ୍ୟ ସୁରକ୍ଷା କମିଶନରଙ୍କ ନିକଟରେ ପହଞ୍ଚିଛି ବୋଲି କହିଛନ୍ତି କଟକ ମହାନଗର ନିଗମର ସ୍ବାସ୍ଥ୍ୟ ଅଧିକାରୀ।
ରିପୋର୍ଟ ଅନୁସାରେ, ଏହି ପନିରରେ ମଇଦା ସହ ମାରାତ୍ମକ ଡିଟରଜେଣ୍ଟ ମିଶାଯାଉଥିଲା, ଯାହା ଶରୀର ପାଇଁ ଅତ୍ୟନ୍ତ କ୍ଷତିକାରକ। ଏହି ଅପମିଶ୍ରିତ ପନିର ନିଆଳିରୁ କଟକ ସହ ରାଜ୍ୟର ବିଭିନ୍ନ ଅଞ୍ଚଳକୁ ସପ୍ଲାଏ ହେଉଥିବା ଜଣାପଡ଼ିଛି। ରାଜ୍ୟ ଖାଦ୍ୟ ସୁରକ୍ଷା କମିଶନରଙ୍କ ନିକଟରେ ରିପୋର୍ଟ ପହଞ୍ଚିବା ପରେ ଏବେ ଅପମିଶ୍ରଣକାରୀଙ୍କ ବିରୋଧରେ କ’ଣ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି, ତାହା ଦେଖିବାକୁ ବାକି ରହିଲା।