ନୂଆଦିଲ୍ଲୀ: ସିବିଏସ୍ଇ ପାଠ୍ୟକ୍ରମରେ ବାଧ୍ୟତାମୂଳକ ତ୍ରି-ଭାଷା ନୀତି ପ୍ରବର୍ତ୍ତନକୁ ନେଇ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ଅନ୍ତରୀଣ ନିର୍ଦ୍ଦେଶ ଦେଇଛନ୍ତି। ବର୍ତ୍ତମାନ ଷଷ୍ଠ ଶ୍ରେଣୀରେ ଅଧ୍ୟୟନରତ ଛାତ୍ରଛାତ୍ରୀମାନଙ୍କୁ ଏହି ବାଧ୍ୟତାମୂଳକ ନିୟମରୁ ଏକକାଳୀନ ଛାଡ଼ ପ୍ରଦାନ କରିବାକୁ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଛନ୍ତି। ଭାରତର ପ୍ରଧାନ ବିଚାରପତି (ସିଜେଆଇ) ଜଷ୍ଟିସ୍ ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ସ୍ପଷ୍ଟ କରିଛନ୍ତି ଯେ, ସପ୍ତମ, ଅଷ୍ଟମ ଏବଂ ନବମ ଶ୍ରେଣୀର ପିଲାମାନଙ୍କୁ ଯେଉଁ ପରିବର୍ତ୍ତନକାଳୀନ ସୁବିଧା ଓ କୋହଳତା ଦିଆଯାଇଥିଲା, ତାହା ଷଷ୍ଠ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ମଧ୍ୟ ଲାଗୁ ହେବ। ଶିକ୍ଷାବର୍ଷ ମଝିରେ ଏଭଳି ବ୍ୟାପକ ବଦଳ ଆଣିଲେ କୋମଳମତି ଶିଶୁଙ୍କ ଉପରେ ଅନାବଶ୍ୟକ ମାନସିକ ଓ ପରିଚାଳନାଗତ ଚାପ ସୃଷ୍ଟି ହୁଏ ବୋଲି ଅଦାଲତ ଦର୍ଶାଇଛନ୍ତି।
ଶୁଣାଣି ସମୟରେ ଅତିରିକ୍ତ ସଲିସିଟର ଜେନେରାଲ୍ ଐଶ୍ୱର୍ଯ୍ୟା ଭଟିଙ୍କ ସହ ସିବିଏସ୍ଇ ପକ୍ଷରୁ ଉପସ୍ଥିତ ଥିବା ସଲିସିଟର ଜେନେରାଲ୍ ତୁଷାର ମେହେଟ୍ଟା ଜଣାଇଥିଲେ ଯେ, ପ୍ରାୟ ୨୮,୦୦୦ ଅନୁବନ୍ଧିତ ବିଦ୍ୟାଳୟ ମଧ୍ୟରୁ ପ୍ରାୟ ୯୯ ପ୍ରତିଶତ ବିଦ୍ୟାଳୟ ଆବଶ୍ୟକ ପୁସ୍ତକ ଓ ଶିକ୍ଷକମାନଙ୍କ ସହିତ ଏହି ନୂତନ ବ୍ୟବସ୍ଥାକୁ ଆପଣେଇ ସାରିଛନ୍ତି। ବୋର୍ଡ ପ୍ରାରମ୍ଭରେ ଯୁକ୍ତି ବାଢ଼ିଥିଲା ଯେ ବର୍ତ୍ତମାନର ଏହି ବ୍ୟାଚ୍କୁ ଛାଡ଼ ଦେବା ଫଳରେ ଜାତୀୟ ଶିକ୍ଷା ନୀତି (ଏନ୍ଇପି) ୨୦୨୦ ଏବଂ ଜାତୀୟ ପାଠ୍ୟକ୍ରମ ଢାଞ୍ଚା (ଏନ୍ସିଏଫ୍-ଏସ୍ଇ) ୨୦୨୩ ଅଧୀନରେ ଶିକ୍ଷଣ ଧାରାରେ ସାମାନ୍ୟ ବ୍ୟତିକ୍ରମ ସୃଷ୍ଟି ହୋଇପାରେ।
ଏହାସତ୍ତ୍ୱେ ସୁପ୍ରିମକୋର୍ଟ ଗୁରୁତ୍ୱାରୋପ କରି କହିଛନ୍ତି ଯେ ହଠାତ୍ ପରିବର୍ତ୍ତନ ଲଦି ପିଲାମାନଙ୍କୁ ଅସୁବିଧାରେ ପକାଇବା ଅପେକ୍ଷା ଏକ ସହଜ ଓ ସୁଗମ ପରିବର୍ତ୍ତନ ଆଣିବା ହିଁ ମୁଖ୍ୟ ଲକ୍ଷ୍ୟ ହେବା ଉଚିତ୍। ଏହା ସିବିଏସଇ ଯୋଜନା ଉପରେ ସ୍ଥାୟୀ ରୋକ୍ ନୁହେଁ ବୋଲି ଅଦାଲତ ସ୍ପଷ୍ଟ କରିବା ସହ ଷଷ୍ଠ ଶ୍ରେଣୀ ପାଇଁ ଏହାର ସମ୍ପୂର୍ଣ୍ଣ ପ୍ରବର୍ତ୍ତନ ଆଗାମୀ ଶିକ୍ଷାବର୍ଷଗୁଡ଼ିକରେ ପର୍ଯ୍ୟାୟକ୍ରମେ ଲାଗୁ କରାଯାଇପାରିବ ବୋଲି ପରାମର୍ଶ ଦେଇଛନ୍ତି। ଏହି ନୀତିର ବିଭିନ୍ନ ଦିଗ ତଥା ଇଂରାଜୀ ଭାଷାର ବର୍ଗୀକରଣକୁ ଚ୍ୟାଲେଞ୍ଜ କରି ଦାୟର ହୋଇଥିବା ମୁଖ୍ୟ ଆବେଦନଗୁଡ଼ିକର ବିସ୍ତୃତ ଶୁଣାଣି ୬ ସପ୍ତାହ ପରେ ହେବ ବୋଲି ଖଣ୍ଡପୀଠ ତାରିଖ ଧାର୍ଯ୍ୟ କରିଛନ୍ତି।