ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୯ ଅକ୍ଟୋବର ୨୦୨୬ ଅପରାହ୍ନ ପ୍ରାୟ ୪ଟା ୩୦ ମିନିଟ୍ରେ ନୂଆଦିଲ୍ଲୀସ୍ଥିତ ସୁଷମା ସ୍ୱରାଜ ଭବନଠାରେ ଆୟୋଜିତ ମହିଳା ଓ ଶିଶୁ ବିକାଶ ବିଭାଗୀୟ ସମ୍ମିଳନୀର ସମାପନୀ ଅଧିବେଶନରେ ଯୋଗଦେବେ। ଏହି ଅବସରରେ ସେ ଉପସ୍ଥିତ ଜନସମାବେଶକୁ ମଧ୍ୟ ସମ୍ବୋଧିତ କରିବେ।
୮ ଓ ୯ ଅକ୍ଟୋବର ୨୦୨୬ ରେ ଅନୁଷ୍ଠିତ ହେଉଥିବା ଏହି ଦୁଇ ଦିନିଆ ବିଭାଗୀୟ ସମ୍ମିଳନୀରେ ସମସ୍ତ ରାଜ୍ୟର ମହିଳା ଓ ଶିଶୁ ବିକାଶ କ୍ଷେତ୍ର ସହ ଜଡ଼ିତ ରାଜନୈତିକ ନେତୃତ୍ଵ ଏବଂ ଅଧିକାରୀମାନେ ଅଂଶଗ୍ରହଣ କରିବେ। ସହଯୋଗୀ ସଂଘୀୟ ବ୍ୟବସ୍ଥାକୁ ସୁଦୃଢ଼ କରିବା, ଜାତୀୟ ପ୍ରାଥମିକତା ପ୍ରତି ସାମୂହିକ ଦାୟିତ୍ୱବୋଧ ବୃଦ୍ଧି କରିବା ଏବଂ କେନ୍ଦ୍ର-ରାଜ୍ୟ ସହଯୋଗ ମାଧ୍ୟମରେ ଫଳାଫଳକୁ ତ୍ୱରାନ୍ୱିତ କରିବା ହେଉଛି ଏହାର ଲକ୍ଷ୍ୟ। ଏହି ଉଦ୍ଦେଶ୍ୟ ନେଇ ପ୍ରଧାନମନ୍ତ୍ରୀଙ୍କ ଦ୍ୱାରା ଆରମ୍ଭ କରାଯାଇଥିବା ବିଭାଗୀୟ ସମ୍ମିଳନୀଗୁଡ଼ିକର କ୍ରମରେ ଏହା ହେଉଛି ଦ୍ୱିତୀୟ ସମ୍ମିଳନୀ।
ଏହି ସମ୍ମିଳନୀ ମୁଖ୍ୟତଃ ଚାରୋଟି ବିଷୟ ଉପରେ ଧ୍ୟାନ କେନ୍ଦ୍ରିତ କରିବ:
୧. ଉନ୍ନତ ପୁଷ୍ଟିସାଧନ ଏବଂ ପ୍ରାରମ୍ଭିକ ଶୈଶବ ଶିକ୍ଷା ପାଇଁ ଅଙ୍ଗନୱାଡ଼ି କେନ୍ଦ୍ରଗୁଡ଼ିକର ପୁନଃପରିକଳ୍ପନା।
୨. ଅସୁରକ୍ଷିତ ଶିଶୁମାନଙ୍କ ପାଇଁ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା।
୩. ସାଂସ୍ଥାନିକ ଓ ଆଇନଗତ ବ୍ୟବସ୍ଥାର ପ୍ରଭାବଶାଳୀ କାର୍ଯ୍ୟନ୍ଵୟନ ମାଧ୍ୟମରେ ମହିଳାଙ୍କ ସୁରକ୍ଷା ସୁନିଶ୍ଚିତ କରିବା।
୪. ପ୍ରମୁଖ ଯୋଜନାଗୁଡ଼ିକର କାର୍ଯ୍ୟକାରିତା ଓ ଫଳାଫଳରେ ଉନ୍ନତି ଆଣି ମହିଳାମାନଙ୍କୁ ସଶକ୍ତ କରିବା।
ବିଭାଗୀୟ ସମ୍ମିଳନୀ ମଡେଲ୍ କେନ୍ଦ୍ର ଏବଂ ରାଜ୍ୟ ସରକାରଙ୍କ ଅଂଶୀଦାରମାନଙ୍କୁ କ୍ଷେତ୍ର-ନିର୍ଦ୍ଦିଷ୍ଟ ପ୍ରାଥମିକତା ଉପରେ ଆଲୋଚନା କରିବା ଉପରେ ପର୍ଯ୍ୟବସିତ। ଏହା ସହିତ ସର୍ବୋତ୍ତମ ଅଭ୍ୟାସ ବାଣ୍ଟିବା, କାର୍ଯ୍ୟାନ୍ୱୟନ ଆହ୍ଵାନର ମୁକାବିଲା କରିବା ଏବଂ ଉନ୍ନତ ଶାସନ ଏବଂ ସେବା ପ୍ରଦାନ ଲାଗି ସମୟସୀମାବଦ୍ଧ କାର୍ଯ୍ୟ ଉପରେ ସହମତ ହେବା ପାଇଁ ଏହା ଅଂଶୀଦାରମାନଙ୍କୁ ଏକତ୍ରିତ କରେ।