କଟକ : କଟକ କାଠଯୋଡ଼ି ନଦୀ କୂଳ ରାଜାବଗିଚା ନିକଟ ପଠାରୁ ଜଣେ ଅଜଣା ଯୁବତୀଙ୍କ କ୍ଷତାକ୍ତ ମୃତଦେହ ଉଦ୍ଧାର ହେବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି। ଯୁବତୀଙ୍କ ବେକରେ ଗଭୀର କ୍ଷତଚିହ୍ନ ରହିଥିବାରୁ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି। ସନ୍ଧ୍ୟା ସମୟରେ ସ୍ଥାନୀୟ ଲୋକେ ମୃତଦେହ ଦେଖି ପୁଲିସକୁ ଖବର ଦେବା ପରେ ପୁରୀଘାଟ ଓ ବାଦାମବାଡ଼ି ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ମୃତଦେହ ନିକଟରୁ ଏକ ମସିଣା, କଡ଼େଇ ଓ କାଗଜ ପ୍ଲେଟ ଆଦି ସାମଗ୍ରୀ ମିଳିଥିବା ଜଣାପଡ଼ିଛି। ଏହି ସାମଗ୍ରୀଗୁଡ଼ିକ ଘଟଣା ସହ କିଭଳି ସମ୍ପର୍କିତ, ତାହା ମଧ୍ୟ ତଦନ୍ତ କରାଯାଉଛି। ଏପଟେ ଘଟଣାର ତଦନ୍ତ ବେଳେ ପୁଲିସ କିଛି ଲୋକଙ୍କୁ ପଚରାଉଚରା କରୁଥିବା ସମୟରେ ଜଣେ ଯୁବକ ପୁଲିସକୁ ଚକମା ଦେଇ ଦୌଡ଼ି ପଳାଇଥିବା ସୂଚନା ମିଳିଛି। ପୁଲିସ ତାଙ୍କ ପିଛା କରିଥିଲେ ମଧ୍ୟ ଯୁବକ ଜଣକ ଖସି ପଳାଇବାରେ ସଫଳ ହୋଇଥିବା କୁହାଯାଉଛି। ତେବେ ଫେରାର ଯୁବକଙ୍କ ପରିଚୟ କିମ୍ବା ମୃତ ଯୁବତୀଙ୍କ ସହ ତାଙ୍କର ସମ୍ପର୍କ ସମ୍ପର୍କରେ ପୁଲିସ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିନାହିଁ। ମୃତ ଯୁବତୀଙ୍କ ହାତରେ ଏଜି ଲେଖାଥିବା ଟାଟୁ ଚିହ୍ନ ମଧ୍ୟ ରହିଛି।
ପୁଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଏସ୍ସିବି ମେଡିକାଲକୁ ପଠାଇଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ଯୁବତୀଙ୍କ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ। ଯୁବତୀଙ୍କ ପରିଚୟ ଓ ମୃତ୍ୟୁର କାରଣ ଖୋଜିବା ସହ ଘଟଣାରେ ଅନ୍ୟ କେହି ସମ୍ପୃକ୍ତ ଅଛନ୍ତି କି ନାହିଁ, ସେନେଇ ପୁଲିସ ତଦନ୍ତ ଜାରି ରଖିଛି। ମୃତ ମହିଳାଙ୍କ ସମ୍ପର୍କରେ କେହି ଯଦି ସୂଚନା ପାଆନ୍ତି ତାହା ଜଣାଇବାକୁ ଡିସିପି ଅପିଲ କରିଛନ୍ତି।