ଭୁବନେଶ୍ବର: ରାଜ୍ୟରେ ଏପର୍ଯ୍ୟନ୍ତ ସମ୍ପୂର୍ଣ୍ଣ ଭାବେ ଶୀତ ଋତୁ ଆରମ୍ଭ ହୋଇନଥିଲେ ମଧ୍ୟ ଏବେଠାରୁ ବାୟୁମଣ୍ଡଳରେ ପ୍ରଦୂଷଣର ମାତ୍ରା ଭୟଜନକ ଭାବେ ବୃଦ୍ଧି ପାଇବାରେ ଲାଗିଛି। ସାଧାରଣତଃ ଶୀତ ଦିନରେ ପବନର ଗତି ହ୍ରାସ ପାଇବା ଏବଂ ବାୟୁମଣ୍ଡଳର ନିମ୍ନ ଭାଗରେ ବିଭିନ୍ନ ପ୍ରଦୂଷକ କଣିକା ଜମି ରହିବା କାରଣରୁ ବାୟୁର ଗୁଣବତ୍ତା ଗ୍ରହଣୀୟ ସ୍ତରରୁ ଖସିଯାଇଥାଏ। କିନ୍ତୁ ବର୍ତ୍ତମାନ ଶୀତ ଆରମ୍ଭ ହେବା ପୂର୍ବରୁ ହିଁ ରାଜ୍ୟର ଏକାଧିକ ପ୍ରମୁଖ ସହର ଏବଂ ଶିଳ୍ପାଞ୍ଚଳରେ ବାୟୁର ମାନ ମଧ୍ୟମ ତଥା ଚିନ୍ତାଜନକ ସ୍ତରକୁ ଖସିଆସିଛି। ଆଗାମୀ ଦିନରେ ଯେତେବେଳେ ଶୀତର ପ୍ରକୋପ ବଢ଼ିବ, ସେତେବେଳେ ପରିସ୍ଥିତି ଆହୁରି ଅଧିକ ଗମ୍ଭୀର ଏବଂ ଜଟିଳ ହେବାର ଆଶଙ୍କା ରହିଥିବା ନେଇ ପରିବେଶବିତ୍ମାନେ ମତପ୍ରକାଶ କରିଛନ୍ତି।
ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ଼ ପକ୍ଷରୁ ପ୍ରକାଶିତ ସାମ୍ପ୍ରତିକ ତଥ୍ୟ ଅନୁସାରେ, ଓଡ଼ିଶାର ଏକାଧିକ ଜାଗାରେ ବାୟୁ ଗୁଣବତ୍ତା ସୂଚକାଙ୍କ ବା ଏକ୍ୟୁଆଇ (AQI) ୧୦୦ ରୁ ଅଧିକ ରହିଛି। ବିଶେଷ କରି ପାରାଦୀପ ବନ୍ଦର ସହର ଏବଂ ଅନୁଗୁଳ ଭଳି ଶିଳ୍ପବହୁଳ ଅଞ୍ଚଳରେ ଏହାର ମାତ୍ରା ସର୍ବାଧିକ ରହିଛି। ଆଜି ସକାଳ ଆକଳନ ଅନୁଯାୟୀ ପାରାଦୀପରେ ବାୟୁ ଗୁଣବତ୍ତା ସୂଚକାଙ୍କ ସର୍ବାଧିକ ୧୬୩ ରେକର୍ଡ କରାଯାଇଥିବା ବେଳେ ଅନୁଗୁଳରେ ଏହା ୧୫୧ ରହିଛି। ସେହିପରି ତାଳଚେରରେ ୧୧୬, ବାରିପଦାରେ ୧୦୯, କେନ୍ଦୁଝର ଜିଲ୍ଲାର ଶୁଆକାଟି ଅଞ୍ଚଳରେ ୧୦୭ ଏବଂ ନୟାଗଡ଼ରେ ୧୦୨ ରେକର୍ଡ ହୋଇଛି। ଅନ୍ୟପକ୍ଷରେ ବାଲେଶ୍ୱରରେ ଏକ୍ୟୁଆଇ ୮୯, ଭୁବନେଶ୍ୱରରେ ୭୪ ଏବଂ କଟକରେ ୬୯ ରହିଥିଲେ ମଧ୍ୟ ସହରାଞ୍ଚଳରେ ବଢ଼ୁଥିବା ପ୍ରଦୂଷଣର ମାତ୍ରା ଚିନ୍ତା ବଢ଼ାଇ ଦେଇଛି।
ବିଭିନ୍ନ ସହରମାନଙ୍କରେ ବାୟୁ ପ୍ରଦୂଷଣ ଏପରି ମାତ୍ରାରେ ବୃଦ୍ଧି ପାଇବାର ମୁଖ୍ୟ କାରଣଗୁଡ଼ିକ ମଧ୍ୟରେ ବ୍ୟାପକ ନିର୍ମାଣ କାର୍ଯ୍ୟ, ଟ୍ରକ୍ ଏବଂ ଅନ୍ୟାନ୍ୟ ଯାନବାହନର ଅତ୍ୟଧିକ ଚଳାଚଳ ତଥା ଶିଳ୍ପାଞ୍ଚଳଗୁଡ଼ିକରୁ ନିର୍ଗତ ହେଉଥିବା ଧୂଳି ଓ ଧୂଆଁ ମୁଖ୍ୟ ଭୂମିକା ଗ୍ରହଣ କରୁଛି। ସହରଗୁଡ଼ିକରେ ବଢ଼ୁଥିବା ଜନସଂଖ୍ୟା ଏବଂ ଯାନବାହନ ଜନିତ ଧୂଆଁ ବାୟୁମଣ୍ଡଳକୁ ଦୂଷିତ କରିବାରେ ଲାଗିଛି। ଶୀତଋତୁ ଆସିଲେ ଏହି ପ୍ରଦୂଷକ କଣିକାଗୁଡ଼ିକ ବାୟୁମଣ୍ଡଳର ଉପରକୁ ଯାଇନପାରି ଭୂପୃଷ୍ଠା ନିକଟରେ କୁହୁଡ଼ି ସହ ମିଶି ଏକ ଘନ ଆବରଣ ସୃଷ୍ଟି କରିଥାଏ, ଯାହା ମାନବ ସମାଜର ସ୍ୱାସ୍ଥ୍ୟ ପାଇଁ ଅତ୍ୟନ୍ତ କ୍ଷତିକାରକ ଅଟେ।
ପରିବେଶବିତ୍ ଜୟକୃଷ୍ଣ ପାଣିଗ୍ରାହୀଙ୍କ ମତ ଅନୁଯାୟୀ, ବାୟୁର ଏଭଳି ଅବସ୍ଥା ଆଗାମୀ ଦିନରେ ଜନସାଧାରଣଙ୍କ ସ୍ୱାସ୍ଥ୍ୟ ପ୍ରତି ଏକ ବଡ଼ ବିପଦ ସୃଷ୍ଟି କରିପାରେ। ବିଶେଷ କରି ଶିଶୁ, ବୃଦ୍ଧବୃଦ୍ଧା ଏବଂ ପୂର୍ବରୁ ଶ୍ୱାସଜନିତ ରୋଗ କିମ୍ବା ଆଜ୍ମା ସମସ୍ୟାରେ ପୀଡ଼ିତ ଥିବା ବ୍ୟକ୍ତିମାନେ ଏହି ପ୍ରଦୂଷଣ ଦ୍ୱାରା ଅଧିକ ପ୍ରଭାବିତ ହେବାର ଆଶଙ୍କା ରହିଛି। ତେଣୁ ଏହି ସମସ୍ୟାର ମୁକାବିଲା ପାଇଁ ଏବେଠାରୁ ନିୟନ୍ତ୍ରଣମୂଳକ ପଦକ୍ଷେପ ଗ୍ରହଣ କରିବା ଏବଂ ନିର୍ମାଣ କାର୍ଯ୍ୟ ତଥା ଯାନବାହନରୁ ହେଉଥିବା ପ୍ରଦୂଷଣକୁ ରୋକିବା ପାଇଁ ପ୍ରଶାସନିକ ସ୍ତରରେ କଡ଼ା ପଦକ୍ଷେପ ନେବାର ଆବଶ୍ୟକତା ରହିଛି ବୋଲି ବିଶେଷଜ୍ଞମାନେ ମତ ଦେଇଛନ୍ତି।