ଭୁବନେଶ୍ବର: ସମୟର ସ୍ରୋତରେ ବର୍ଷ ପରେ ବର୍ଷ ବିତିଯାଇଥିଲେ ମଧ୍ୟ ବିଦ୍ୟାଳୟ ଜୀବନର ମଧୁର ସ୍ମୃତି, ନିଷ୍କପଟ ହସ-ଖୁସି ଏବଂ ଶୈଶବର ସାଙ୍ଗସାଥୀଙ୍କ ମଧ୍ୟରେ ଥିବା ଆତ୍ମୀୟତା କେବେ ମଳିନ ପଡ଼ିନଥାଏ। ଏହିଭଳି ଏକ ଅତ୍ୟନ୍ତ ଭାବପ୍ରବଣ ଏବଂ ଆନନ୍ଦଉଲ୍ଲାସପୂର୍ଣ୍ଣ ପରିବେଶ ମଧ୍ୟରେ ବାଣପୁରସ୍ଥିତ ଐତିହାସିକ ଗୋଦାବରୀଶ ବିଦ୍ୟାପୀଠର ୧୯୯୯ ମସିହା ଦଶମ ଶ୍ରେଣୀ ବ୍ୟାଚ୍ର ପୁରାତନ ଛାତ୍ରଛାତ୍ରୀମାନଙ୍କର ତୃତୀୟ ବନ୍ଧୁମିଳନ ଉତ୍ସବ ଅତ୍ୟନ୍ତ ଆଡ଼ମ୍ବରପୂର୍ଣ୍ଣ ଭାବେ ପାଳିତ ହୋଇଯାଇଛି। ସ୍ଥାନୀୟ ବାବା ବୁଖାରୀ କନଭେନସନ୍ ଗୃହଠାରେ ଆୟୋଜିତ ଏହି ସ୍ମରଣୀୟ ଉତ୍ସବରେ ଶିକ୍ଷାନୁଷ୍ଠାନ ଛାଡ଼ିବାର ପ୍ରାୟ ଚବିଶ ବର୍ଷ ପରେ ପୁନର୍ବାର ସମସ୍ତେ ଗୋଟିଏ ମଞ୍ଚରେ ଏକାଠି ହୋଇ ପୁରୁଣା ସ୍ମୃତିକୁ ସାଉଁଟିବା ସହ ବନ୍ଧୁତ୍ୱର ଅତୁଟ ବନ୍ଧନକୁ ଆହୁରି ସୁଦୃଢ଼ କରିଛନ୍ତି।
ଏହି ସ୍ୱେଚ୍ଛାକୃତ ଓ ଆତ୍ମୀୟତାପୂର୍ଣ୍ଣ ବନ୍ଧୁମିଳନ ସମାରୋହରେ ପ୍ରାୟ ୪୦ରୁ ୪୫ ଜଣ ପୁରାତନ ଛାତ୍ରଛାତ୍ରୀ ଯୋଗଦେଇ ନିଜ ନିଜର ପୁରୁଣା ସ୍କୁଲ ଦିନର କଥା, ଶ୍ରେଣୀଗୃହର ବାତାବରଣ ଏବଂ କୈଶୋରର ସ୍ମୃତି ସବୁକୁ ଆନନ୍ଦର ସହ ମନେ ପକାଇଥିଲେ। ସମସ୍ତେ ନିଜ ନିଜର ସାମ୍ପ୍ରତିକ ଜୀବନ ଓ କାର୍ଯ୍ୟକ୍ଷେତ୍ରର ଅନୁଭୂତି ସେୟାର କରିବା ସହ ପରସ୍ପର ମଧ୍ୟରେ ଆବେଗପୂର୍ଣ୍ଣ ଭାବର ଆଦାନପ୍ରଦାନ କରିଥିଲେ। ଏହି ଉତ୍ସବକୁ ଆହୁରି ମହିମାମଣ୍ଡିତ ଓ ଗାରିମାମୟ କରିବା ପାଇଁ ଅତିଥି ଭାବେ ବିଦ୍ୟାଳୟର ଶ୍ରଦ୍ଧେୟ ଶିକ୍ଷକ ଭଞ୍ଜ ସାର୍ ଏବଂ ବଡ଼ ପଣ୍ଡିତେ ଯୋଗଦେଇଥିଲେ। ପୂଜ୍ୟ ଗୁରୁଜନମାନଙ୍କୁ ସମ୍ମୁଖରେ ପାଇ ସାଙ୍ଗମାନେ ଅତ୍ୟନ୍ତ ଆବେଗପୂର୍ଣ୍ଣ ହୋଇପଡ଼ିଥିଲେ ଏବଂ ସେମାନଙ୍କ ଗୁରୁଜନ-ସୁଲଭ ଆଶୀର୍ବାଦ ଗ୍ରହଣ କରି ନିଜକୁ ଗୌରବାନ୍ୱିତ ମନେ କରିଥିଲେ।
ଦିନସାରା ଆୟୋଜିତ ହୋଇଥିବା ବିଭିନ୍ନ ରଙ୍ଗାରଙ୍ଗ କାର୍ଯ୍ୟକ୍ରମରେ ରୋଚକ ମଞ୍ଚ ପରିବେଷଣ, ମନୋରଞ୍ଜନମୂଳକ କାର୍ଯ୍ୟକଳାପ ଏବଂ ବାଲ୍ୟକାଳର ସ୍ମୃତିକୁ ଉଜ୍ଜୀବିତ କରୁଥିବା ଅନେକ ଆକର୍ଷଣୀୟ ଖେଳକୁଦର ବ୍ୟବସ୍ଥା କରାଯାଇଥିଲା। ସମସ୍ତ ପୁରାତନ ଛାତ୍ରଛାତ୍ରୀ ନିଜର ଦୈନନ୍ଦିନ କାର୍ଯ୍ୟବ୍ୟସ୍ତତା ଓ ସାଂସାରିକ ଝଞ୍ଜାଟକୁ ଭୁଲି କିଛି ସମୟ ପାଇଁ ପୁଣିଥରେ ସେହି ଶୈଶବ ଓ କୈଶୋରର ସ୍କୁଲ ପିଲା ପାଲଟିଯାଇଥିଲେ। ପୁରା ମାହୋଲ୍ରେ ହସ-ଖୁସି, ମଜା-ମସ୍ତି ଏବଂ ନିବିଡ଼ ଗ୍ରାମୀଣ ଆତ୍ମୀୟତାର ବାତାବରଣ ସୃଷ୍ଟି ହୋଇଥିଲା। ଏହି ଅବସରରେ ଆୟୋଜିତ ସ୍ୱାଦିଷ୍ଟ ପ୍ରୀତିଭୋଜିକୁ ସମସ୍ତେ ଏକାଠି ବସି ଆନନ୍ଦର ସହ ଉପଭୋଗ କରିଥିଲେ।
ଏହି ସଫଳ ଓ ସୁସଂଗଠିତ ବନ୍ଧୁମିଳନ ଉତ୍ସବକୁ ସୁଚାରୁରୂପେ ପରିଚାଳନା କରିବାରେ ଶ୍ରୀମୟୀ ଅପର୍ଣ୍ଣା ଶତପଥୀ, ଜ୍ଞାନାଞ୍ଜଳି ପଟ୍ଟନାୟକ, ମଧୁସ୍ମିତା ତ୍ରିପାଠୀ, ଶକ୍ତି ଦାଶ, ସିଦ୍ଧାର୍ଥ ଦାସ, ସୁମିତ୍ ପ୍ରଜ୍ଞା ଷଡ଼ଙ୍ଗୀ, ବିରଞ୍ଚି ପାତ୍ର, ଟି. ମୋହନ ଦାସ, କାହ୍ନୁ ତ୍ରିପାଠୀ, ବିଦ୍ୟୁତ୍ କାଣ୍ଡି, ୱାହାବ୍ ଖାନ୍, ଶେଖ୍ ହୋସେନ୍, ମାନସ, ରାକେଶ, ଦେବବ୍ରତ ଏବଂ ରଣସିଂହଙ୍କ ସମେତ ଅୟୋଜନ ପଛରେ ଥିବା ସମସ୍ତ ବନ୍ଧୁମାନଙ୍କ ନିଷ୍ଠାପର ଭୂମିକା ଅତ୍ୟନ୍ତ ପ୍ରଶଂସନୀୟ ଥିଲା। ସମୟର ଦୀର୍ଘ ସ୍ରୋତ ଓ ବ୍ୟବଧାନ ସତ୍ତ୍ୱେ ବନ୍ଧୁତ୍ୱର ମଧୁରତା ଯେ କେବେ କମିଯାଏ ନାହିଁ, ତାହାର ଏକ ଜ୍ୱଳନ୍ତ ଓ ଦୃଷ୍ଟାନ୍ତମୂଳକ ଉଦାହରଣ ସୃଷ୍ଟି କରିଥିଲା ଏହି ମିଳନ ପର୍ବ। ଏହିପରି ଆତ୍ମୀୟତାର ମିଳନ ସମାରୋହ ଆଗାମୀ ଦିନରେ ମଧ୍ୟ କ୍ରମାଗତ ଭାବେ ଜାରି ରହିବ ଏବଂ ଅତୀତର ପବିତ୍ର ସମ୍ପର୍କକୁ ନୂତନ ଆଶା ଓ ଉତ୍ସାହ ପ୍ରଦାନ କରିବ ବୋଲି ଉପସ୍ଥିତ ସମସ୍ତ ବନ୍ଧୁମାନେ ଦୃଢ଼ ଆଶା ପ୍ରକାଶ କରିଥିଲେ।