ଜେରୁଜାଲେମ୍: ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ସରକାର ଏକ ବଡ଼ ରାଜନୈତିକ ସଙ୍କଟର ସମ୍ମୁଖୀନ ହୋଇଛନ୍ତି। ନିକଟରେ ଶେଷ ହୋଇଥିବା ଇସ୍ରାଏଲର ଯୁଦ୍ଧକାଳୀନ ସାଧାରଣ ନିର୍ବାଚନର ଏକଜିଟ୍ ପୋଲ୍ରୁ ରାଜନୈତିକ ଅଚଳାବସ୍ଥାର ସ୍ପଷ୍ଟ ଚିତ୍ର ସାମ୍ନାକୁ ଆସିଛି। ଗାଦି ଏସେନକୋଟ୍ଙ୍କ ନେତୃତ୍ୱାଧୀନ ବିରୋଧୀ ମେଣ୍ଟ ଏବଂ ବେଞ୍ଜାମିନ୍ ନେତାନ୍ୟାହୁଙ୍କ କ୍ଷମତାସୀନ ଗୋଷ୍ଠୀ ମଧ୍ୟରେ ଟକ୍କର ଦେଖିବାକୁ ମିଳିଛି। ସରକାର ଗଠନ ପାଇଁ କୌଣସି ବି ଦଳ କିମ୍ବା ମେଣ୍ଟକୁ ସ୍ପଷ୍ଟ ବହୁମତ ମିଳୁ ନଥିବା ଏକଜିଟ୍ ପୋଲ୍ ଆକଳନରୁ ଜଣାପଡ଼ିବା ପରେ ନେତାନ୍ୟାହୁଙ୍କ ଶାସନ ପାଇଁ ଏହା ଏକ ପ୍ରବଳ ଧକ୍କା ସାବ୍ୟସ୍ତ ହୋଇଛି।
ଇସ୍ରାଏଲ ସଂସଦ କ୍ନେସେଟ୍ର ମୋଟ ୧୨୦ଟି ଆସନ ମଧ୍ୟରୁ ସରକାର ଗଢ଼ିବା ପାଇଁ ୬୧ଟି ଆସନର ଆବଶ୍ୟକତା ରହିଛି। ତେବେ ସୂଚନା ଅନୁସାରେ କୌଣସି ପକ୍ଷକୁ ମଧ୍ୟ ଏହି ଆବଶ୍ୟକୀୟ ଆସନ ମିଳୁ ନାହିଁ। ନେତାନ୍ୟାହୁଙ୍କ ଲିକୁଡ୍ ପାର୍ଟି ନେତୃତ୍ୱାଧୀନ ମେଣ୍ଟ ଏବଂ ଏସେନକୋଟ୍ଙ୍କ ୟାଶାର୍ ପାର୍ଟି ନେତୃତ୍ୱାଧୀନ ବିରୋଧୀ ଜୋଟ୍ ମଧ୍ୟରେ ଆସନ ସଂଖ୍ୟା ଅତି ପାଖାପାଖି ରହିଛି। ନେତାନ୍ୟାହୁଙ୍କ ସହଯୋଗୀ ଭାବେ ଇତାମାର ବେନ୍-ଗଭୀର ଏବଂ ବେଜାଲେଲ୍ ସ୍ମୋଟ୍ରିଚ୍ଙ୍କ ଚରମପନ୍ଥୀ ଧାର୍ମିକ ଦଳଗୁଡ଼ିକ ପ୍ରାୟ ୧୩ଟି ଆସନ ପାଇବାକୁ ଯାଉଛନ୍ତି। ଅନ୍ୟପଟେ ଦୁଇ ମୁଖ୍ୟ ଜୋଟ୍ ବାହାରେ ଥିବା ଆରବୀୟ ଦଳଗୁଡ଼ିକ ନିର୍ଣ୍ଣାୟକ ଭୂମିକା ଗ୍ରହଣ କରିପାରନ୍ତି। ମାତ୍ର ବିରୋଧୀ ନେତା ଏସେନକୋଟ୍ ସେମାନଙ୍କ ସହ ମିଶି ସରକାର ଗଢ଼ିବା ନେଇ ଅନିଚ୍ଛା ପ୍ରକାଶ କରିଥିବାରୁ ଏକ ସ୍ଥାୟୀ ସରକାର ଗଠନ ପ୍ରକ୍ରିୟା ଅତି ଜଟିଳ ହୋଇପଡ଼ିଛି।
ଏହି ନିର୍ବାଚନରେ ୭୭.୭ ପ୍ରତିଶତ ମତଦାନ ହୋଇଥିବା କଥା କେନ୍ଦ୍ରୀୟ ନିର୍ବାଚନ କମିଶନ ସୂଚନା ଦେଇଛନ୍ତି, ଯାହା ଗତ ଦୁଇ ଦଶନ୍ଧି ମଧ୍ୟରେ ସର୍ବାଧିକ। ୨୦୨୩ ମସିହା ଅକ୍ଟୋବର ୭ ତାରିଖରେ ହମାସ ଆକ୍ରମଣ ଏବଂ ତା’ ପରବର୍ତ୍ତୀ ସମୟରେ ଗାଜା, ଲେବାନନ୍ ଓ ଇରାନ ବିରୋଧରେ ଆରମ୍ଭ ହୋଇଥିବା ଭୟଙ୍କର ଯୁଦ୍ଧ ପରେ ଦେଶରେ ଏହା ପ୍ରଥମ ସାଧାରଣ ନିର୍ବାଚନ ଥିଲା। ଦେଶର ଜାତୀୟ ସୁରକ୍ଷା ବିଫଳତା ପାଇଁ ନେତାନ୍ୟାହୁ ବହୁ ସମାଲୋଚନାର ଶିକାର ହୋଇଥିବା ବେଳେ ଅନ୍ୟପଟେ ହମାସ, ହିଜବୁଲ୍ଲା ଓ ଇରାନର ଶୀର୍ଷ ନେତାମାନଙ୍କୁ ନିପାତ କରି ଦେଶକୁ ସୁରକ୍ଷିତ କରିଥିବା ଦାବି କରି ଭୋଟ ଭିକ୍ଷା କରିଥିଲେ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସମର୍ଥନକୁ ମଧ୍ୟ ସେ ନିଜର ପ୍ରଚାର ଅସ୍ତ୍ର କରିଥିଲେ।
ପୂର୍ବତନ ସେନାପତି ତଥା ୟାଶାର୍ ପାର୍ଟିର ମୁଖ୍ୟ ୬୬ ବର୍ଷୀୟ ଗାଦି ଏସେନକୋଟ୍ ନିଜର ସାମରିକ ଅଭିଜ୍ଞତାକୁ ଆଗରେ ରଖି ନେତାନ୍ୟାହୁଙ୍କ ସବୁଠାରୁ ବଡ଼ ପ୍ରତିଦ୍ୱନ୍ଦ୍ୱୀ ଭାବେ ଉଭା ହୋଇଛନ୍ତି। ଗାଜା ଯୁଦ୍ଧରେ ନିଜର ପୁଅ ଓ ଦୁଇ ଭଣଜାଙ୍କୁ ହରାଇଥିବା ଏସେନକୋଟ୍ ନେତାନ୍ୟାହୁଙ୍କ ନେତୃତ୍ୱକୁ କଡ଼ା ଭାଷାରେ ସମାଲୋଚନା କରିଛନ୍ତି। ନିର୍ବାଚନ ଫଳାଫଳ ଆସିବା ପରେ ତେଲ୍ ଅଭିଭ୍ରେ ସମର୍ଥକଙ୍କୁ ସମ୍ବୋଧିତ କରି ସେ କହିଛନ୍ତି ଯେ, ଇସ୍ରାଏଲର ଜନସାଧାରଣ ନେତାନ୍ୟାହୁଙ୍କ ନେତୃତ୍ୱ ବିରୋଧରେ ମତ ସାବ୍ୟସ୍ତ କରିସାରିଛନ୍ତି ଏବଂ ଜଣେ ଯୋଗ୍ୟ ନେତା ଭାବେ ନେତାନ୍ୟାହୁ ତୁରନ୍ତ ରାଜନୀତିରୁ ଅବସର ନେବା ଉଚିତ। ସେହିପରି ବିରୋଧୀ ନେତା ୟାଏର୍ ଲାପିଡ୍ ମଧ୍ୟ ନେତାନ୍ୟାହୁ ଜୋଟ୍ର ଶୋଚନୀୟ ପରାଜୟ ହୋଇଛି ବୋଲି ଦାବି କରିଛନ୍ତି।
ଅନ୍ୟପଟେ, ୩୦ ବର୍ଷ ମଧ୍ୟରେ ପ୍ରାୟ ୧୯ ବର୍ଷ ଧରି ଇସ୍ରାଏଲର ପ୍ରଧାନମନ୍ତ୍ରୀ ରହିଆସିଥିବା ୭୭ ବର୍ଷୀୟ ନେତାନ୍ୟାହୁ ପୂର୍ବରୁ ଅନେକ ରାଜନୈତିକ ସଙ୍କଟରୁ ସଫଳତାର ସହ ବାହାରିଛନ୍ତି। ଭ୍ରଷ୍ଟାଚାର ଅଭିଯୋଗ ଏବଂ ଗୁଇନ୍ଦା ବିଫଳତା ସତ୍ତ୍ୱେ ସେ ନିଜକୁ ଜଣେ ଦୃଢ଼ ନେତା ଭାବେ ଉପସ୍ଥାପିତ କରିଛନ୍ତି। ତେବେ ନିର୍ବାଚନ କମିଶନଙ୍କ ସମ୍ପୂର୍ଣ୍ଣ ଆନୁଷ୍ଠାନିକ ଫଳାଫଳ ଆସିବା ପାଇଁ ଆଉ କିଛି ଦିନ ସମୟ ଲାଗିପାରେ। ଯଦି ଏହି ଅଚଳାବସ୍ଥା ଜାରି ରହେ, ତେବେ ଏସେନକୋଟ୍ଙ୍କ ନେତୃତ୍ୱରେ ଏକ ସଂଖ୍ୟାଲଘୁ ସରକାର ଗଠନ ହୋଇପାରେ କିମ୍ବା ନେତାନ୍ୟାହୁ ଅସ୍ଥାୟୀ ପ୍ରଧାନମନ୍ତ୍ରୀ ଭାବେ କାର୍ଯ୍ୟ ଜାରି ରଖିପାରନ୍ତି, ଏପରିକି ଦେଶ ପୁନର୍ବାର ନୂତନ ନିର୍ବାଚନ ଆଡ଼କୁ ଗତି କରିବାର ସମ୍ଭାବନାକୁ ମଧ୍ୟ ଏଡ଼ାଇ ଦିଆଯାଇ ନପାରେ।