ଲଣ୍ଡନ: ବିଶ୍ୱ ଫୁଟ୍ବଲ୍ର ସବୁଠାରୁ ସମ୍ମାନଜନକ ପୁରସ୍କାର ‘ବାଲନ୍ ଡି’ ଓର୍’ ୨୦୨୬ ହାସଲ କରିଛନ୍ତି ଇଂଲଣ୍ଡ ଫୁଟ୍ବଲ ଦଳର ଅଧିନାୟକ ଥତା ବାୟର୍ନ ମ୍ୟୁନିକ୍ର ତାରକା ଷ୍ଟ୍ରାଇକର୍ ହ୍ୟାରୀ କେନ୍। ସୋମବାର ଲଣ୍ଡନଠାରେ ଅନୁଷ୍ଠିତ ଆଡ଼ମ୍ବରପୂର୍ଣ୍ଣ ସମାରୋହରେ ତାଙ୍କୁ ଏହି ଆଭିଜାତ୍ୟପୂର୍ଣ୍ଣ ପୁରସ୍କାରରେ ସମ୍ମାନିତ କରାଯାଇଛି। ଏହି ସଫଳତା ସହ ଦୀର୍ଘ ୨୫ ବର୍ଷର ଆପେକ୍ଷାର ଅନ୍ତ ଘଟାଇ ପ୍ରଥମ ଇଂଲିଶ ଖେଳାଳି ଭାବେ କେନ୍ ଏହି ଟାଇଟଲ୍ ହାସଲ କରିଛନ୍ତି। ପୂର୍ବରୁ ୨୦୦୧ ମସିହାରେ ମାଇକେଲ୍ ଓଭେନ୍ ଶେଷ ଇଂଲିଶ ଫୁଟ୍ବଲର୍ ଭାବେ ଏହି ପୁରସ୍କାର ଜିତିଥିଲେ।
ଗତ ସିଜନ୍ରେ ହ୍ୟାରୀ କେନ୍ କ୍ଲବ୍ ଏବଂ ଜାତୀୟ ଦଳ ପକ୍ଷରୁ ଚମତ୍କାର ପ୍ରଦର୍ଶନ କରି ମୋଟ ୭୩ଟି ଗୋଲ୍ ସ୍କୋର୍ କରିବା ସହ ୟୁରୋପର ଶୀର୍ଷ ଗୋଲଦାତା ହୋଇଥିଲେ। ସେ ବାୟର୍ନ ମ୍ୟୁନିକ୍କୁ ବୁନ୍ଦେସ୍ଲିଗା ଏବଂ ଜର୍ମାନ୍ କପ୍ ଟାଇଟଲ୍ ଜିତାଇବାରେ ନିର୍ଣ୍ଣାୟକ ଭୂମିକା ଗ୍ରହଣ କରିଥିଲେ। ଜର୍ମାନ୍ କପ୍ ଫାଇନାଲ୍ରେ ଷ୍ଟଟ୍ଗାର୍ଟ ବିପକ୍ଷରେ ସେ ହ୍ୟାଟ୍ରିକ୍ ଗୋଲ୍ ହାସଲ କରିଥିଲେ। ଏତଦ୍ବ୍ୟତୀତ ବିଶ୍ୱକପ୍ରେ ୬ଟି ଗୋଲ୍ ସ୍କୋର୍ କରି ସେ ଇଂଲଣ୍ଡ ପାଇଁ ଗ୍ୟାରୀ ଲିନେକରଙ୍କ ସର୍ବାଧିକ ଗୋଲ୍ ରେକର୍ଡକୁ ଭାଙ୍ଗିଥିଲେ। ତାଙ୍କ ନେତୃତ୍ୱରେ ଇଂଲଣ୍ଡ ତୃତୀୟ ସ୍ଥାନ ପାଇଁ ଖେଳାଯାଇଥିବା ମ୍ୟାଚ୍ରେ ଫ୍ରାନ୍ସକୁ ପରାସ୍ତ କରିଥିଲା।
ଏହି ସମ୍ମାନଜନକ ଭୋଟିଂ ପ୍ରକ୍ରିୟାରେ କେନ୍ ଫ୍ରାନ୍ସର କିଲିୟନ୍ ଏମ୍ବାପ୍ପେ, ସ୍ପେନ୍ର ଲାମିନ୍ ୟାମଲ୍, ୨୦୨୪ ବିଜେତା ରୋଡ୍ରି ଏବଂ ରେକର୍ଡ ୮ ଥରର ବିଜେତା ଲିଓନେଲ୍ ମେସିଙ୍କୁ ପଛରେ ପକାଇ ପ୍ରଥମ ସ୍ଥାନ ହାସଲ କରିଛନ୍ତି। ସେହିପରି ଷ୍ଟାର୍ ଖେଳାଳି ଲାମିନ୍ ୟାମଲ୍ ଲଗାତାର ତୃତୀୟ ବର୍ଷ ପାଇଁ ଶ୍ରେଷ୍ଠ ଯୁବ ଖେଳାଳି ଭାବେ ମନୋନୀତ ହୋଇଛନ୍ତି।
ଅନ୍ୟପକ୍ଷରେ, ମହିଳା ବର୍ଗରେ ସ୍ପେନ୍ର ପ୍ରସିଦ୍ଧ ମିଡ୍ଫିଲ୍ଡର୍ ୩୨ ବର୍ଷୀୟା ଆଲେକ୍ସିଆ ପୁତେଲାସ୍ କ୍ୟାରିୟର୍ରେ ତୃତୀୟ ଥର ପାଇଁ ‘ମହିଳା ବାଲନ୍ ଡି’ଓର୍’ ଆୱାର୍ଡ ଜିତିଛନ୍ତି। ଏହା ପୂର୍ବରୁ ସେ ୨୦୨୧ ଓ ୨୦୨୨ରେ ଲଗାତାର ଦୁଇଥର ଏହି ସମ୍ମାନ ପାଇଥିଲେ। ନିଜର ପୂର୍ବତନ ଟିମ୍ ବାର୍ସିଲୋନାକୁ ମହିଳା ଚାମ୍ପିଅନ୍ସ ଲିଗ୍ ସହ ସ୍ପେନ୍କୁ ମହିଳା ନେସନ୍ସ ଲିଗ୍ ଟାଇଟଲ୍ ଜିତାଇବାରେ ତାଙ୍କର ମହତ୍ତ୍ୱପୂର୍ଣ୍ଣ ଯୋଗଦାନ ଥିଲା। ଏହି ସଫଳତା ସହ ସେ ନିଜ ଦେଶର ଖେଳାଳି ଏତାନା ବୋନମାଟୀଙ୍କ ଗତ ତିନି ବର୍ଷର (୨୦୨୩, ୨୦୨୪, ୨୦୨୫) ଦବ୍ଦବାକୁ ସମାପ୍ତ କରିଛନ୍ତି। ଆହତ ସମସ୍ୟା (ଗୋଡ଼ ଫ୍ରାକ୍ଚର) କାରଣରୁ ବୋନମାଟୀ ଏଥର ଶର୍ଟଲିଷ୍ଟ୍ରେ ସ୍ଥାନ ପାଇନଥିଲେ।