ନୂଆଦିଲ୍ଲୀ: ଭାରତ ସରକାରଙ୍କ ପର୍ଯ୍ୟଟନ ମନ୍ତ୍ରଣାଳୟ ପକ୍ଷରୁ ଗୁଜରାଟ ପର୍ଯ୍ୟଟନ ବିଭାଗର ସହଭାଗିତା ଏବଂ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକର ସହଯୋଗରେ ଗୁଜରାଟର ଏକତା ନଗରଠାରେ ‘ଭାରତ ପର୍ବ ୨୦୨୬’ର ଆୟୋଜନ କରାଯାଇଛି। ‘ଏକ ଭାରତ ଶ୍ରେଷ୍ଠ ଭାରତ’ ଏକତାର ମୂଳମନ୍ତ୍ରକୁ ଆଧାର କରି ଆୟୋଜିତ ଏହି ଉତ୍ସବରେ ଭାରତର ସମୃଦ୍ଧ ସାଂସ୍କୃତିକ ଐତିହ୍ୟ, ଜୀବନ୍ତ ପରମ୍ପରା ଓ ବିବିଧତାକୁ ପ୍ରଦର୍ଶନ କରାଯାଉଛି। ଜାତୀୟ ଏକତା ଦିବସ ପାଳନର ଅଂଶସ୍ୱରୂପ ୩୦ ଅକ୍ଟୋବର ୨୦୨୬ରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏହି ଉତ୍ସବର ଉଦ୍ଘାଟନ କରିଥିଲେ। ଏହି ଉତ୍ସବ ୧୫ ନଭେମ୍ବର ୨୦୨୬ ପର୍ଯ୍ୟନ୍ତ ଚାଲିବ।
ଏହି ଉତ୍ସବରେ ଦେଶର ବିଭିନ୍ନ ପ୍ରାନ୍ତର ପାରମ୍ପରିକ କଳା, ହସ୍ତଶିଳ୍ପ, ଆଞ୍ଚଳିକ ଖାଦ୍ୟ, ଲୋକପରମ୍ପରା, ସଙ୍ଗୀତ, ନୃତ୍ୟ ଏବଂ ସ୍ୱଦେଶୀ କାରିଗରୀ କଳାର ସମାହାର ଦେଖିବାକୁ ମିଳୁଛି। ଗୋଟିଏ ସ୍ଥାନରେ ଭାରତର ସାଂସ୍କୃତିକ ବିବିଧତାକୁ ଅନୁଭବ କରିବାର ଏକ ସୁଯୋଗ ଏହି ଉତ୍ସବ ଦର୍ଶକମାନଙ୍କୁ ପ୍ରଦାନ କରୁଛି।
‘ଭାରତ ପର୍ବ’ର ଏକ ପ୍ରମୁଖ ଆକର୍ଷଣ ହେଉଛି ଥିମ୍ ପାଭିଲିୟନ୍ ବା ବିଷୟଭିତ୍ତିକ ପ୍ରଦର୍ଶନୀ ମଣ୍ଡପ। ଏଥିରେ ୨୯ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସମେତ ଇନକ୍ରେଡିବଲ୍ ଇଣ୍ଡିଆ ଏବଂ ସେଣ୍ଟ୍ରାଲ୍ କଟେଜ୍ ଇଣ୍ଡଷ୍ଟ୍ରିଜ୍ ଅଂଶଗ୍ରହଣ କରୁଛନ୍ତି। ଏହି ମଣ୍ଡପରେ ୧୦୦ରୁ ଅଧିକ ‘ଏକ ଜିଲ୍ଲା ଏକ ଉତ୍ପାଦ’ (ଓଡିଓପି) ସାମଗ୍ରୀ ସହିତ ପାରମ୍ପରିକ ହସ୍ତଶିଳ୍ପ, ବୟନଶିଳ୍ପ, ଚିତ୍ରକଳା, କୃଷିଜାତ ଦ୍ରବ୍ୟ ଏବଂ ଅନ୍ୟାନ୍ୟ ସ୍ୱତନ୍ତ୍ର ଆଞ୍ଚଳିକ ଉତ୍ପାଦ ପ୍ରଦର୍ଶିତ ହେଉଛି। ଏହା ଭାରତର ବିଭିନ୍ନ ଅଞ୍ଚଳର କଳାତ୍ମକ ଉତ୍କର୍ଷତା ଓ ସାଂସ୍କୃତିକ ପରିଚୟକୁ ପ୍ରତିଫଳିତ କରୁଛି।
ଏହି ଉତ୍ସବର ଅନ୍ୟତମ ପ୍ରମୁଖ ଆକର୍ଷଣ ହେଉଛି ‘ଏକ ଜିଲ୍ଲା ଏକ ଉତ୍ପାଦ’ (ଓଡିଓପି) ପ୍ରଦର୍ଶନୀ। ଏଥିରେ ଅଂଶଗ୍ରହଣ କରୁଥିବା ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକ ନିଜ ନିଜ ଅଞ୍ଚଳର ସ୍ୱତନ୍ତ୍ର କାରିଗରୀ ଦକ୍ଷତା, ପାରମ୍ପରିକ ହସ୍ତକଳା ଓ ସ୍ଥାନୀୟ ବିଶେଷତ୍ୱକୁ ପ୍ରତିଫଳିତ କରୁଥିବା ଉତ୍ପାଦଗୁଡ଼ିକ ପ୍ରଦର୍ଶନ କରୁଛନ୍ତି। ସୂକ୍ଷ୍ମ କାରୁକାର୍ଯ୍ୟପୂର୍ଣ୍ଣ ବସ୍ତ୍ର ଓ ହସ୍ତତନ୍ତ ସାମଗ୍ରୀଠାରୁ ଆରମ୍ଭ କରି ପାରମ୍ପରିକ ଚିତ୍ରକଳା, ହସ୍ତଶିଳ୍ପ ଏବଂ ଅଞ୍ଚଳଭିତ୍ତିକ କୃଷିଜାତ ଉତ୍ପାଦ ପର୍ଯ୍ୟନ୍ତ ବିଭିନ୍ନ ସାମଗ୍ରୀ ଏହି ପ୍ରଦର୍ଶନୀରେ ସ୍ଥାନ ପାଇଛି। ଏହା ଦର୍ଶକମାନଙ୍କୁ ଭାରତର ବିବିଧ ସ୍ୱଦେଶୀ ଉତ୍ପାଦ ଓ ପାରମ୍ପରିକ କାରିଗରୀ ପରମ୍ପରାର ଏକ ଝଲକ ପ୍ରଦାନ କରୁଛି। ସ୍ଥାନୀୟ ସ୍ତରରେ ପ୍ରସିଦ୍ଧ ଉତ୍ପାଦଗୁଡ଼ିକୁ ଜାତୀୟ ମଞ୍ଚରେ ପ୍ରଦର୍ଶିତ କରି ‘ଭାରତ ପର୍ବ’ ଆଞ୍ଚଳିକ କାରିଗରୀକୁ ଅଧିକ ପରିଚିତି ଦେବା, ପାରମ୍ପରିକ ଦକ୍ଷତାର ପ୍ରଚାର-ପ୍ରସାର କରିବା ଏବଂ ସ୍ଥାନୀୟ କାରିଗର ଓ ହସ୍ତଶିଳ୍ପୀଙ୍କ ଦ୍ୱାରା ପ୍ରସ୍ତୁତ ସାମଗ୍ରୀ ପ୍ରତି ଲୋକଙ୍କ ଆଗ୍ରହ ବୃଦ୍ଧି କରିବାର ସୁଯୋଗ ସୃଷ୍ଟି କରୁଛି। ଏଥିସହିତ, ‘ଇନକ୍ରେଡିବଲ୍ ଇଣ୍ଡିଆ’ ପାଭିଲିୟନ୍ରେ ଆକର୍ଷଣୀୟ ଡିଜିଟାଲ୍ ମାଧ୍ୟମରେ ଦେଶର ଐତିହ୍ୟ, ସଂସ୍କୃତି ଓ ପର୍ବପର୍ବାଣୀଗୁଡ଼ିକୁ ପ୍ରଦର୍ଶିତ କରାଯାଉଛି।
ପାରମ୍ପରିକ କାରିଗରମାନଙ୍କ ଦ୍ୱାରା ସିଧାସଳଖ କଳାକୃତି ପ୍ରସ୍ତୁତିର ପ୍ରଦର୍ଶନ ଏହି ଉତ୍ସବର ଅନ୍ୟତମ ପ୍ରମୁଖ ଆକର୍ଷଣ। ଏହା ମାଧ୍ୟମରେ ଦର୍ଶକମାନେ ଭାରତର ସ୍ୱଦେଶୀ କାରିଗରୀ କଳାକୁ ପ୍ରତ୍ୟକ୍ଷ ଭାବେ ଦେଖିବାର ସୁଯୋଗ ପାଉଛନ୍ତି। ଏଥିରେ ଆସାମର ପାରମ୍ପରିକ ମୁଖା ପ୍ରସ୍ତୁତି, ବିହାରର ମଧୁବନୀ ଚିତ୍ରକଳା ଓ ସିକ୍କି ହସ୍ତଶିଳ୍ପ, ଗୁଜରାଟର ରୋଗନ୍ କଳା ଓ ପାରମ୍ପରିକ ଚିତ୍ରକଳା, ଛତିଶଗଡ଼ର ବାଉଁଶ କଳା, କେରଳର କତା ଉତ୍ପାଦ ପ୍ରସ୍ତୁତି, ଓଡ଼ିଶାର ପଟ୍ଟଚିତ୍ର ଓ ରୌପ୍ୟ ତାରକସି କାମ, ଉତ୍ତରାଖଣ୍ଡର ଐପନ୍ ଚିତ୍ରକଳା ଓ ରିଙ୍ଗାଲ୍ ବାଉଁଶରେ ଝୁଡ଼ି ପ୍ରସ୍ତୁତି ଏବଂ ଜମ୍ମୁ-କାଶ୍ମୀରର ସୋଜନି କଳା ଆଦି ସ୍ଥାନ ପାଇଛି। ଏହି ପ୍ରଦର୍ଶନୀଗୁଡ଼ିକ କାରିଗରମାନଙ୍କୁ ନିଜ ଦକ୍ଷତା ପ୍ରଦର୍ଶନ କରିବାର ମଞ୍ଚ ଯୋଗାଇବା ସହିତ ଦର୍ଶକମାନଙ୍କୁ ପାରମ୍ପରିକ କଳାରୂପ, କାରିଗରୀ କୌଶଳ ଏବଂ ପିଢ଼ି ପରେ ପିଢ଼ି ଧରି ପ୍ରଚଳିତ ସ୍ୱଦେଶୀ ଜ୍ଞାନ ପରମ୍ପରା ସହିତ ପରିଚିତ କରାଉଛି।
ଏହି ଉତ୍ସବରେ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ସମୃଦ୍ଧ ଲୋକକଳା ଓ ଶାସ୍ତ୍ରୀୟ କଳା ପରମ୍ପରାକୁ ନେଇ ଏକ ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଉଛି। ଏଥିରେ ଆନ୍ଧ୍ରପ୍ରଦେଶର କୁଚିପୁଡ଼ି, ଆସାମର ବିହୁ ଓ ଅନ୍ୟାନ୍ୟ ଲୋକନୃତ୍ୟ, ଗୁଜରାଟର ଗରବା, ହରିୟାଣାର ପାରମ୍ପରିକ ଲୋକନୃତ୍ୟ, କେରଳର ଥୋଲପାଭାକୁଥୁ ଛାୟା କଣ୍ଢେଇ ନୃତ୍ୟ, ରାଜସ୍ଥାନର ରାବଣହଟ୍ଟା ବାଦ୍ୟ ସଙ୍ଗୀତ, ତାମିଲନାଡୁର ପାରମ୍ପରିକ ନୃତ୍ୟଶୈଳୀ, ଜମ୍ମୁ-କାଶ୍ମୀରର ସନ୍ତୁର ବାଦନ ଏବଂ ପଶ୍ଚିମବଙ୍ଗର ବାଉଲ୍ ଲୋକସଙ୍ଗୀତ ଓ ପୁରୁଲିଆ ଛଉ ନୃତ୍ୟ ସମେତ ବିଭିନ୍ନ ଆଞ୍ଚଳିକ କଳା ପରିବେଷଣ କରାଯାଉଛି। ଏହି ସାଂସ୍କୃତିକ ପରିବେଷଣଗୁଡ଼ିକ ଭାରତର ସମୃଦ୍ଧ ସାଂସ୍କୃତିକ ଐତିହ୍ୟର ଅବିଚ୍ଛେଦ୍ୟ ଅଙ୍ଗ ଭାବେ ରହିଥିବା ସଙ୍ଗୀତ, ନୃତ୍ୟ ଓ କଳାତ୍ମକ ପରମ୍ପରାକୁ ଜୀବନ୍ତ ରୂପରେ ପ୍ରତିଫଳିତ କରୁଛି।
୨୩ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ଆଞ୍ଚଳିକ ଖାଦ୍ୟ ଓ ପାରମ୍ପରିକ ସୁସ୍ୱାଦୁ ବ୍ୟଞ୍ଜନକୁ ନେଇ ପ୍ରସ୍ତୁତ ଖାଦ୍ୟ ପ୍ରାଙ୍ଗଣ ବା ଫୁଡ୍ କୋର୍ଟ ଏହି ଉତ୍ସବର ଅନ୍ୟତମ ପ୍ରମୁଖ ଆକର୍ଷଣ। ଏହା ମାଧ୍ୟମରେ ଦର୍ଶକମାନେ ଭାରତର ବିବିଧ ପାକଶୈଳୀ ଓ ଖାଦ୍ୟ ପରମ୍ପରାର ଅନୁଭୂତି ଲାଭ କରିବାର ସୁଯୋଗ ପାଉଛନ୍ତି। ଏହି ଅନୁଭୂତିକୁ ଆହୁରି ସମୃଦ୍ଧ କରିବା ପାଇଁ ନ୍ୟାସନାଲ୍ କାଉନସିଲ୍ ଫର୍ ହୋଟେଲ୍ ମ୍ୟାନେଜମେଣ୍ଟ୍ ଆଣ୍ଡ କ୍ୟାଟରିଂ ଟେକ୍ନୋଲୋଜି (ଏନ୍ସିଏଚ୍ଏମ୍ସିଟି) ପରିଚାଳନାରେ ଏକ ସ୍ୱତନ୍ତ୍ର ଭାବେ ପ୍ରସ୍ତୁତ ‘ଷ୍ଟୁଡିଓ କିଚେନ୍’ର ବ୍ୟବସ୍ଥା କରାଯାଇଛି। ଏଠାରେ ଆଞ୍ଚଳିକ ପାକପ୍ରଣାଳୀ ଓ ପାରମ୍ପରିକ ଖାଦ୍ୟ ପ୍ରସ୍ତୁତି କୌଶଳ ସମ୍ପର୍କରେ ପ୍ରଦର୍ଶନୀ ମାଧ୍ୟମରେ ଦର୍ଶକମାନଙ୍କୁ ଅବଗତ କରାଯାଉଛି। ଏଥିସହିତ, ଖାଦ୍ୟ ପ୍ରାଙ୍ଗଣରେ ପ୍ରତିଦିନ ଅପରାହ୍ଣ ୫ଟାରୁ ରାତି ୮ଟା ପର୍ଯ୍ୟନ୍ତ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେଉଛି। ପ୍ରତିଦିନ ୧୦ଟି ରାଜ୍ୟର କଳାକାରମାନେ ଏଥିରେ ଅଂଶଗ୍ରହଣ କରି ଆଞ୍ଚଳିକ ଖାଦ୍ୟ, ସଙ୍ଗୀତ ଓ ନୃତ୍ୟର ଏକ ଆକର୍ଷଣୀୟ ସମନ୍ୱୟ ସୃଷ୍ଟି କରୁଛନ୍ତି।
ଭାରତର ସାଂସ୍କୃତିକ ବିବିଧତାକୁ ପାଳନ କରିବା ସହିତ ‘ଭାରତ ପର୍ବ’ ଆଞ୍ଚଳିକ ଉତ୍ପାଦଗୁଡ଼ିକର ପ୍ରଦର୍ଶନ, ସ୍ୱଦେଶୀ କଳାରୂପର ପ୍ରଚାର-ପ୍ରସାର ଏବଂ ପାରମ୍ପରିକ କାରିଗର, ହସ୍ତଶିଳ୍ପୀ ଓ ପ୍ରଦର୍ଶନକାରୀ କଳାକାରମାନଙ୍କୁ ଦେଶର ବିଭିନ୍ନ ଅଞ୍ଚଳର ଦର୍ଶକଙ୍କ ନିକଟତର କରିବା ପାଇଁ ଏକ ସାଧାରଣ ମଞ୍ଚ ପ୍ରଦାନ କରୁଛି। ଏହି ଉତ୍ସବ ପର୍ଯ୍ୟଟନ ଅନୁଭୂତିକୁ ସମୃଦ୍ଧ କରିବା ଏବଂ ବିଭିନ୍ନ ଅଞ୍ଚଳର ସ୍ୱତନ୍ତ୍ର ସାଂସ୍କୃତିକ ପରିଚୟକୁ ଉଜାଗର କରିବାରେ ସ୍ଥାନୀୟ ପରମ୍ପରା, ହସ୍ତକଳା ଓ ଆଞ୍ଚଳିକ ଖାଦ୍ୟର ଗୁରୁତ୍ୱକୁ ମଧ୍ୟ ପ୍ରତିଫଳିତ କରୁଛି।
‘ଭାରତ ପର୍ବ ୨୦୨୬’ ସାଂସ୍କୃତିକ ଆଦାନପ୍ରଦାନକୁ ପ୍ରୋତ୍ସାହନ, ଜାତୀୟ ଏକତାକୁ ସୁଦୃଢ଼ କରିବା ଏବଂ ବିବିଧତା ମଧ୍ୟରେ ଭାରତର ଏକତାକୁ ପାଳନ କରିବା ମାଧ୍ୟମରେ ‘ଏକ ଭାରତ ଶ୍ରେଷ୍ଠ ଭାରତ’ର ଭାବନାକୁ ଆହୁରି ସୁଦୃଢ଼ କରୁଛି। ଗୁଜରାଟର ଏକତା ନଗରଠାରେ ଆୟୋଜିତ ଏହି ଉତ୍ସବ ୧୫ ନଭେମ୍ବର ୨୦୨୬ ପର୍ଯ୍ୟନ୍ତ ଦର୍ଶକମାନଙ୍କ ପାଇଁ ଖୋଲା ରହିବ।