ଭୁବନେଶ୍ବର: ଶୀତର ଆଗମନ ସହିତ ଏସିଆର ସର୍ବବୃହତ୍ ଲୁଣିଆ ପାଣି ହ୍ରଦ ଚିଲିକାକୁ ବିଦେଶାଗତ ପକ୍ଷୀମାନଙ୍କ ଆଗମନ ଆରମ୍ଭ ହୋଇଯାଇଛି। ଚଳିତ ବର୍ଷ ପ୍ରାୟ ୮୦ ପ୍ରଜାତିର ପକ୍ଷୀ ଚିଲିକାରେ ପହଞ୍ଚିବେ ବୋଲି ଆଶା କରାଯାଉଥିବାବେଳେ ସେମାନଙ୍କ ସଂଖ୍ୟା ୮୦ ହଜାରରୁ ୧ ଲକ୍ଷ ପର୍ଯ୍ୟନ୍ତ ହେବ ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି। ରୁଷିଆ, ମଙ୍ଗୋଲିଆ, ମଧ୍ୟ ଏସିଆ, ସାଇବେରିଆ ଏବଂ ଉତ୍ତର ୟୁରୋପ୍ ଭଳି ଶୀତଳାଞ୍ଚଳରୁ ହଜାର ହଜାର କିଲୋମିଟର ପଥ ଅତିକ୍ରମ କରି ଏହି ପକ୍ଷୀମାନେ ପ୍ରତିବର୍ଷ ଚିଲିକାରେ ଆଶ୍ରୟ ନେଇଥାନ୍ତି। ଚିଲିକାର ଅନୁକୂଳ ଉଷୁମ ପାଗ, ପ୍ରଚୁର ଖାଦ୍ୟ ଏବଂ ଶାନ୍ତ ପରିବେଶ ସେମାନଙ୍କୁ ବେଶ୍ ଆକର୍ଷିତ କରିଥାଏ। ବର୍ତ୍ତମାନ ମଙ୍ଗଳାଜୋଡ଼ି, ନଳବଣ, ସାତପଡ଼ା ଓ ବାଲୁଗାଁ ଅଞ୍ଚଳରେ ରଙ୍ଗବେରଙ୍ଗୀ ପକ୍ଷୀଙ୍କ ଭିଡ଼ ଦେଖିବାକୁ ମିଳିଲାଣି। ଗ୍ରେଟର ଫ୍ଲେମିଙ୍ଗୋ, ପେଲିକାନ୍, ପିନ୍ଟେଲ୍, ଗଡୱିଟ୍ ଏବଂ ସ୍ପୁନ୍ବିଲ୍ ଭଳି ଦୁର୍ଲଭ ପ୍ରଜାତିର ପକ୍ଷୀଙ୍କ କଳରବରେ ସମଗ୍ର ଚିଲିକାଞ୍ଚଳ ଚଳଚଞ୍ଚଳ ହୋଇଉଠିଛି। ପକ୍ଷୀଙ୍କ ଆଗମନ ପରେ ହ୍ରଦରେ ପର୍ଯ୍ୟଟକଙ୍କ ଭିଡ଼ ମଧ୍ୟ ବୃଦ୍ଧି ପାଇଛି। ଦେଶବିଦେଶରୁ ଆସୁଥିବା ପର୍ଯ୍ୟଟକମାନେ ନୌବିହାର ସହ ପକ୍ଷୀ ଦର୍ଶନର ମଜା ଉଠାଉଛନ୍ତି। ଏହାଦ୍ୱାରା ସ୍ଥାନୀୟ ନୌକା ଚାଳକ, ଗାଇଡ୍ ଏବଂ ହୋଟେଲ୍ ବ୍ୟବସାୟୀଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି। ଅନ୍ୟପକ୍ଷେ, ପକ୍ଷୀଙ୍କ ସୁରକ୍ଷା ଓ ଶିକାର ରୋକିବା ପାଇଁ ବନ ବିଭାଗ ପକ୍ଷରୁ କଡ଼ା ପାଟ୍ରୋଲିଂ ବ୍ୟବସ୍ଥା କରାଯାଇଛି। ପକ୍ଷୀମାନଙ୍କ ନିରାପତ୍ତା ସୁନିଶ୍ଚିତ କରିବା ନିମନ୍ତେ ସ୍ଥାନୀୟ ଲୋକଙ୍କ ସହଯୋଗ ମଧ୍ୟ ଲୋଡ଼ାଯାଇଛି।


