ଗଞ୍ଜାମ : ବାତ୍ୟା ‘ଅକୱାନ’ର ସମ୍ଭାବ୍ୟ ପ୍ରଭାବକୁ ନଜରରେ ରଖି ଗଞ୍ଜାମ ଜିଲ୍ଲାରେ ଯାତାୟାତ ବ୍ୟବସ୍ଥା ଉପରେ ଲାଗିଛି ବଡ଼ କଟକଣା। ଜନସାଧାରଣଙ୍କ ସୁରକ୍ଷା ପାଇଁ ଆସନ୍ତା ୨୦ ତାରିଖ ଶୁକ୍ରବାର ଜିଲ୍ଲାରେ ସମସ୍ତ ସରକାରୀ ଓ ଘରୋଇ ଯାତ୍ରୀବାହୀ ବସ୍ ସମେତ ଟ୍ରକ୍ ଚଳାଚଳ ବନ୍ଦ ରଖିବାକୁ ଜିଲ୍ଲା ପ୍ରଶାସନ ନିଷ୍ପତ୍ତି ନେଇଛି।
ଏନେଇ ଗଞ୍ଜାମ ଆରଟିଓଙ୍କ ପକ୍ଷରୁ ଗୁରୁବାର ସମସ୍ତ ଘରୋଇ ବସ୍ ମାଲିକ ସଂଘକୁ ବିଜ୍ଞପ୍ତି ଜାରି କରାଯାଇଛି। ଶୁକ୍ରବାର ଜିଲ୍ଲାର ସମସ୍ତ ଅଞ୍ଚଳରେ ବସ୍ ଚଳାଚଳ ବନ୍ଦ ରଖିବାକୁ କୁହାଯାଇଛି। ସେହିପରି ଟ୍ରକ୍ ମାଲିକ ସଂଘକୁ ମଧ୍ୟ ମାଲ ପରିବହନ ଓ ଟ୍ରକ୍ ଚଳାଚଳ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି।
ଏହି କଟକଣାରୁ ଓଏସଆରଟିସି ଓ ସିଟି ବସ୍ ସେବା ଯୋଗାଉଥିବା କ୍ରୁଟ୍କୁ ମଧ୍ୟ ବାଦ୍ ଦିଆଯାଇନାହିଁ। ଆରଟିଓଙ୍କ ପକ୍ଷରୁ ଉଭୟ ସଂସ୍ଥାକୁ ଚିଠି ଲେଖି ସମସ୍ତ ପ୍ରକାର ଯାତ୍ରୀବାହୀ ବସ୍ ସେବା ବନ୍ଦ ରଖିବାକୁ କୁହାଯାଇଛି। ଫଳରେ ବ୍ରହ୍ମପୁର, ଛତ୍ରପୁର ଓ ଗୋପାଳପୁର ସମେତ ଜିଲ୍ଲାର ସହରାଞ୍ଚଳ ଓ ଗ୍ରାମାଞ୍ଚଳରେ ଚାଲୁଥିବା ୨ ହଜାରରୁ ଅଧିକ ସରକାରୀ ଓ ଘରୋଇ ବସ୍ ରାସ୍ତାକୁ ଓହ୍ଲାଇବ ନାହିଁ। ସିଟି ବସ୍ ଓ ଗ୍ରାମାଞ୍ଚଳର ସରକାରୀ ବସ୍ ସେବା ମଧ୍ୟ ବନ୍ଦ ରହିବ।
ବାତ୍ୟା ପ୍ରଭାବରେ ପ୍ରବଳ ବର୍ଷା ସହ ଝଡ଼ ପବନ ହେବାର ଆଶଙ୍କା ଥିବାରୁ ଯାତ୍ରୀ ଓ ଚାଳକଙ୍କ ସୁରକ୍ଷା ଦୃଷ୍ଟିରୁ ଏହି ପଦକ୍ଷେପ ନିଆଯାଇଛି। ଅନ୍ୟପଟେ ବ୍ରହ୍ମପୁର ରେଳ ଷ୍ଟେସନ ଦେଇ ଯାତାୟାତ କରୁଥିବା କେତେକ ପାସେଞ୍ଜର ଓ ଏକ୍ସପ୍ରେସ୍ ଟ୍ରେନ୍ର ଚଳାଚଳ ମଧ୍ୟ ବାଧାପ୍ରାପ୍ତ ହେବା ନେଇ ଆଶଙ୍କା ରହିଛି। ତେବେ କେଉଁ ଟ୍ରେନ୍ ବାତିଲ ହେବ, ସେନେଇ ରେଳବାଇର ଅଧିକାରିକ ସୂଚନା ଅପେକ୍ଷାରେ ରହିବାକୁ ପଡ଼ିବ।
ବସ୍ ଓ ଟ୍ରେନ୍ ଚଳାଚଳ ବନ୍ଦ ହେଲେ ଗଞ୍ଜାମରୁ ସୁରଟ, ଦିଲ୍ଲୀ, ମୁମ୍ବାଇ, ତାମିଲନାଡୁ, କେରଳ ଓ ଆନ୍ଧ୍ରପ୍ରଦେଶ ଭଳି ରାଜ୍ୟକୁ ଯାତାୟାତ କରୁଥିବା ଶ୍ରମିକଙ୍କ ସମେତ କନ୍ଧମାଳ ଓ ଗଜପତି ଜିଲ୍ଲାର ଯାତ୍ରୀମାନେ ମଧ୍ୟ ସମସ୍ୟାରେ ପଡ଼ିପାରନ୍ତି। ତେବେ ଜରୁରୀକାଳୀନ ସେବା, ରିଲିଫ୍ ଓ ଉଦ୍ଧାର କାର୍ଯ୍ୟ ଏବଂ ପ୍ରଶାସନିକ କାର୍ଯ୍ୟରେ ନିୟୋଜିତ ଯାନବାହନକୁ ଏହି କଟକଣାରୁ ବାଦ୍ ଦିଆଯାଇଛି। ବାତ୍ୟା ସମୟରେ ଅଯଥା ଯାତ୍ରା ନକରିବା ସହ ଯାତାୟାତ ସମ୍ପର୍କିତ ପରିବର୍ତ୍ତିତ ସୂଚନା ପାଇଁ ପ୍ରଶାସନ ଓ ପରିବହନ ବିଭାଗର ଅଧିକାରିକ ଘୋଷଣା ଉପରେ ନଜର ରଖିବା ଜରୁରୀ।


