ସମୀକ୍ଷା ବ୍ୟୁରୋ
ଗତକାଲି ମହାରାଷ୍ଟ୍ର ବିଧାନସଭା ନିର୍ବାଚନ ନେଇ ବିଜ୍ଞପ୍ତି ପ୍ରକାଶ ପାଇଛି । ମହାରାଷ୍ଟ୍ରର ୨୮୮ଟି ଆସନ ପାଇଁ ଅକ୍ଟୋବର ୨୧ରେ ଗୋଟିଏ ପର୍ଯ୍ୟାୟରେ ଭୋଟ ଗ୍ରହଣ ଅନୁଷ୍ଠିତ ହେବ । ଅକ୍ଟୋବର ୨୪ରେ ଭୋଟ୍ ଗଣତି ହେବ ବୋଲି ଘୋଷଣା ହୋଇଛି । ନିର୍ବାଚନରେ ବିଜୟ ଅଭିଯାନ ଜାରି ରଖିବା ପାଇଁ ବିଜେପି ଓ ଶିବସେନା ଏକାଠି ହୋଇ ପୁଣି ଥରେ ମହାରାଷ୍ଟ୍ରରେ ନିର୍ବାଚନ ଲଢ଼ିବେ । ଆସନ ବୁଝାମଣାକୁ ନେଇ ଉଭୟ ଦଳ ମଧ୍ୟରେ ବିବାଦ ଲାଗି ରହିଥିଲେ ମଧ୍ୟ ସଫଳତା ନେଇ ଉଭୟ ଆଶାବାଦୀ ଅଛନ୍ତି । ଅନ୍ୟପକ୍ଷରେ ଲୋକସଭା ନିର୍ବାଚନର ମନୋମାଳିନ୍ୟକୁ ଭୁଲି ଏକାଠି ନିର୍ବାଚନ ଲଢିବାର ନିଷ୍ପତ୍ତି ନେଇଛନ୍ତି କଂଗ୍ରେସ ଏବଂ ଏନ୍ସିପି ।
୨୮୮ ଆସନ ମଧ୍ୟରୁ ୨୦୧୪ ବିଧାନସଭା ନିର୍ବାଚନରେ ବିଜେପି ୧୨୨ ଆସନ ଅକ୍ତିଆର କରିଥିଲା । ସହଯୋଗୀ ଦଳ ଶିବସେନା ୬୩ ଟି ଆସନ ଅକ୍ତିଆର କରିଥିଲା । ମାତ୍ର ଲୋକସଭା ନିର୍ବାଚନରେ ବିଜେପିର ସଫଳତା ପରେ ଆସନ ବୁଝାମଣା ନେଇ ଉଭୟ ଦଳ ମଧ୍ୟରେ ବିବାଦ ଦେଖାଦେଇଛି । ଉଭୟ ଦଳ ମଧ୍ୟରେ ସମାନ ସଂଖ୍ୟକ ଆସନ ବଣ୍ଟନ ନେଇ ଚୁକ୍ତି ହୋଇଥିଲା । ସହଯୋଗୀ ଦଳଙ୍କୁ ୧୮ ଆସନ ପ୍ରଦାନ ପରେ ଉଭୟ ଦଳ ୧୩୫ଟି ଲେଖାଏଁ ଆସନରେ ଲଢିବା ନେଇ ପୂର୍ବରୁ ନିଷ୍ପତ୍ତି ହୋଇଥିଲା । ବିଜେପି ୧୫୦ ଏବଂ ସେନାକୁ ୧୨୦ ଆସନ ନେଇ ବିଜେପି ପକ୍ଷରୁ ପ୍ରସ୍ତାବ ଦିଆଯାଇଥିବା ବେଳେ ମେଣ୍ଟର ଭବିଷ୍ୟତ ନେଇ ଆଶଙ୍କା ପ୍ରକାଶ ପାଇଛି । ସେହିପରି କଂଗ୍ରେସ ୨୦୧୪ ବିଧାନସଭା ନିର୍ବାଚନରେ ୪୨ ଆସନ ହାସଲ କରିଥିବା ବେଳେ ନ୍ୟାସଲାସିଷ୍ଟ କଂଗ୍ରେସ ପାର୍ଟି (ଏନ୍ସିପି) ମାତ୍ର ୪୧ ଆସନ ହାସଲ କରିବାରେ ସକ୍ଷମ ହୋଇଛି । ନିର୍ବାଚନରେ ସମୁଦାୟ ୬୪ ପ୍ରତିଶତ ଭୋଟିଂ ହୋଇଥିଲା । ସମୁଦାୟ ଭୋଟର ୨୭.୮ ପ୍ରତିଶତ ବିଜେପି ଖାତାକୁ ଯାଇଥିବା ବେଳେ ଶିବସେନାକୁ ୧୯.୩ ପ୍ରତିଶତ, କଂଗ୍ରେସକୁ ୧୮ ପ୍ରତିଶତ ଏବଂ ଏନ୍ସିପିକୁ ୧୭.୨ ପ୍ରତିଶତ ଭୋଟ ମିଳିଛି । ୨୦୧୪ ନିର୍ବାଚନରେ କେବଳ ବିଜେପି ଏବଂ ଶିବସେନାର ଭୋଟ ପ୍ରତିଶତ ବଢିଥିବା ବେଳେ କଂଗ୍ରେସ ଏବଂ ଏନ୍ସିପିର ଭୋଟ ଆଶାତୀତ ଭାବରେ ହ୍ରାସ ପାଇଥିଲା ।
ମହାରାଷ୍ଟ୍ରରେ ୨୮୮ ଆସନ ରହିଥିବା ବେଳେ ଆଞ୍ଚଳିକ ଭିନ୍ନତା ଅନୁଯାୟୀ ଏହି ଅଞ୍ଚଳକୁ 6 ଭାଗରେ ବିଭକ୍ତ କରାଯାଇଛି । ପଶ୍ଚିମ ମହାରାଷ୍ଟ୍ର, ବିଦର୍ଭ, ମରାଠାଓ୍ବାଡା, କୋଙ୍କଣ, ମୁମ୍ବାଇ ଏବଂ ଉତ୍ତର ମହାରାଷ୍ଟ୍ର ଭଳି ୬ ଭାଗରେ ମହାରାଷ୍ଟ୍ରକୁ ବିଭକ୍ତ କରାଯାଇଛି । ପଶ୍ଚିମ ମହାରାଷ୍ଟ୍ରରେ ୭୧ ଆସନ ମଧ୍ୟରୁ ବିଜେପିକୁ ୨୪ଟି ଆସନ ମିଳିଥିବା ବେଳେ ଶିବସେନାକୁ ୧୩ଟି ଆସନ, କଂଗ୍ରେସକୁ ୧୦ଟି ଏବଂ ଏନ୍ସିପିକୁ ୧୯ଟି ଆସନ ମିଳିଥିଲା । ବିଦର୍ଭରେ ବିଜେପି ବାଜିମାତ କରିଥିଲା । ସମୁଦାୟ ୬୨ ଆସନରୁ ବିଜେପି ଏକାକୀ ୪୪ ଆସନରେ ବିଜୟୀ ହୋଇଥିବା ବେଳେ ଶିବସେନା ୪ଟି ଆସନ, କଂଗ୍ରେସ ୧୦ ଏବଂ ଏନ୍ସିପିକୁ ଗୋଟିଏ ଆସନ ମିଳିଥିଲା । ମରାଠାଓ୍ବାଡାରେ ସମୁଦାୟ ୪୬ ଆସନରୁ ୧୫ଟିରେ ବିଜେପି ବିଜୟୀ ହୋଇଥିବା ବେଳେ, ସେନାକୁ ୧୧ , କଂଗ୍ରେସକୁ ୯ ଏବଂ ଏନ୍ସିପିକୁ ୮ ଟି ଆସନ ମିଳିଥିଲା । ଉତ୍ତର ମହାରାଷ୍ଟ୍ରରେ ୩୫ ଆସନ ମଧ୍ୟରୁ ବିଜେପି ୧୪ ଆସନରେ ବିଜୟୀ ହୋଇଥିବା ବେଳେ, ଶିବସେନା ଓ କଂଗ୍ରେସ ୭ଟି ଲେଖାଏଁ ଆସନ ଏବଂ ଏନ୍ସିପିକୁ ୫ଟି ଆସନ ମିଳିଥିଲା । ମୁମ୍ବାଇର ୩୬ ଆସନ ମଧ୍ୟରୁ ବିଜେପି ୧୫ ଏବଂ ଶିବସେନାକୁ ୧୪ ଏବଂ କଂଗ୍ରେସକୁ ୫ଆସନ ମିଳିଥିବା ବେଳେ ଏନ୍ସିପି ଖାତା ଖୋଲି ପାରିନଥିଲା । କୋଙ୍କଣ ଇଲାକାରେ ୩୯ ଆସନରୁ ବିଜେପିକୁ ୧୦, ଶିବସେନାକୁ ୧୪, କଂଗ୍ରେସକୁ ୧ ଏବଂ ଏନ୍ସିପିକୁ ୮ଟି ଆସନ ମିଳିଥିଲା ।
ମହାରାଷ୍ଟ୍ରରେ କେବଳ ବସନ୍ତ ରାଓ ନାୟକ କ୍ରମାଗତ ଦୁଇ ଥର ମୁଖ୍ୟମନ୍ତ୍ରୀ ହେବାର ସୌଭାଗ୍ୟ ହାସଲ କରିଥିବା ବେଳେ ଅନ୍ୟ କୌଣସି ମୁଖ୍ୟମନ୍ତ୍ରୀ ଏହି ସୌଭାଗ୍ୟ ହାସଲ କରି ନାହାନ୍ତି । ଦ୍ବିତୀୟ ଥର ମୁଖ୍ୟମନ୍ତ୍ରୀ ଭାବରେ ଫଡନ୍ବିସ୍ଙ୍କ ନିକଟରେ ରେକର୍ଡ କରିବାର ସୁଯୋଗ ରହିଛି । ମହାରାଷ୍ଟ୍ରରେ ସର୍ବଦା ଗୋଟିଏ ସରକାରରେ ଏକାଧିକ ମୁଖ୍ୟମନ୍ତ୍ରୀ ରହିଥିବା ବେଳେ ପ୍ରଥମ ଥର ପାଇଁ ଏକ ସ୍ଥିର ସରକାର ଦେଖିବାକୁ ମିଳିଥିଲା । ପୂର୍ବଥରର ଭୋଟ ପ୍ରତିଶତ ଏବଂ ନିକଟରେ ସମାପିତ ଲୋକସଭା ନିର୍ବାଚନରେ ପ୍ରଦର୍ଶନ ଦେଖିଲେ ଏନ୍ଡିଏ ମେଣ୍ଟ, ସରକାର ଗଠନର ଦୃଢ ଦାବିଦାର। ମାତ୍ର ବର୍ତ୍ତମାନର ମାନ୍ଦାବସ୍ଥା ଏବଂ ଅର୍ଥନୀତିରେ ଅବନତି କାରଣରୁ ବର୍ତ୍ତମାନଠାରୁ କିଛି ପୂର୍ବାନୂମାନ କରି ହେବ ନାହିଁ।
