ରମେଶ ମହାନ୍ତି
ଜଗତସିଂହପୁର: ରାଜ୍ୟ ସରକାର ଯୋଜନା ପରେ ଯୋଜନା କରିଚାଲିଛନ୍ତି। ମାତ୍ର କିଛି ଅସାଧୁ କର୍ମଚାରୀ ଓ ଦୁର୍ନୀତିଖୋର୍ କୁଜିନେତାଙ୍କ ମଧୁଚନ୍ଦ୍ରିକା ଯୋଗୁଁ ଏହି ଯୋଜନା ସାଧାରଣ ଲୋକଙ୍କ ପାଖରେ ଅପହଞ୍ଚ । ଏପରିକି ରାଜ୍ୟରେ “5 ଟି”ର ଡିଣ୍ଡିମ ବାଜୁଥିବା ବେଳେ ତିର୍ତ୍ତୋଲ ବ୍ଲକରେ କିନ୍ତୁ ଏହା ପ୍ରହସନ ପାଲଟିଛି। ଏପରିକି ଲୋକର ମୃତ୍ୟୁ ହେବା ପୂର୍ବରୁ ତାଙ୍କ ନାଁରେ ମିଥ୍ୟାବିଲ୍ କରି ମୃତ୍ୟୁ ସହାୟତା ରାଶିକୁ ମଧ୍ୟ ଖାଇଯାଉଛନ୍ତି। ଏହିପରି ଏକ ଘଟଣା ତିର୍ତ୍ତୋଲ ବ୍ଲକ୍ ଜଡତିରା ପଞ୍ଚାୟତରେ ଦେଖିବାକୁ ମିଳିଛି। ସୂଚନାନୂଯାୟୀ ଉକ୍ତ ପଞ୍ଚାୟତର 2ନଂ ୱାର୍ଡର ବାସିନ୍ଦା ଶେଷଦେବ ନାଥଶର୍ମାଙ୍କର 27.01.2019ରେ ମୃତ୍ୟୁ ହୋଇଥିଲା । ଆଶ୍ଚର୍ଯ୍ୟର କଥା ହେଉଛି ଶେଷଦେବଙ୍କ ମୃତ୍ୟୁର 4 ମାସ ପୂର୍ବରୁ 15.9.2018ରେ ହରିଶ୍ଚନ୍ଦ୍ର ଯୋଜନାରେ ମୃତ୍ୟୁ ସହାୟତା ରାଶି ବାବଦକୁ 2000 ଟଙ୍କା ତାଙ୍କ ବୋହୁ ନାଁରେ ଉଠାଇ ନେଇଛନ୍ତି ବୋଲି ପଂଚାୟତ ଅଫିସରେ ବିଲ୍ ହୋଇଛି । କିନ୍ତୁ ସବୁଠୁ ଆଶ୍ଚର୍ଯ୍ୟର କଥା ମୃତ ଶେଷଦେବଙ୍କର ପୁଅ ବିବାହ କରିନାହାନ୍ତି । ପୁଅ ଅବିବାହିତ ଥିବା ବେଳେ ବୋହୂ କିପରି ମୃତ୍ୟୁର 4 ମାସ ପୂର୍ବରୁ ମୃତ୍ୟୁ ସହାୟତା ରାଶି ନେଲେ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏପରିକି ମୃତ ଶେଷଦେବଙ୍କ ପରିବାର ଲୋକ ଏହି ସହାୟତା ରାଶି ପାଇନାହାଁନ୍ତି ବୋଲି ଜଣାପଡିଛି। ଏଠି ପ୍ରଶ୍ନ ଉଠୁଛି ଶେଷଦେବଙ୍କ ପୁଅ ଯଦି ବିବାହ କରିନାହିଁ ତାହାଲେ ବୋହୁ କେମିତି ସହାୟତା ରାଶି ନେଇଗଲେ ? ପୁଣି 4ମାସ ପୂର୍ବରୁ କିଏ ଦେଲେ ଓ କେମିତି ପଂଚାୟତ ଅଫିସରେ ଏନେଇ ବିଲ୍ ହେଲା ଏହା ତଦନ୍ତ ସାପେକ୍ଷ ବୋଲି ସାଧାରଣରେ ଦାବୀ ହେଉଛି। ଏହି ଦୁର୍ନୀତି ଘଟଣାର ପର୍ଦ୍ଦାଫାସ୍ କରିଛନ୍ତି ଉକ୍ତ ପଂଚାୟତର ଜନୈକ ଯୁବକ। ସୂଚନାଧିକାର ଆଇନ ବଳରେ ତଥ୍ୟ ପାଇବା ପରେ ଏପରି ଏକ ଦୁର୍ନୀତି ହୋଇଛି ବୋଲି ଜଣାପଡିଥିଲା। ଏହି ଦୁର୍ନୀତି ଘଟଣା ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ହରିଶ୍ଚନ୍ଦ୍ର ଯୋଜନାରେ ମୃତ୍ୟୁକାଳିନ ସହାୟତା ରାଶି ବାବଦକୁ ଅନେକ ଲୋକଙ୍କ ନାମରେ ଜାଲିଆତି କରାଯାଇ ଅର୍ଥ ହଡପ କରାଯାଇଥିବା କୁହାଯାଉଛି। ତଦନ୍ତ କରାଗଲେ ଉକ୍ତ ପଂଚାୟତର ଏହିପରି ଅନେକ ଦୁର୍ନୀତି ପର୍ଦ୍ଦାଫାସ୍ ହୋଇପାରିବା ସହିତ ଏହାର ଚେର କେଉଁଯାଏ ଲମ୍ବିଛି ଜଣାପଡନ୍ତା ବୋଲି ଚର୍ଚ୍ଚା ହେଉଛି।
