ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର/ବେଗୁନିଆପଡା : ଖଲିକୋଟ ଫରେଷ୍ଟ ରେଞ୍ଜ ଅନ୍ତର୍ଗତ ବେଲଝରୀଠାରେ ଦୀର୍ଘ ଦିନ ଧରି ଚାଲିଥିବା ଏକ ବେଆଇନ ସ’ ମିଲ୍କୁ ଆଜି ବନବିଭାଗ ପକ୍ଷରୁ ଚଢ଼ାଉ କରି ସିଲ୍ କରାଯାଇଛି । ଏହା ସହ ସ’ ମିଲ୍ରୁ ଲକ୍ଷାଧିକ ଟଙ୍କାର କାଠ ଓ କାଠକଟା ମେସିନ୍ ଜବତ ହୋଇଛି । ଘଟଣାରୁ ପ୍ରକାଶ ଯେ ଏହି ସ’ ମିଲ୍ରେ ବହୁଦିନ ହେଲା ବେଆଇନ ଭାବେ କାଠକଟା ଯାଉଥିବା ନେଇ ଅଭିଯୋଗ ହେବା ସହ ବିଭିନ୍ନ ଖବରକାଗଜରେ ମଧ୍ୟ ଖବର ପ୍ରକାଶିତ ହୋଇଥିଲା । ଯାହାଫଳରେ ବ୍ରହ୍ମପୁର ଡ଼ିଏଫ୍ଓ ଅମ୍ଳାନ ନାୟକ ଚଢ଼ାଉ କରିବା ପାଇଁ ନିର୍ଦ୍ଦେଶ ଦେଇଥିଲେ ।
ଚଢ଼ାଉରେ ବ୍ରହ୍ମପୁର ମୋବାଇଲ୍ ଷ୍ଟାଫ୍ ବ୍ରହ୍ମପୁର ଏସିଏଫ୍ ଅଶୋକ ବେହେରା, ଏସିଏଫ୍ ମାଧବୀଲତା, ପୋଲିସ୍ ଫୋର୍ସ ରେଞ୍ଜର ଦିଲିପ ମାର୍ଥାଙ୍କ ସହ ଦିଗପହଣ୍ଡି ଏବଂ ପୋଲସରା ରେଞ୍ଜ ଅଫିସର ଏବଂ କର୍ମଚାରୀମାନେ ଯୋଗ ଦେଇଥିଲେ । କରତ କଳର ସମସ୍ତ ଯନ୍ତ୍ରାଶ ଜେନେରେଟର, ମୋଟର, ୱିଲ୍ ସହ ୫୦ ଘନଫୁଟରୁ ଅଧିକ କାଠଗଣ୍ଡି ଜବତ କରିଛନ୍ତି । କାଠଗୁଡ଼ିକୁ ହେଡ଼୍ ଅଫିସ ଅଣାଯାଇଛି । ଜବତ କାଠର ମୂଲ୍ୟ ପ୍ରାୟ ୪ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି ।