ନୂଆଦିଲ୍ଲୀ, ଆଗାମୀ ଦୁଇ ସପ୍ତାହ ଯାଏଁ ଦେଶର 6ଟି ଘରୋଇ ବିମାନ ବନ୍ଦରରୁ କୋଲକାତାକୁ କୌଣସି ବିମାନ ଚଳାଚଳ କରିବ ନାହିଁ । ଭାରତୀୟ ବିମାନବନ୍ଦର ପ୍ରାଧୀକରଣ ପରିଚାଳିତ କୋଲକାତା ଏୟାରପୋର୍ଟ ପକ୍ଷରୁ ଏହା କୁହାଯାଇଛି । ଆସନ୍ତା ସୋମବାର ଜୁଲାଇ 6ରୁ 19 ତାରିଖ ଯାଏଁ ଏସବୁ ସ୍ଥାନରୁ କୋଲକାତାକୁ ବିମାନ ସେବା ବାତିଲ କରି ଦିଆଯାଇଛି। ଏହିସବୁ ସ୍ଥାନ ହେଲା ଦିଲ୍ଲୀ, ମୁମ୍ବାଇ,ପୁଣେ,ନାଗପୁର,ଚେନ୍ନାଇ ଓ ଅହମ୍ମଦାବାଦ ।
ଜୁଲାଇ 19 କିମ୍ବା ପରବର୍ତ୍ତୀ ଆଦେଶ ଯାଏଁ ବିମାନ ସେବା ବନ୍ଦ ରହିବ ବୋଲି କୋଲକାତା ଏୟାରପୋର୍ଟ ପକ୍ଷରୁ ଏକ ଟୁଇଟରେ କୁହାଯାଇଛି । କୋଭିଡ-19 ସଂକ୍ରମଣ ରୋକିବା ପାଇଁ ରାଜ୍ୟ ସରକାରଙ୍କ ଅନୁରୋଧକୁ ରକ୍ଷା କରି କରୋନା ବ୍ୟାପୁଥିବା ପ୍ରମୁଖ ମହାନଗରୀରୁ କୋଲକାତାକୁ ବିମାନ ଚଳାଚଳ ବାତିଲ କରିବାକୁ ଏହି ନିଷ୍ପତ୍ତି ନିଆଯାଇଛି । (ଏଜେନସି)
