ଭୋପାଳ : ମଧ୍ୟପ୍ରଦେଶର ବୈତୁଲ୍ ଅଞ୍ଚଳରୁ ଏକ ଆଶ୍ଚର୍ଯ୍ୟଜନକ ଘଟଣା ଦେଖିବାକୁ ମିଳିଛି । ଏଠାରେ ଜଣେ ଯୁବକ ଦୁଇ ଯୁବତୀଙ୍କୁ ବିବାହ କରୁଥିବାର ସୁଚନା ରହିଛି । ବିବାହ ମଣ୍ଡପରେ ଜଣେ ବର ଦୁଇ କନ୍ୟାଙ୍କ ସହ ବିବାହ କରିଛନ୍ତି । ଏହି ବିବାହ ର ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ୍ ହୋଇଛି । ଏହି ଭିଡିଓରେ ଜଣେ ବର ଦୁଇ କନ୍ୟାଙ୍କ ସହିତ ସାତ ଫେରା ନେଉଥିବାର ନଜର ରହିଛି । ତେବେ ସବୁଠୁ ଆଶ୍ଚର୍ଯ୍ୟର କଥା ହେଉଛି ଯୁବକ ଜଣକ ଏହି ଦୁଇ କନ୍ୟାଙ୍କ ମଧ୍ୟରୁ ଜଣକ ପ୍ରେମ ବିବାହ କରୁଥିବାବେଳେ ଅନ୍ୟ ଜଣଙ୍କୁ ଆରେଞ୍ଜଡ୍ ବିବାହ କରୁଛନ୍ତି ।
ବୈତୁଲ୍ ଅଞ୍ଚଳର ଘୋଡାଡୋଙ୍ଗରୀ ତହସିଲ ଅନ୍ତର୍ଗତ ସଲେୟା ଗ୍ରାମରେ ଏପରି ଏକ ଘଟଣା ଦେଖିବାକୁ ମିଳିଛି । ମିଳିଥିବା ସୂଚନା ଅନୁସାରେ ଜୁ୍ନ୍ 29 ତାରିଖରେ ଯୁବକ ଜଣକ ଏକ ମଣ୍ଡପରେ ଦୁଇ କନ୍ୟାଙ୍କ ସହ ବିବାହ କରିଛନ୍ତି । ଏହି ବିବାହରେ ବର ଓ କନ୍ୟାଙ୍କ ପରିବାର ସଦସ୍ୟଙ୍କ ସମେତ ଗ୍ରାମର କିଛି ଲୋକ ମଧ୍ୟ ସାମିଲ୍ ରହିଥିଲେ । ପ୍ରଥମଥର ପାଇଁ ଜଣେ ଯୁବକ ଏକ ସମୟରେ ଦୁଇ ଯୁବତୀଙ୍କୁ ବିବାହ କରୁଥିବାର ଦେଖାଯାଇଛି ।
ବର ସହିତ ପ୍ରଥେମ ଏକ କନ୍ୟା ବିଧି ପୂରଣ କରିବା ପରେ ଅନ୍ୟ ଏକ କନ୍ୟା ସହ ମଧ୍ୟ ବିବାହ ବିଧି ଅନୁଷ୍ଠିତ ହୋଇଥିଲା । ଏହି ଗ୍ରାମର ଆଦିବାସୀ ଯୁବକ ସନ୍ଦୀପ ହୋଶଙ୍ଗାବାଦ ଜିଲ୍ଲାର ଜଣେ ଯୁବତୀ ସୁନନ୍ଦା ଓ ଘୋଡାଡୋଙ୍ଗରୀ ତହସିଲର କାୟଲୋରୀ ଗ୍ରାମର ଅନ୍ୟ ଏକ ଯୁବତୀ ଶଶିକଳାଙ୍କ ସହିତ ବିବାହ କରିଛନ୍ତି ।
ଯୁବକ ଜଣକ ଭୋପାଳରେ ଆଇଆଇଟି ପଢୁଥିବାବେଳେ ହୋଶଙ୍ଗବାଦ ଜିଲ୍ଲାର ଜଣେ ଯୁବତୀ ସୁନନ୍ଦାଙ୍କ ସହ ତାଙ୍କର ବନ୍ଧୁତା ହୋଇଥିଲା । ଏହା ପରେ ଯୁବକଙ୍କ ଘର ଲୋକେ କାୟୋଲରୀ ଗ୍ରାମର ଜଣେ ଯୁବତୀଙ୍କ ସହିତ ଯୁବକଙ୍କ ବିବାହ ସ୍ଥିର କରିଦେଇଥିଲେ । ଏହାପରେ ବିବାହକୁ ନେଇ ବହୁ ବିବାଦ ସୃଷ୍ଟି ହୋଇଥିଲା । ଏହାପରେ ବର ଓ ବଧୂଙ୍କ ତିନି ପରିବାର ଓ ବରିଷ୍ଠ ସଦସ୍ୟଙ୍କ ନିଷ୍ପତ୍ତି କ୍ରମେ ଯୁବକ ଜଣ ଦୁହିଁଙ୍କ ବିବାହ କରିବା ପାଇଁ ନିର୍ଣ୍ଣୟ କରାଗଲା । ତେବେ ଏହି ବିବାହ ଭିଡିଓ ସାମ୍ନାକୁ ଆସିବା ପରେ ସ୍ଥାନୀୟ ପ୍ରଶାସନ ଏହି ଘଟଣାର ଯାଞ୍ଚ ଆରମ୍ଭ କରିଛି ।
ଘୋଡାଡୋଙ୍ଗରୀ ତହସିଲଦାର କହିଛନ୍ତି ଯେ, ଜଣେ ଯୁବକ ଏକା ସାଙ୍ଗରେ ଦୁଇ ଯୁବତୀଙ୍କ ବିବାହ କରିବା ଏକ ଗୁରୁତର ମାମଲା ଅଟେ । ସେ ଏନେଇ ଯୁବକ ଓ ଯୁବତୀଙ୍କ ପରିବାର ସହ ଆଲୋଚନା କରିବେ ଏବଂ ଏହି ମାମଲାକୁନେଇ ପୋଲିସ୍କୁ ପତ୍ର ଲେଖି ଅବଗତ କରାଇବେ । ପୋଲିସ୍ ଏହି ମାମଲାର ଯାଞ୍ଚ କରିବ । (ଏଜେନ୍ସି)
