ରାୟଗଡା : କରୋନା ପାଇଁ ମଣିଷ ନିଜର ମାନବିକତାକୁ ଭୁଲିଯାଇଛି । ଏପରିକି ତା’ ଭିତରେ ଦୟା, ଉଦାରତା ପରି ଭାବନାଗୁଡିକ ମଧ୍ୟ ଉଭେଇ ଗଲାଣି । କରୋନା ଏବେ ଆମକୁ ଅସଭ୍ୟ ଓ ଅଶିକ୍ଷିତ କରି ସାରିଲାଣି । କରୋନାକୁ ଭୟ କରିବା ସହିତ ଆମେ ଲୋକଙ୍କୁ ଘୃଣା କରିବା ଆରମ୍ଭ କଲେଣି । କରୋନା ଯୋଗୁଁ ଆମ ସଭ୍ୟ ଶିକ୍ଷିତ ସମାଜ ନିମ୍ନଗାମୀ ହୋଇପଡିଛି । କରୋନା ଯୋଗୁଁ ଆମ ଭିତରେ ସୃଷ୍ଟି ହୋଇଥିବା ଅମାନବିକତା ଆମକୁ ଦିନକୁ ଦିନ ତଳକୁ ନେଉଥିବାବେଳେ ଆମେ ଏହାକୁ ଅଣଦେଖା କରି ଚାଲିଛୁ । କରୋନା ପରିସ୍ଥିତିରେ ଏକ ଅମାନବୀୟ ଘଟଣା ରାୟଗଡା ଜିଲ୍ଲାରୁ ନଜରକୁ ଆସିଛି । ରୋଗଙ୍କୁ ଘୃଣା କରିବା ଦରକାର, ରୋଗୀକୁ ନୁହେଁ । ଏଠି କିନ୍ତୁ ପରିସ୍ଥିତି ଓଲଟା ହେଉଛି । ରୋଗୀ, କି ରୋଗ ନୁହେଁ ବରଂ ପ୍ରଭାବିତ ଅଞ୍ଚଳକୁ ଯାଇଥିବା ନିଜର ଲୋକଙ୍କୁ ଏଠାରେ ଘୃଣା ସହିତ ଦୁର୍ବ୍ୟବହାର କରାଯାଉଛି । ଏଠାରେ କରୋନା ପ୍ରବଣ ଅଞ୍ଚଳରୁ ଫେରିଥିବାରୁ ଦୁଇ ଗ୍ରାମାବାସୀଙ୍କ ପ୍ରବେଶକୁ ଗାଁ ଲୋକେ ବାରଣ କରିଛନ୍ତି । ଗାଁ ମୁଣ୍ଡ ବସ୍ ଷ୍ଟପେଜ୍ର ରେଷ୍ଟ ସେଡ୍ରେ ପଡି ରହିଛନ୍ତି ଦୁଇ ଗ୍ରାମବାସୀ । ଗାଁର ଜଣେ ଅନାଥ ପିଲାଙ୍କୁ ଚିକିତ୍ସା ପାଇଁ ନେଇଥିଲେ ଅନ୍ୟ ଜଣେ ଗ୍ରାମବାସୀ । ଚିକିତ୍ସା ପାଇଁ ଗ୍ରାମବାସୀ ଗାଁରୁ ରାୟଗଡା, ଭୁବନେଶ୍ବର ଓ କଟକ ଯାଇ ଫେରିଥିବା ଯୋଗୁଁ ତାଙ୍କ ପ୍ରବେଶ କରାଇ ଦେଉନାହାନ୍ତି ଗ୍ରାମବାସୀ ।
ସାଧାରଣତଃ ଗ୍ରାମମାନଙ୍କରେ ଭାଇଚାରା ଓ ସାହାଯ୍ୟପଣ ଅଧିକ ଦେଖିବାକୁ ମିଳିଥାଏ । କାହାର କିଛି ହେଲେ ଗ୍ରାମବାସୀମାନେ ସାଙ୍ଗରେ ଠିଆ ହୋଇଥାନ୍ତି । କିନ୍ତୁ କରୋନା ଏବେ ଏହି ସରଳ ଗ୍ରାମବାସୀଙ୍କ ମନରେ ମଧ୍ୟ ନକାରତ୍ମକତା ଭରି ଦେଇଛି । ଯେଉଁ ଗ୍ରାମବାସୀମାନେ ଟିକିଏ କିଛି ହେଲେ ଦଉଡି ଆସୁଥିଲେ ଏବେ ସେହି ଗ୍ରାମବାସୀମାନେ ସହରରୁ ଫେରୁଥିବା ଯୋଗୁଁ ନାକ ଟେକିବା ଯୋଗୁଁ ଗାଁ ଦାଣ୍ଡରେ ପ୍ରବେଶ କରାଇ ଦେଉନାହାନ୍ତି ।
