ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଚଳିତବର୍ଷର ଆଇପିଏଲ୍ ନିଜର ଶେଷ ପର୍ଯ୍ୟାୟରେ ପହଞ୍ଚିଥିବାବେଳେ ଆଇପିଏଲ୍ ବେଟିଂ ମଧ୍ୟ ଆଶାତୀତ ଭାବେ ବୃଦ୍ଧି ପାଉଛି। କୋଟି କୋଟି ଟଙ୍କାର କାରବାରରେ କିଛିବ୍ୟକ୍ତି ମଧ୍ୟସ୍ଥି ସାଜି ନିଜକୁ କୋଟିପତି କରୁଥିବାବେଳେ ନିରୀହ ଛାତ୍ର, ଯୁବକ ଟଙ୍କା ହାରି ସ୍ୱର୍ବସ୍ୱାନ୍ତ ହୋଇ ଆତ୍ମହତ୍ୟା କରିବାକୁ ବାଧ୍ୟ ହେଉଛନ୍ତି। ବ୍ରହ୍ମପୁର ସହରରେ ଗତ କିଛିଦିନ ହେଲା ଆଇପିଏଲ୍ ବେଟିଂ ଆଶାତୀତ ଭାବେ ବୃଦ୍ଧି ପାଇବାକୁ ଲାଗିଥିଲା।
ଏନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ବ୍ରହ୍ମପୁର ଏସ୍ପି ପିନାକ ମିଶ୍ର ତତ୍ପର ହୋଇ ଖୋଦ୍ ନିଜେ ଏହି ମାମଲାରେ ଅନୁସନ୍ଧାନ ଜାରି ରଖିଛନ୍ତି। ତେବେ ଦକ୍ଷିଣ ଓଡ଼ିଶା ତଥା ରାଜ୍ୟର ସବୁଠାରୁ ବଡ଼ ତଥା ଆଇପିଏଲ୍ ବେଟିଂର ବେତାଜ ବାଦଶାହା ବ୍ରହ୍ମପୁର ଅଂଚଳ ଜନୈକ କିଙ୍ଗପିନ୍କୁ ବ୍ରହ୍ମପୁର ପୋଲିସ୍ ଅଟକ ରଖିଥିବା ଜଣାପଡ଼ିଛି। କିଙ୍ଗପନ ସହ ତା’ର ୪ ରୁ ୫ ସହଯୋଗୀକୁ ପୋଲିସ୍ ଅଟକ ରଖିଛି। ତେବେ କିଙ୍ଗପିନ୍ର ସହଯୋଗୀ ଏବଂ ଅନ୍ୟାନ୍ୟ ବ୍ୟକ୍ତିବିଶେଷଙ୍କୁ ଖୋଜା ଚାଲିଛି। ବୁଧବାର ଦିନରୁ ଏହି ଧରପଗଡ଼ ଚାଲିଥିବାବେଳେ କିଏ କିଏ ଏଥିରେ ସଂପୃକ୍ତ ଅଛି ଏନେଇ ପୋଲିସ୍ ପକ୍ଷରୁ କୌଣସି ତଥ୍ୟ ମିଳିନାହିଁ। ବିପୁଳ ପରିମାଣରେ ଟଙ୍କା ଏବଂ ଅନ୍ୟାନ୍ୟ ସାମଗ୍ରୀ ପୋଲିସ୍ ଜବତ କରିଛି।
ପୋଲିସ୍ କିଙ୍ଗପିନ୍ର ଘର ସହିତ ଅନ୍ୟାନ୍ୟ ସ୍ଥାନରେ ଚଢ଼ାଉ କରିଥିବାବେଳେ ଗୋଷାଣିନୂଆଗାଁ ଥାନା ଏହି ମାମଲାରେ ପ୍ରତ୍ୟକ୍ଷ ଅଂଶଗ୍ରହଣ କରିଛି। ସହରର ବଡ଼ବଡ଼ ବ୍ୟବସାୟୀ, ପ୍ରତିଷ୍ଠିତ ଲୋକେ ମଧ୍ୟ ଏହି ସଟ୍ଟାବାଜିରେ ସାମିଲ ଥିବା ସଂଦେହ କରାଯାଉଛି। ସଟ୍ଟାବାଜିମାନେ ସହରର ବଡ଼ ବଡ଼ ହୋଟେଲ୍, ଭଡ଼ାଘରେ ରହି ବେଟିଂକୁ ପରିଚାଳନା କରୁଛନ୍ତି। କମିଶନ ବାବଦରେ ଏମାନେ କୋଟି କୋଟି ଟଙ୍କା ପାଉଥିବା ଜଣାପଡ଼ିଛି। କିଙ୍ଗପିନ୍ର ମାସକୁ କମିଶନର ବାବଦରେ କୋଟିଏ ଟଙ୍କାରୁ ଅଧିକ ଆଦାୟ ହେଉଥିବା ଜାଣିବାକୁ ମିଳିଛି। ତେବେ ବହୁବର୍ଷ ହେଲା ଏହି କିଙ୍ଗପିନ୍ ନିଜର ସାମ୍ରାଜ୍ୟ ବିସ୍ତାର କରିଥିବାବେଳେ କିଭଳି ପୋଲିସ୍ର କବ୍ଜାକୁ ଆସୁନଥିବା ସେ ନେଇ ସହରରେ ବୁଦ୍ଧିଜୀବୀ ଚର୍ଚ୍ଚା କରୁଛନ୍ତି।
କରୋନା ସମୟରେ ଲୋକଙ୍କ ପାଖରେ ଟଙ୍କାର ଅଭାବ ଥିବାବେଳେ କିଛି ଯୁବକ, ଛାତ୍ର ଏଥିରେ ମାତି ନିଜର ସ୍ୱର୍ବସ୍ୱ ହରାଉଛନ୍ତି। ଗଂଜାମ ଜିଲ୍ଲାରେ କେବଳ ବ୍ରହ୍ମପୁର ନୁହେଁ ପ୍ରତି ବ୍ଲକ୍ରେ ବିଶେଷ କରି ସାନଖେମୁଣ୍ଡି, ଦିଗପହଣ୍ଡି ଅଂଚଳରେ ବ୍ୟାପକ ଭାବେ ହେଉଥିବା ଜଣାପଡ଼ିଛି। ତଳ ଦିନେ ଏହି ଅଂଚଳର କିଛି ଯୁବକଙ୍କୁ ମଧ୍ୟ ଗିରଫ କରାଯାଇଛି। ତେବେ ଡ଼େରିରେ ହେଲେ ମଧ୍ୟ ବ୍ରହ୍ମପୁର ଏସ୍ପିଙ୍କ ଏହି ତତ୍ପରତାକୁ ସହରବାସୀ ସ୍ୱାଗତ କରିଛନ୍ତି। ରିପୋର୍ଟ ଲେଖାହେବା ସୁଦ୍ଧା ପୋଲିସ୍ ପକ୍ଷରୁ କୌଣସି ସୂଚନା ମିଳିନାହିଁ।