ପାଟନା, ଆଜି ବିହାରରେ ଏନଡିଏ ବୈଠକ ସରିବା ପରେ ଆସିଛି ଏକ ଚାଞ୍ଚଲ୍ୟକର ତଥ୍ୟ। ଏହି ତଥ୍ୟ ବର୍ତ୍ତମାନ ରାଜ୍ୟ ରାଜନୀତିକୁ ହଲଚଲ କରିଦେଇଛି। ଏହି ବୈଠକରେ ନୀତିଶଙ୍କୁ ବିଧାୟକ ଦଳର ନେତା ଭାବେ ମନୋନିତ କରିବା ପୂର୍ବରୁ ସେ ଏକ ଅନୁରୋଧ କରିଥିଲେ। ତାହା ହେଲା କି ସେ ଏଥର ମୁଖ୍ୟମନ୍ତ୍ରୀ ଭାବ ଶପଥ ନେବାକୁ ଚାହୁଁ ନାହିଁନ୍ତି। ଏ କଥା କହିବା ପରେ ବୈଠକରେ ସମସ୍ତେ ସ୍ତବ୍ଧ ହୋଇଯାଇଥିଲେ।
ନୀତିଶ କହିଥିଲେ ଯେ ଏହି ନିର୍ବାଚନରେ ଆମର ମେଣ୍ଟ ମଧ୍ୟରେ ବିଜେପି ସର୍ବାଧିକ ଭୋଟ ପାଇଛି। ଜେଡିୟୁ ଦ୍ବୀତିୟ ଦଳ ଭାବେ ରହିଛି। ତେଣୁ ନିୟମ ଅନୁସାରେ ଏଥର ସର୍ବାଧିକ ଭୋଟ ପାଇଥିବା ବିଜେପି ତରଫରୁ କେହି ଜଣେ ମୁଖ୍ୟମନ୍ତ୍ରୀ ହୁଅନ୍ତୁ। ହଠାତ ନୀତିଶଙ୍କର ଏପରି ଭାଷଣ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା।
ହେଲେ ସମସ୍ତେ କହିଥିଲେ ଯେ, ନିର୍ବାଚନ ପୂର୍ବରୁ ଆପଣଙ୍କୁ ମୁଖ୍ୟମନ୍ତ୍ରୀ କରାଯିବ ବୋଲି ଘୋଷଣା କରାଯାଇଥିଲା। ସେହି ଅନୁସାରେ ଲୋକେ ଭୋଟ ଦେଇଛନ୍ତି। ତେଣୁ ଲୋକଙ୍କୁ ଠକିବା ଠିକ୍ ହେବ ନାହିଁ ବୋଲି ବିଜେପି ବିଧାୟକମାନେ କହିଥିଲେ। ବିଜେପିର ବିଧାୟକମାନେ ତାଙ୍କୁ ଅନୁରୋଧ କରିବା ପରେ ସେ ମୁଖ୍ୟମନ୍ତ୍ରୀ ହେବା ପାଇଁ ରାଜି ହେଲେ ବୋଲି ଜଣେ ବିଜେପି ବିଧାୟକ କହିଛନ୍ତି।
ବିହାର ନିର୍ବାଚନରେ ଏଥର ବିଜେପି 74 ଟି ଆସନ ପାଇଥିବା ବେଳେ ନୀତିଶଙ୍କ ଜେଡିୟୁ ହାସଲ କରିଛି ମାତ୍ର 43 ଟି ଆସନ। ସେତେବେଳେ ଏହି ଫଳାଫଳ ଆସିବା ପରେ ନୀତିଶ ସାମ୍ବାଦିକଙ୍କୁ କହିଥିଲେ ଯେ, ବିହାରର ପରବର୍ତ୍ତି ମୁଖ୍ୟମନ୍ତ୍ର କିଏ ହେବ ତାହା ବିଜେପି ସ୍ଥିର କରିବ। ସେତେବେଳେ ତାହାର ଅର୍ଥ ଠିକ ଭାବେ ଅନୁମାନ କରାଯାଇ ପାରୁ ନ ଥିଲା। ହେଲେ ଆଜିର ଏନଡିଏ ବୈଠକ ପରେ ଏହା ଜଣାପଡିଥିଲାଯେ ନୀତିଶଙ୍କ ଦଳ କମ ଆସନ ହାସଲ କରିଥିବାରୁ ସେ ସେପରି କହିଥିଲେ।