ମିନ୍ସକ: ବେଲାରୁଷ ରାଷ୍ଟ୍ରପତି ଆଲେକଜାଣ୍ଡର ଲାକାଶୋକେ ନିକଟରେ ତାଙ୍କ ପଦ ଛାଡି ପାରନ୍ତି ବୋଲି ସଙ୍କେତ ଦେଇଛନ୍ତି । ସେ ଗତ 26 ବର୍ଷ ହେବ ବେଲାରୁଷର ଶାସନ ଭାର ସମ୍ଭାଳିଛନ୍ତି । ସେ ୟୁରୋପର ଶେଷ ଶାସକ ବୋଲି କୁହାଯାଏ । ଅଗଷ୍ଟ 9ରେ ହୋଇଥିବା ନିର୍ବାଚନରେ ଲୁକାଶୋକେ ବିବାଦୀୟ ବିଜୟଲାଭ କରିଥିଲେ । ଏହାପରେ ଏହାର ବିରୋଧ କରି ଜନତା ରାସ୍ତାକୁ ଓହ୍ଲାଇଥିଲେ । ପ୍ରାୟତଃ ପ୍ରତିଦିନ ରାଜଧାନୀ ମିନ୍ସକ ସହିତ ବିଭିନ୍ନ ସହରରେ ତାଙ୍କ ବିରୋଧରେ ପ୍ରଦର୍ଶନ ଜାରି ରହିଛି। 66 ବର୍ଷୀୟ ଲୁକାଶୋକେ ରାଷ୍ଟ୍ରପତି ପଦର ଭୂମିକାକୁ ଦୁର୍ବଳ କରିବାକୁ ଦେଶର ସମ୍ବିଧାନରେ ସୁଧାର ଆଣିବା ଜରୁରୀ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଏହା ବ୍ୟକ୍ତିଗତ ଭାବେ ତାଙ୍କ ପାଇଁ ନୁହେଁ । କାରଣ ନୂଆ ବ୍ୟବସ୍ଥା ଅନୁଯାୟୀ ସେ ରାଷ୍ଟ୍ରପତି ପଦରେ ନ ରହି ପାରନ୍ତି । ତେବେ ସେ କେବେ ରାଷ୍ଟ୍ରପତି ପଦ ଛାଡୁଛନ୍ତି ତାହା ସ୍ପଷ୍ଟ କରି ନାହାନ୍ତି ।
ବିବାଦୀୟ ପରିସ୍ଥିତି ଓ କାର୍ଯ୍ୟାନୁଷ୍ଠାନ ଡରରେ ରାଷ୍ଟ୍ରପତି ଲୁକାଶୋକେଙ୍କ ବିରୋଧରେ ନିର୍ବାଚନରେ ଲଢୁଥିବା ବିରୋଧୀ ନେତା ଶ୍ବେତଲାନା ତିଖାନାସ୍ବୋନା ଦେଶ ଛାଡି ଲିଥୁଓନିଆ ଚାଲିଯାଇଥିବାର ସୂଚନା ରହିଛି । ତେବେ ନିର୍ବାଚନରେ ପରାଜୟ ପରେ ଶ୍ବେତଲାନା କହିଛନ୍ତି ଯେ, ସେ ନିର୍ବାଚନ ହାରିଛନ୍ତି, କିନ୍ତୁ ସାହସ ହାରିନାହାନ୍ତି ।
ରାଷ୍ଟ୍ରପତି ଲୁକାଶୋକେ 1994 ମସିହାରେ ପ୍ରଥମଥର ପାଇଁ ନିର୍ବାଚନ ଜିତିଥିଲେ । ସେତେବେଳେ ଶ୍ବେତଲାନା 9 ବର୍ଷର ହୋଇଥିଲେ । ଏବେ 37 ବର୍ଷୀୟ ଶ୍ବେତଲାନା ଲୁକାଶୋକଙ୍କୁ କ୍ଷମତା ଚ୍ୟାଲେଞ୍ଜ କରିଥିଲେ । ଏହି କ୍ଷମତା ଲଢେଇରେ ଲୁକାଶୋକେ 80.23 ପ୍ରତିଶତ ଭୋଟ୍ ପାଇଥିବାବେଳେ ଶ୍ବେତଲାନା 9.9 ପ୍ରତିଶତ ଭୋଟ ପାଇଥିଲେ । (ଏଜେନ୍ସି)
