ପ୍ରୟାଗରାଜ : କୁହାଯାଏ, ବିବାହ ସ୍ବର୍ଗରେ ସ୍ଥିର ହୋଇଥାଏ, ଏଠାରେ ମିଳନ ହୋଇଥାଏ । ବିବାହ ସାତ ଜନ୍ମର ସମ୍ପର୍କ । 2006ରେ ସୂରଜ ବଡଜାତ୍ୟାଙ୍କ ଲୋକପ୍ରିୟ ଫିଲ୍ମ ’ବିବାହ’ ପରି ଅସଲ ବିବାହ ଅନୁଷ୍ଠିତ ହୋଇଛି । ଏହି ଫିଲ୍ମର କଥାବସ୍ତୁ ଅନୁଯାୟୀ ଅଭିନେତ୍ରୀ ଅମୃତା ରାଓ ବିବାହର କିଛି ଘଣ୍ଟା ପୂର୍ବରୁ ନିଜ ଭଉଣୀକୁ ରକ୍ଷା କରିବାକୁ ଯାଇ ଜଳି ଯାଇଛନ୍ତି । ମାତ୍ର ଶାହିଦ୍ କପୁର୍ ତାଙ୍କୁ ବିବାହ କରିଛନ୍ତି । ଠିକ୍ ଏହିପରି ଏକ ସମାନ କାହାଣୀ ଆଜି ବାସ୍ତବ ରୂପ ନେଇଛି । ଉତ୍ତରପ୍ରଦେଶର ପ୍ରୟାଗରାଜଠାରେ ବାସ୍ତରେ ଏପରି ଏକ ଘଟଣା ଦେଖିବାକୁ ମିଳିଛି ।
ସଙ୍ଗମ ନଗରୀ ପ୍ରୟାଗରାଜଠାରେ ଜଣେ ହାତରେ ମେହେନ୍ଦୀ ପିନ୍ଧି ନବବଧୂ ହସ୍ପିଟାଲ ବେଡ୍ରେ ପଡି ରହିଥିବାବେଳେ ତାଙ୍କ ପାଖରେ ତାଙ୍କ ସ୍ବାମୀ ବସି ତାଙ୍କର ଦେଖାରେଖା କରୁଛନ୍ତି ।
ମିଳିଥିବା ସୂଚନା ଅନୁସାରେ ପ୍ରତାପଗଡର କୁଣ୍ଡା ଅଞ୍ଚଳର ରହୁଥିବା ଆରତୀ ନାମ୍ନୀ ଯୁବତୀଙ୍କର ବିବାହ ପ୍ରସ୍ତୁତି ଶେଷ ପର୍ଯ୍ୟାୟରେ ଥିଲା । ଡିସେମ୍ବର 8 ତାରିଖ ସନ୍ଧ୍ୟାରେ ବରଯାତ୍ରୀ ଆସିବାର ଥିଲା । ମାତ୍ର ଦ୍ବିପ୍ରହର ସମୟରେ ଯୁବତୀ ଜଣକ ଛାତ ଉପରେ ଖେଳୁଥିବା ତିନି ବର୍ଷର ପୁତୁରାକୁ ବଞ୍ଚାଇବା ଚକ୍କରରେ ଯୁବତୀ ଜଣକ ଛାତରୁ ତଳେ ପଡିଯାଇଥିଲେ । ଏହି ଦୁର୍ଘଟଣାରେ ତାଙ୍କ ମେରୁଦଣ୍ଡ ହାଡ ଭାଙ୍ଗିଯାଇଥିଲା ଏବଂ ତାଙ୍କ ଦୁଇଗୋଡ ନିଷ୍କ୍ରିୟ ହୋଇଯାଇଥିଲା । ଘର ଲୋକେ ତାଙ୍କୁ ତୁରନ୍ତ ପ୍ରୟାଗରାଜର ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ ।
ଏହି ଘଟଣା ବର ଅବଧେଶଙ୍କୁ ଜଣାଇଦିଆଗଲା । ଏହାପରେ ଆରତୀଙ୍କ ଘର ଲୋକେ ଅବଧେଶଙ୍କୁ ଆରତୀଙ୍କର ଛୋଟ ଭଉଣୀ ସହ ବିବାହ ପାଇଁ କହିଥିଲେ । କିନ୍ତୁ ଅବଧେଶ ଆରତୀଙ୍କୁ ଜୀବନସଙ୍ଗିନୀ ଭାବେ ବାଛି ନେଇଥିଲେ । ଯେମିତି ବି ହେଉ ଆରତୀ ହିଁ ତାଙ୍କର ଜୀବନସାଥୀ ହେବ ବୋଲି ସେ ସ୍ପଷ୍ଟ କରିଥିଲେ । ସେ ତାଙ୍କ ସହିତ ସାରା ଜୀବନ ସାଥ୍ ରହିବା ପାଇଁ କହିଥିଲେ ଅବଧେଶ । ଅବଧେଶଙ୍କର ଏପରି ଧେର୍ଯ୍ୟ ଓ ପ୍ରେମକୁ ଦେଖି ସମେସ୍ତ ବାହାବାଃ କରିଥିଲେ ।
ଅପରପକ୍ଷରେ ଆରତୀଙ୍କ ଘର ଲୋକେ ଡାକ୍ତରଙ୍କ ସହ କଥାବାର୍ତ୍ତା କରି ଆମ୍ବୁଲାନ୍ସ ଯୋଗେ ଆରତୀଙ୍କୁ ହସ୍ପିଟାଲରୁ ଗୋଟିଏ ଦିନ ପାଇଁ ଘରକୁ ଆଣିଥିଲେ । ବେଡ୍ରେ ଶୋଇ ରହିଥିବା ଅବସ୍ଥାରେ ଆରତୀ ଓ ଅବଧେଶଙ୍କର ବିବାହର ସମସ୍ତ ବିଧି ସମ୍ପନ୍ନ ହୋଇଥିଲା । ଏପରି ଦୁହେଁ ସାତ ଜନ୍ମ ପାଇଁ ସାତ ଫେରା ମଧ୍ୟ ନେଇଥିଲେ । ଏହାପରେ ଆରତୀଙ୍କ ଚିକିତ୍ସା ପାଇଁ ତାଙ୍କୁ ପୁନଃ ହସ୍ପିଟାଲରେ ଭର୍ତ୍ତି କରାଇଥିଲେ । ଅବଧେଶଙ୍କର ଏପରି କାର୍ଯ୍ୟ ତାଙ୍କୁ ଆଜି ବାସ୍ତବ ହିରୋ କରିଦେଇଛି । ତାଙ୍କର ଏହି କାର୍ଯ୍ୟ ପାଇଁ ସମେସ୍ତ ତାଙ୍କୁ ପ୍ରଶଂସ କରୁଛନ୍ତି । (ଏଜେନ୍ସି)