ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ସ୍ପର୍ଶକାତର ଘଟଣା କ୍ରମେ ମନୋଜାଇଟ୍ କଂପାନୀ ବିରୋଧରେ ଲଢ଼ୁଥିବା ନେତା ବଡ଼ପୁଟି ଗ୍ରାମର ଗୁରୁଦେବ ବେହେରାଙ୍କ ସହ ଏହି ଅଂଚଳରେ ଥିବା ୨୭ ଗ୍ରାମବାସୀଙ୍କ ଚମାଖଣ୍ଡି ପୋଲିସ୍ ଗିରଫ କରିବା ପ୍ରତିବାଦରେ ଆଜି ବହୁ ଗ୍ରାମବାସୀ ଏସ୍ପିଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି। ଖବର ଲେଖା ହେବା ସୁଦ୍ଧା ଏସ୍ପିଙ୍କ ସହ ଆଲୋଚନା ହୋଇନଥିବା ଏବଂ ଆନ୍ଦୋଳନ ଜାରି ରହିଥିବା ଜଣାପଡ଼ିଛି। ସେମାନଙ୍କ କହିବା କଥା ଆଇଆର୍ଇଏଲ୍ କପାନୀ ବଳପୂର୍ବକ ଦଳିତ ଗ୍ରାମବାସୀଙ୍କ ଜମିକୁ ଜବରଦଖଲ କରି ନେଇଯାଇଛି।
ଏହା ସହ ମନୋଜାଇଟ୍ ପ୍ଲାଣ୍ଟ ଦ୍ୱାରା ନିକଟସ୍ଥ କାଳିପଲ୍ଲୀ, କଣମଣା ପଞ୍ଚାୟତ ସମେତ ୩୦ କିମି ପରିଧି ଅଂଚଳରେ ବହୁ ଗ୍ରାମବାସୀ କିଡ଼୍ନୀ ରୋଗରେ ପୀଡ଼ିତ ହୋଇ ମୃତ୍ୟୁବରଣ କଲେଣି। ତେଣୁ ଏହି ଦାବି ନେଇ ଲଢ଼ୁଥିବା ନେତା ଗୁରୁଦେବ ବେହେରା ଏବଂ ଅନ୍ୟ ୨୭ ଜଣକୁ ଚମାଖଣ୍ଡି ପୋଲିସ୍ ବେଆଇନ ଭାବେ ଗିରଫ କରିଛି। ଜମି ଓ ଭିଟାମାଟି ସମସ୍ୟାର ସମାଧାନ କରିବା ପରିବର୍ତ୍ତେ ଚମାଖଣ୍ଡି ଥାନାଧିକାରୀ ଆଇଆର୍ଇଏଲ୍ କଂପାନୀର ହାତବାରିସି ହୋଇ ନିରୀହ ଗ୍ରାମବାସୀଙ୍କୁ ମିଥ୍ୟା କେସରେ ଭୟଭୀତ କରି ଜନଆନ୍ଦୋଳନକୁ ଦବାଇବା ପାଇଁ ହୀନ ଷଡ଼ଯନ୍ତ୍ର କରୁଛନ୍ତି।
ତେଜସ୍କ୍ରିୟ ବିକିରଣ ଯୋଗୁଁ ସ୍ଥାନୀୟ ଅଂଚଳରେ କିଡ଼୍ନୀ ସମସ୍ୟା ହେଉଥିବାରୁ ପ୍ଲାଣ୍ଟକୁ ତୁରନ୍ତ ବନ୍ଦ କରିବା, ସିଏଓ୍ଆର୍ ନିୟମ ଅନୁଯାୟୀ ସ୍ଥାନୀୟ ଅଂଚଳରେ ପାନୀୟ ଜଳ ଯୋଗାଣ, ରାସ୍ତାଘାଟ ନିର୍ମାଣ, ସ୍ୱାସ୍ଥ୍ୟ ଚିକିତ୍ସା ଓ ଶିକ୍ଷା ବ୍ୟବସ୍ଥା ଆଦି ଦାବି କରୁଥିବା ଲୋକଙ୍କୁ ପୋଲିସ୍ ଭୟଭୀତ କରି ଗିରଫ କରୁଛି। ତେଣୁ ତୁରନ୍ତ ଗିରଫ ସମସ୍ତଙ୍କୁ ନିସର୍ତ୍ତ ଖଲାସ, ଚମାଖଣ୍ଡି ଥାନାଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ସିପିଆଇ(ଏମ୍ଏଲ୍) ରେଡ଼ଷ୍ଟାର ଜିଲ୍ଲା ସଂପାଦକ ଶଙ୍କର ସାହୁ, କଣମଣା ପଞ୍ଚାୟତ ସଭାପତି ଉଦୟ ପ୍ରଧାନ, ଭଗବାନ ପ୍ରଧାନ, ଦଣ୍ଡପାଣି ପ୍ରଧାନ, ମହିଳା ନେତ୍ରୀ ସରସ୍ୱତୀ ପ୍ରଧାନ, ମହନୀ ପ୍ରଧାନ, ଝୁନୁ ପ୍ରଧାନଙ୍କ ସମେତ ବହୁ ଗ୍ରାମବାସୀ ଗଂଜାମ ଏସ୍ପି କାର୍ଯ୍ୟାଳୟରେ ଧାରଣା ଦେଇଛନ୍ତି ।ଯଦି ରାତି ସୁଦ୍ଧା ଏସ୍ପି ଆଲୋଚନା ନ କରନ୍ତି ତେବେ ଆସନ୍ତା କାଲି ଦକ୍ଷିଣାଞ୍ଚଳ ଡ଼ିଆଇଜି କାର୍ଯ୍ୟାଳୟ ଘେରାଉ କରିବେ।