କୋଲକାତା : ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଅଡୁଆ ବଢିବାରେ ଲାଗିଛି । ଗୃହମନ୍ତ୍ରୀ ଅମିତ ଶାହାଙ୍କ ଗସ୍ତ ପୂର୍ବରୁ ଆଜି ଜଣେ ଟିଏମସି ବିଧାୟକ ଇସ୍ତଫା ପ୍ରଦାନ କରିଛନ୍ତି । ଗତକାଲି ଦୁଇ ଜଣ ବିଧାୟକ ଇସ୍ତଫା ପ୍ରଦାନ କରିଥିବା ବେଳେ ଆଜି ଆଉ ଜଣେ ବିଧାୟକ ଇସ୍ତଫା ପ୍ରଦାନ କରିଛନ୍ତି । ଗତକାଲି ଦୁଇ ବିଧାୟକ ଶୁଭେନ୍ଦୁ ଅଧିକାରୀ ଏବଂ ଜିତେନ୍ଦ୍ର ତିୱାରୀ ନିଜର ଇସ୍ତଫା ପ୍ରଦାନ କରିଥିଲେ । ଶୁକ୍ରବାର ସକାଳୁ ବିଧାୟକ ଶିବଭଦ୍ର ଦତ୍ତ ମଧ୍ୟ ନିଜର ଇସ୍ତଫା ପ୍ରଦାନ କରିଛନ୍ତି ।
ଅମିତ ଶାହାଙ୍କ ଗସ୍ତ ପୂର୍ବରୁ ଏହି ବିଧାୟକ ମାନେ ଇସ୍ତଫା ପ୍ରଦାନ କରିଥିବାରୁ ସମସ୍ତେ ବିଜେପିରେ ଯୋଗ ଦେଇ ପାରନ୍ତି । ପଶ୍ଚିମବଙ୍ଗ ବିଧାନସଭା ନିର୍ବାଚନକୁ 2021 ମସିହାରେ ହେବାକୁ ରହିଛି । ଏହି ସମୟରେ ଜଣକ ପରେ ଜଣେ ବିଧାୟକଙ୍କ ଇସ୍ତଫା ଦିଦିଙ୍କ ଚିନ୍ତା ବଢାଇଛି । 2016 ବିଧାନସଭାରେ ତୃଣମୂଳର ସଫଳତାରେ ଶୁଭେନ୍ଦୁ ଅଧିକାରୀଙ୍କ ବଡ ଭୂମିକା ରହିଥିବା ବେଳେ ସେ ବିଜେପିରେ ଯୋଗ ଦେଲେ ବିଜେପିର ଶକ୍ତି ବୃଦ୍ଧି ଘଟିବ ବୋଲି ରାଜନୈତିକ ସମୀକ୍ଷକ ମାନେ ମତ ପ୍ରକାଶ କରିଛନ୍ତି । ପଶ୍ଚିମ କଲିକତାରେ ଅଧିକାରୀଙ୍କ ପ୍ରଭାବ ଅଧିକ । ଏହି ଅଞ୍ଚଳରେ ପ୍ରାୟ 50 ଆସନରେ ଅଧିକାରୀଙ୍କ ଦବଦବା ଜାରି ରହିଛି ।