ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଦିନକୁ ଦିନ ବ୍ରହ୍ମପୁର ସଂଲଗ୍ନ ଜାତୀୟ ରାଜପଥରେ ଅସାମାଜିକ କାର୍ଯ୍ୟକଳାପମାନ ବୃଦ୍ଧି ପାଉଥିବାରୁ ରାଜପଥରେ ପାଟ୍ରୋଲିଂ କଡ଼ାକଡ଼ି କରିବାକୁ ବହୁଦିନ ହେଲା ଦାବି ହୋଇ ଆସୁଥିଲା। ଯାହାକୁ ଦେଖି ଗତକାଲିଠାରୁ ବ୍ରହ୍ମପୁର ପୋଲିସ୍ ଜିଲ୍ଲା ପକ୍ଷରୁ ଏକ ଜାତୀୟ ରାଜପଥ ପାଟ୍ରୋଲିଂ ଗାଡ଼ିକୁ ବ୍ରହ୍ମପୁର ଏସ୍ପି ପିନାକ ମିଶ୍ର ମାଣ୍ଡିଆପଲ୍ଲୀ ଛକଠାରେ ପତାକା ଦେଖାଇ ଶୁଭ ଉଦ୍ଘାଟନ କରିଥିଲେ।
ଏହି ପାଟ୍ରୋଲିଂ ଗାଡ଼ିଟି ଗୋପାଳପୁର-ଗୋଳନ୍ଥରା ମଧ୍ୟବର୍ତ୍ତୀ ଅଂଚଳରେ ପାଟ୍ରୋଲିଂ କରି ସମସ୍ତ ଆସାମାଜିକ ଗତିବିଧି, ଦୁର୍ଘଟଣା ଏବଂ ଅନ୍ୟାନ୍ୟ ସମସ୍ୟାମାନ ବିଷୟରେ ତତ୍କାଳ ପଦକ୍ଷେପ ଗ୍ରହଣ କରିବ। ଏହି ଗାଡ଼ିଟି ସପ୍ତାହକୁ ସାତଦିନ ୨୪ ଘଣ୍ଟା କାର୍ଯ୍ୟକ୍ଷମ ହେବ ବୋଲି ଏସ୍ପି ଶ୍ରୀ ମିଶ୍ର କହିଛନ୍ତି। ସେହିପରି ଜିଲ୍ଲାର ରମ୍ଭାଠାରୁ ଛତ୍ରପୁର ଏବଂ ଛତ୍ରପୁରଠାରୁ ଗିରିସୋଲା ମଧ୍ୟରେ ବି ପାଟ୍ରୋଲିଂ କରାଯିବା ନେଇ ଗତକାଲି ଶୁଭ ଉଦ୍ଘାଟନ ଅନୁଷ୍ଠିତ ହୋଇଛି।
