ନୂଆଦିଲ୍ଲୀ, ଦେଶର ଜଣେ ନାମଜାଦା ଓକିଲ ତଥା ପୂର୍ବତନ ଆଟର୍ଣ୍ଣି ଜେନେରାଲ ସୋଲି ସୋରାବଜୀଙ୍କ କରୋନାରେ ପରଲୋକ ହୋଇଯାଇଛି। ମୃତ୍ୟୁବେଳଙ୍କୁ ତାଙ୍କୁ 91 ବର୍ଷ ବୟସ ହୋଇଥିଲା। ସେ ଅସୁସ୍ଥତା ଅନୁଭବ କରିବାରୁ ତାଙ୍କର କରୋନା ପରୀକ୍ଷା କରାଯାଇଥିଲା। ଏଥିରେ ପଜେଟିଭ ଆସିବାରୁ ତାଙ୍କୁ ଦିଲ୍ଲୀର ଏକ ଘରୋଇ ହସପିଟାଲରେ ଭର୍ତ୍ତି କରାଯାଇଥିଲା। ହେଲେ ଆଜି ସକାଳେ ତାଙ୍କର ମୃତ୍ୟୁ ହୋଇଯାଇଛି। ଏହି ଖବର ଜଣାପଡିବା ପରେ ସୁପ୍ରିମ କୋର୍ଟ ତଥା ଦେଶର ଆଇନଜୀବିଙ୍କ ମଧ୍ୟରେ ଶୋକର ଛାୟା ଖେଳିଯାଇଛି।
1930 ମସିହାରେ ଜନ୍ମିତ ସୋଲି 1953 ମସିହାରେ ଓକିଲ ଭାବେ କାର୍ଯ୍ୟ ଆରମ୍ଭ କରିଥିଲେ। ସେ ଦୁଇଥର ଆଟର୍ଣ୍ଣି ଜେନେରାଲ ଏବଂ ଥରେ ସୋଲିସେଟର ଜେନରାଲ ଭାବେ କାର୍ଯ୍ୟ କରିଛନ୍ତି। ସେ ଦେଶର ବହୁ ପ୍ରମୁଖ ଘଟଣାର ବରିଷ୍ଠ ଓକିଲ ଭାବେ ଲଢେଇ କରିଛନ୍ତି। ସେଥି ମଧ୍ୟରେ ରହିଛି କେଶବାନନ୍ଦ ଭାରତୀ, ଏସଆର ବୋମାଇ ଏବଂ ମେନକା ଗାନ୍ଧୀ ମାମଲା ପରିଚାଳନା କରୁଥିଲେ।
ତାଙ୍କର ଜୀବନବ୍ୟାପି ସାଧନା ପାଇଁ ତାଙ୍କୁ 2002 ମସିହାରେ ପଦ୍ମ ବିଭୂଷଣ ସମ୍ମାନରେ ସମ୍ମାନିତ କରାଯାଇଥିଲା।
