ନୟାଗଡ/ଚାନ୍ଦପୁର: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ଜାତୀୟ ରାଜପଥରେ ଏକ ସଡକ ଦୁର୍ଘଟଣା ଘଟିଯାଇଛି। ଚାନ୍ଦପୁର ଥାନା ୧୬ ନମ୍ବର ଜାତୀୟ ରାଜପଥରେ ଟ୍ରକର ପଛ ପଟୁ ପିଟି ଗୋଟିଏ କାର ଦୁର୍ଘଟଣାଗ୍ରସ୍ତ ହୋଇଛି। ଦୁର୍ଘଟଣାଗ୍ରସ୍ତ କାର ଭିତରୁ ୨ ଲକ୍ଷରୁ ଉର୍ଦ୍ଧ୍ଵ ଟଙ୍କା ଚୋରି ହୋଇଥିବା ଚାଳକଜଣଙ୍କ ଅଭିଯୋଗ କରିଛନ୍ତି।
ସୂଚନା ନୁଯାୟୀ, ବିଶାଖାପାଟଣାମରୁ ଭୁବନେଶ୍ଵର ଅଭିମୁଖେ ଯାଉଥିବା ଏକ କାର (ଏପି ୩୯ ଏଫଏନ ୫୦୦୪) ଟି ଶନିମନ୍ଦିର ଓଭରବ୍ରିଜ ନିକଟରେ ଦୁର୍ଘଟଣାଗ୍ରସ୍ତ ହୋଇଛି। ଓଭରବ୍ରିଜ ନିକଟରେ ଥିବା ହମ୍ପସରେ ଗୋଟିଏ ଟ୍ରକ ହଠାତ ବ୍ରେକ ମାରିବା ଦ୍ଵାରା ପଛରେ ଥିବା କାରଟି ଭାରସାମ୍ୟ ହରାଇ ତାକୁ ଧକ୍କା ଦେଇଥିଲା। ଘଟଣାସ୍ଥଳରୁ ଟ୍ରକ ଚାଳକ ଫେରାର ହୋଇଯାଇଥିବା ବେଳେ ସ୍ଥାନୀୟଲୋକେ କାର ଚାଲାକଙ୍କୁ ଉଦ୍ଧାର କରିଥିଲେ। କାର ଚାଳକଙ୍କୁ ଚିକିତ୍ସା ପାଇଁ ସେମାନେ ହସ୍ପିଟାଲରେ ଭର୍ତ୍ତି କରିଥିଲେ।
ଚାନ୍ଦପୁର ପୋଲିସ ଘଟଣାସ୍ଥଳରେ ପହଞ୍ଚି ଗାଡିକୁ ଜବତ କରିଛି। ଏପଟେ କାର ଚାଳକ ସୁସ୍ଥ ଥିବା ବେଳେ ତାଙ୍କ କାର ଭିତରୁ ୨ ଲକ୍ଷ ୪୦ ହଜାର ଟଙ୍କା ଚୋରୀ ହୋଇଥିବା ପୋଲିସ ନିକଟରେ ଅଭିଯୋଗ କରିଛନ୍ତି। ଏନେଇ ପୋଲିସ ତଦନ୍ତ ଜାରି ରଖିଛି।
