ଲକ୍ଷ୍ନୌ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲକ୍ଷ୍ନୌରେ ପହଞ୍ଚି ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ପ୍ରଧାନମନ୍ତ୍ରୀ ମୋଦୀଙ୍କ ସହ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ବିଜେପି ସଭାପତି ଜେପି ନଡ୍ଡା ମଧ୍ୟ ଉପସ୍ଥିତ ଥିଲେ।
ମୋଦୀ କହିଛନ୍ତି ଯେ, ଆମ ସମସ୍ତଙ୍କ ପାଇଁ ଅପୂରଣୀୟ କ୍ଷତି ହୋଇଛି। କଲ୍ୟାଣ ସିଂ ଜୀଙ୍କର ପିତାମାତା ଦେଇଥିବା ନାମ ସେହି ନାମକୁ ଅର୍ଥପୂର୍ଣ୍ଣ କରିଥିଲା। ସେ ତାଙ୍କ ଜୀବନସାରା ଜନ କଲ୍ୟାଣ ପାଇଁ ବଞ୍ଚିଥିଲେ। ସେ ଜନ କଲ୍ୟାଣକୁ ତାଙ୍କ ଜୀବନ ମନ୍ତ୍ର କରିଥିଲେ। ବିଜେପି, ଜନ ସଂଘ ସମଗ୍ର ପରିବାରକୁ ଗୋଟିଏ ବିଚାରରେ ଦେଶର ଉଜ୍ଜ୍ୱଳ ଭବିଷ୍ୟତ ପାଇଁ ନିଜ ଜୀବନକୁ ଉତ୍ସର୍ଗ କରିଥିଲେ। ତାଙ୍କ ଜୀବନର ସର୍ବାଧିକ ସମୟ ସର୍ବଦା ଲୋକଙ୍କ କଲ୍ୟାଣ ପାଇଁ ଚେଷ୍ଟା କରିଥିଲେ।
ଦେଶ ଏକ ମୂଲ୍ୟବାନ ବ୍ୟକ୍ତିତ୍ୱ, ଜଣେ ଦକ୍ଷ ନେତା ହରାଇଛି। ମୁଁ ଭଗବାନ ଶ୍ରୀ ରାମଙ୍କୁ ତାଙ୍କ ପାଦରେ ସ୍ଥାନ ଦେବା ପାଇଁ ପ୍ରାର୍ଥନା କରୁଛି ଏବଂ ଏହି ଦୁଃଖଦ ସମୟରେ କ୍ଷତି ସହିବାକୁ ଭଗବାନ ତାଙ୍କ ପରିବାରକୁ ଶକ୍ତି ଦିଅନ୍ତୁ।
କଲ୍ୟାଣ ସିଂଙ୍କ ମୃତ୍ୟୁକୁ ସମବେଦନା ଜଣାଇ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉତ୍ତରପ୍ରଦେଶରେ ତିନି ଦିନିଆ ରାଜ୍ୟ ଶୋକ ଘୋଷଣା କରିଛନ୍ତି। ସେ ଅଗଷ୍ଟ ୨୩ ତାରିଖରେ ରାଜ୍ୟରେ ଏକ ଦିନିକିଆ ସାଧାରଣ ଛୁଟି ଘୋଷଣା କରିଛନ୍ତି।
ଏଥି ସହ ରାଷ୍ଟ୍ରପତି ରାମ ନାଥ କୋବିନ୍ଦ କଲ୍ୟାଣ ସିଂଙ୍କ ମୃତ୍ୟୁକୁ ସମବେଦନା ଜଣାଇବା ସହ ଜନସାଧାରଣଙ୍କ ସହ ତାଙ୍କର ଏକ ଚମତ୍କାର ସମ୍ପର୍କ ଥିବା କହିଛନ୍ତି। ଏଥି ସହ ଉପରାଷ୍ଟ୍ରପତି ଏମ ଭେଙ୍କୟା ନାଇଡୁ ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂଙ୍କ ମୃତ୍ୟୁକୁ ସମବେଦନା ଜଣାଇ ତାଙ୍କୁ ଜାତୀୟତାବାଦୀ ତଥା ଅନନ୍ୟ ନେତା ବୋଲି ବର୍ଣ୍ଣନା କରିଛନ୍ତି।
ସଞ୍ଜୟ ଗାନ୍ଧୀ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ବାହାରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଗଣମାଧ୍ୟମକୁ କହିଛନ୍ତି, ‘ଆମ ସମସ୍ତଙ୍କ ପାଇଁ ଦୁଃଖଦ ଖବର, ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ, ରାଜସ୍ଥାନ ଏବଂ ହିମାଚଳ ପ୍ରଦେଶର ପୂର୍ବତନ ରାଜ୍ୟପାଳ ତଥା ଭାରତୀୟ ଜନତା ପାର୍ଟିର ବରିଷ୍ଠ ନେତା କଲ୍ୟାଣ ସିଂ ଜୀ ଆଉ ନାହାଁନ୍ତି।
ଉଲ୍ଲେଖ ଯୋଗ୍ୟ ଯେ, ଦୀର୍ଘ ଦିନ ଧରି ଅସୁସ୍ଥ ହେବା ପରେ କଲ୍ୟାଣ ସିଂ ଶନିବାର ରାତି ପ୍ରାୟ ୯.୧୫ ମିନିଟରେ ଶେଷ ନିଶ୍ଵାସ ତ୍ୟାଗ କରିଥିଲେ। ମୃତ୍ୟୁ ବେଳକୁ ତାଙ୍କୁ ୮୯ ବର୍ଷ ବୟସ ହୋଇଥିଲା। କଲ୍ୟାଣ ସିଂଙ୍କର ଅନ୍ତିମ ସଂସ୍କାର ଅଗଷ୍ଟ ୨୩ ତାରିଖରେ ଗଙ୍ଗା କୂଳରେ ଥିବା ନରୋରା ଠାରେ ଅନୁଷ୍ଠିତ ହେବ।
