ସମାଜବାଦୀ ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ତଥା ଆଜମଗଡ଼ ଲୋକସଭା ଆସନ ପାଇଁ ଆଶାୟୀ ପ୍ରାର୍ଥୀ ଅଖିଳେଶ ଯାଦବ କଲେକ୍ଟ୍ରେଟରେ ପହଂଚି ଡିଏମ କୋର୍ଟରେ ନାମାଙ୍କନ ପତ୍ର ଦାଖଲ କରିଛନ୍ତି। ତାଙ୍କ ସହ ପ୍ରଦେଶ ଅଧ୍ୟକ୍ଷ ନରେଶ ଉତମ ପଟେଲ ଏବଂ ମହାରାଷ୍ଟ୍ରର ଅଧ୍ୟକ୍ଷ ଅବୁ ଆସିମ ଆଜମୀ ଉପସ୍ଥିତ ଥିଲେ। ସପା-ବିଏସ୍ପିର ମହାମେଣ୍ଟରେ ହୋଇଥିବା କାମ ଆଧାରରେ ଦଳ ଜିତିବ ବୋଲି ଅଖିଳେଶ କହିଛନ୍ତି। ବିଜେପିକୁ ୫ ବର୍ଷ ନୁହେଁ ୭ ବର୍ଷର ହିସାବ ଦେବାକୁ ପଡ଼ିବ ବୋଲି କହିଛନ୍ତି ଅଖିଳେଶ। ପୂର୍ବରୁ ଏହି ଆସନରୁ ସପାର ସଂସ୍ଥାପକ ମୁଲାୟମ ସିଂ ଯାଦବ ପ୍ରତିନିଧିତ୍ବ କରୁଥିଲେ। ଚଳିତ ଥର ମୁଲାୟମଙ୍କୁ ମେନେପୁରୀ ଆସନରୁ ପ୍ରାର୍ଥୀ କରାଯାଇଛି। ୨୦୧୯ ଲୋକସଭା ନିର୍ବାଚନ ପାଇଁ ସପା-ବିଏସ୍ପି ଓ ଆର୍ଏଲ୍ଡି ମଧ୍ୟରେ ମହାମେଣ୍ଟ କରାଯାଇଛି। ଉତ୍ତରପ୍ରଦେଶରେ ସପା ୩୭ଟି ଆସନରୁ ବିଏସ୍ପି ୩୮ଟି ଆସନରୁ ଓ ଆରଏଲ୍ଡି ୩ଟି ଆସନରୁ ଚଳିତ ନିର୍ବାଚନ ଲଢୁଛନ୍ତି।
