ଭୁବନେଶ୍ୱର: କେନ୍ଦ୍ରୀୟ ଶ୍ରମିକ ସଂଗଠନମାନଙ୍କ ଏକ ମିଳିତ ବୈଠକ ଆଇଏନ୍ଟିୟୁସିର ସଭାପତି ତଥା ପୂର୍ବତନ ସାଂସଦ ଡ. ରାମଚନ୍ଦ୍ର ଖୁଣ୍ଟିଆଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଶ୍ରମିକ ବିରୋଧୀ, ଜନବିରୋଧୀ ମୋଦି ସରକାରଙ୍କ ବିରୋଧରେ ଆସନ୍ତା ଜାନୁୟାରୀ ୯ ତାରିଖରେ ରାଜ୍ୟ ସମ୍ମିଳନୀ କରାଯିବା ପାଇଁ ନିଷ୍ପତ୍ତି ନିଆଯିବା ସହିତ ୨୦୨୨ ଫେବୃୟାରୀ ୨୩ ଓ ୨୪ ତାରିଖରେ ସଂସଦର ବଜେଟ ଅଧିବେଶନ ସମୟରେ ଦେଶବ୍ୟାପୀ ଧର୍ମଘଟକୁ ଓଡ଼ିଶାରେ ବ୍ୟାପକ କରିବା ଲାଗି ଆଇଏନ୍ଟିୟୁସି, ଏଆଇଟିୟୁସି,ଏଚ୍ଏମ୍ଏସ୍, ସିଆଇଟିୟୁ, ଏଆଇସିସିଟିୟୁ, ଟିୟୁସିସି, ଏଆଇୟୁଟିୟୁସି ଓ ସେୱାର ଶ୍ରମିକ ନେତାମାନେ ଘୋଷଣା କରିଛନ୍ତି।
ଆସନ୍ତା ୨୦୨୨ ଜାନୁୟାରୀ ୯ରେ ରାଜ୍ୟ ସମ୍ମିଳନୀ ସହିତ ଜିଲ୍ଲାସ୍ତରରେ ସମ୍ମିଳନୀ ଓ ମୋଦି ସରକାରର ଶ୍ରମିକ ବିରୋଧୀ ନୀତି, ଦର ବୃଦ୍ଧି, ବ୍ୟାପକ ଘରୋଇକରଣ ବରୁଦ୍ଧରେ ସାରା ରାଜ୍ୟରେ ଅଭିଯାନ କରାଯିବ ବୋଲି ନିଷ୍ପତ୍ତି ନିଆଯାଇଛି। ନ୍ୟାସନାଲ ମନିଟାଇଜେସନ ପାଇପଲାଇନ ମାଧ୍ୟମରେ ଭୁବନେଶ୍ୱର ବିମାନବନ୍ଦର, ପରାଦ୍ୱୀପ ବନ୍ଦର, ନାଲ୍କୋ, ନୀଳାଚଳ ଇସ୍ପାତ, ଏନ୍ଟିପିସି ଓ ଟିସିପିଏସ୍କୁ ଆମ ରାଜ୍ୟରେ ମୋଦି ସରକାର ଯେଭଳି ଭାବରେ ଘରୋଇକରଣ କରିବାକୁ ମସୁଧା ଚଳାଇଛନ୍ତି, କେନ୍ଦ୍ରୀୟ ଶ୍ରମିକ ସଂଗଠନମାନେ ଏହାର ତୀବ୍ର ବିରୋଧ କରିବେ ବୋଲି ମତପ୍ରକାଶ ପାଇଛି।
ମୋଦି ସରକାର ଯେଭଳି ଭାବରେ ରାଷ୍ଟ୍ରୀୟ ଅନୁଷ୍ଠାନ ରେଳ, ବ୍ୟାଙ୍କ, ବୀମା ଓ ତୈଳ କମ୍ପାନୀଗୁଡ଼କୁ ଘରୋଇ କମ୍ପାନୀମାନଙ୍କ ହାତରେ ଟେକିଦେବାକୁ ବସିଛନ୍ତି ତାହାକୁ ବିରୋଧ କରାଯିବା ସହିତ ଶ୍ରମିକମାନଙ୍କର ୧୨ଦଫା ଦାବି ଯଥା :- ଚାରି ଶ୍ରମକୋଡ଼ ବାତିଲ୍ କରିବା, ଘରୋଇକରଣକୁ ବନ୍ଦ କରିବା ଓ ଏମ୍.ଏମ୍.ପିକୁ ବାତିଲ କରିବା, ଇନ୍କମ୍ ଟ୍ୟାକ୍ସ ଦେଉନଥିବା ପରିବାରକୁ ପ୍ରତିମାସରେ ୭ ହଜାର ୫୦୦ଟଙ୍କା ସହାୟତା, ଠିକା ଶ୍ରମିକମାନଙ୍କୁ ନିୟମିତ କରିବା ଓ ସମାନ କାମକୁ ସମାନ ଦରମା ପ୍ରଦାନ, ନୂଆ ପେନସନ ଯୋଜନାକୁ ବନ୍ଦ କରି ପୁରୁଣା ପେନସନ ଯୋଜନାକୁ ଲାଗୁ କରିବା, ସମସ୍ତ ଅଣସଂଗଠିତ ଶ୍ରମିକମାନଙ୍କୁ ସାମାଜିକ ସୁରକ୍ଷା ପ୍ରଦାନ, ମନରେଗାରେ କାର୍ଯ୍ୟଦିବସ ବୃଦ୍ଧି ଓ ସହରମାନଙ୍କରେ ରୋଜଗାର ଗ୍ୟାରେଣ୍ଟି ଯୋଜନାକୁ ବୃଦ୍ଧି କରିବା ଦାବିକୁ ନେଇ ଆସନ୍ତା ୨୦୨୨ ଫେବୃୟାରୀ ୨୩ ଓ ୨୪ରେ ଦେଶବ୍ୟାପୀ ଧର୍ମଘଟ କରାଯିବ ବୋଲି ଆଜି ଘୋଷଣା କରାଯାଇଅଛି। ଠିକ୍ ସେହିପରି କରୋନା ସମୟରେ କମ୍ପାନୀମାନେ ରାଜ୍ୟ ସରକାରଙ୍କ ଠାରୁ କୌଣସି ÷ଅନୁମତି ନନେଇ ୩୦୦ରୁ କମ୍ ଥିବା ଫ୍ୟାକ୍ଟ୍ରିମାନଙ୍କରେ ଶ୍ରମିକମାନଙ୍କୁ ଛଟେଇ କରିବା ଲାଗି ବିଧାନସଭାରେ ବିଲ୍ ପାସ୍କୁ କେନ୍ଦ୍ରୀୟ ଶ୍ରମିକ ସଂଗଠନ ନିନ୍ଦା କରିବା ସହିତ ଉକ୍ତ ବିଲ୍କୁ ସଂଶୋଧନ କରିବା ଲାଗି ଦାବି କରାଯାଇଛି।
୧୬ ଓ ୧୭ରେ ବ୍ୟାଙ୍କ କର୍ମଚାରୀମାନଙ୍କ ଧର୍ମଘଟକୁ ସମର୍ଥନ କରିବା ସହିତ ଆସନ୍ତା ଫେବୃୟାରୀ ୧ ତାରିଖରେ ବିଜୁଳି ବିଲ୍କୁ ନେଇ ଦିଆଯାଇଥିବା ସାଧାରଣ ଧର୍ମଘଟକୁ କେନ୍ଦ୍ରୀୟ ଶ୍ରମିକ ସଂଗଠନମାନେ ସମର୍ଥନ କରିବେ ବୋଲି ନିଷ୍ପତ୍ତି ନିଆଯାଇଛି ଓ ଆଗାମୀ ଦିନରେ ବିଜୁଳି ବିଲ୍କୁ କେନ୍ଦ୍ର ସରକାର ବାତିଲ୍ କରିବାକୁ ଦାବି କରାଯାଇଛି।
ଏହି ବୈଠକରେ ଆଇଏନ୍ଟିୟୁସିର ସାଧାରଣ ସମ୍ପାଦକ କିଶୋର ଜେନା, ମଦନ ମୋହନ ଧଳ, ଏଆଇଟିୟୁସିର ରାମକୃଷ୍ଣ ପଣ୍ଡା, ଏଚ୍ଏମ୍ଏସ୍ର ସଭାପତି କୃଷ୍ଣଚନ୍ଦ୍ର ପାତ୍ର ଓ ଯୁଗଳ ନାୟକ, ସିଆଇଟିୟୁର ନେତା ଦୁଷ୍ମନ୍ତ ଦାସ, ଏଆଇୟୁଟିୟୁସିର ସମ୍ପାଦକ ଜୟସେନ ମେହେର ଓ ନିରଞ୍ଜନ ମହାନ୍ତି, ଏଆଇସିସିଟିୟୁର କାର୍ଯ୍ୟକାରୀ ସଭାପତି ରାଧାକାନ୍ତ ସେଠୀ ଓ ସାଧାରଣ ସମ୍ପାଦକ ମହେନ୍ଦ୍ର ପରିଡ଼ା ଓ ଟିୟୁସିସିର ନେତା ଜ୍ୟୋତିରଞ୍ଜନ ମହାପାତ୍ର ଉପସ୍ଥିତ ଥିଲେ। ଏହାଛଡ଼ା ରାଜ୍ୟ ସରକାରଙ୍କ କର୍ମଚାରୀ ସଂଘର ରବୀନ୍ଦ୍ର ଧଳ ଓ ବ୍ୟାଙ୍କ କର୍ମଚାରୀ ପ୍ରମୁଖ ଉପସ୍ଥିତ ରହି ଆଗାମୀ ଦୁଇଦିନିଆ ଧର୍ମଘଟକୁ ସାରା ରାଜ୍ୟରେ ସଫଳ କରିବା ଲାଗି ନିଷ୍ପତ୍ତି ନେଇଥିଲେ।