ଭୁବନେଶ୍ୱର: ଓଡ଼ିଶା ରାଜ୍ୟ ଅଭିଲେଖାଗାରରେ ୫୮ତମ ସଂସ୍କୃତି ଚର୍ଚ୍ଚା ସମ୍ପାନ ମହୋତ୍ସବ ଅନୁଷ୍ଠିତ ହୋଇ ଯାଇଅଛି। ଉକ୍ତ ଉତ୍ସବରେ ମୁଖ୍ୟବକ୍ତା ଭାବରେ ଭାରତୀୟ ଯୋଗ ସଂସ୍ଥାନ, ନୂଆଦିଲ୍ଲୀର ସୁରେଶ କୁମାର ମହାପାତ୍ର ଯୋଗଦାନ କରିଥିଲେ।ଏହି ଅବସରରେ ମହାପାତ୍ର ନିଜର ବକ୍ତବ୍ୟରେ ଯମ, ନିୟମ, ଆସନ, ପ୍ରାଣାୟମ, ପ୍ରତ୍ୟାହାର,ଧ୍ୟାନ ଧାରଣା ଏବଂ ସମାଧି ଉପରେ ବିଶଦ୍ ଭାବରେ ବର୍ଣ୍ଣନା କରିଥିଲେ।
ଉତ୍କଳୀୟ ହିନ୍ଦୁ ଦର୍ଶନ ଓ ଧର୍ମ ପରଂପରାରେ ଯୋଗାଭ୍ୟାସର ସମସ୍ତ ବିଧିବିଧାନ କେଉଁ ଆଦିମ ଯୁଗରୁ ପ୍ରଚଳିତହୋଇ ଆସୁଛି, ତାହା ନିର୍ଣ୍ଣୟ କରିବା ସହଜ ସାଧ୍ୟ ନୁହେଁ । ସେହି ଯୋଗର ବିଧିବିଧାନ ପରଂପରାକୁ ଯେଉଁମାନେ ନିଷ୍ଠା ଓ ପବିତ୍ରଭାବରେ ପାଳନ କରି ଆସିଛନ୍ତି, ସେହିମାନେ ସର୍ବଶ୍ରେଷ୍ଠ ମହାପୁରୁଷ, ସନ୍ୟାସୀ ବା ଉତ୍ତମ ସାଧକ ହିସାବରେ ପରିଗଣିତହୋଇ ଆସିଛନ୍ତି।
ଏଥିରେ ସମ୍ମାନନୀୟ ଅତିଥି ଏବଂ ସଭାପତିତ୍ୱ କରିଥିଲେ ନିର୍ଦ୍ଦେଶକ ତଥା ଅତିରିକ୍ତ ଶାସନ ସଚିବ ଶ୍ରୀଯୁକ୍ତ ରଞ୍ଜନ କୁମାର ଦାସ। ସମ୍ପାନର ଅତିଥି ଭାବରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ଅତିରିକ୍ତ ଶାସନ ସଚିବ ଶ୍ରୀମତୀ ମନସ୍ୱିନୀ ସାହୁ ଯୋଗଦାନ କରିଥିଲେ । ସମ୍ପାନରେ ସ୍ୱାଗତ ଭାଷଣ ଦେଇଥିଲେ ଓଡ଼ିଶା ରାଜ୍ୟ ଅଭିଲେଖାଗାରର ଅଧୀକ୍ଷକ ଡ. ଶେଖ୍ ସୋଲେମାନ ଅଲ୍ଲୀ ଏବଂ ଧନ୍ୟବାଦ ଅର୍ପଣ କରିଥିଲେ ଅଭିଲେଖାଗାରର ଶ୍ରୀଯୁକ୍ତ ଉପେନ୍ଦ୍ର କୁମାର ବେହେରା।
