ନୂଆଦିଲ୍ଲୀ: କୋଭାକ୍ସିନ BBV152 ଟିକା ନିରାପଦ ବୋଲି ପ୍ରମାଣିତ ହୋଇଛି। ଭରତ ବାୟୋଟେକ ଇଣ୍ଟରନ୍ୟାସନାଲ ଲିମିଟେଡ (ବିବିଏଲ) ଆଜି ଏହି ଘୋଷଣା କରିଛି। ପିଲାମାନଙ୍କଠାରେ ଦ୍ୱିତୀୟ ପର୍ଯ୍ୟାୟ ଏବଂ ତୃତୀୟ ପର୍ଯ୍ୟାୟ ପରୀକ୍ଷାରେ ସୁରକ୍ଷିତ ଏବଂ ଉତ୍ତମ ପ୍ରତିରକ୍ଷା ପ୍ରଦାନ କରୁଥିବା ପ୍ରମାଣିତ ହୋଇଛି।
ଭରତ ବାୟୋଟେକର ଚେୟାରମ୍ୟାନ୍ ତଥା ପରିଚାଳନା ନିର୍ଦ୍ଦେଶକ କୃଷ୍ଣ ଏଲା କହିଛନ୍ତି, “ପିଲାମାନଙ୍କରେ କୋଭାକ୍ସିନର କ୍ଲିନିକାଲ୍ ଟ୍ରାଏଲ୍ ଡାଟା ଅତ୍ୟନ୍ତ ଉତ୍ସାହଜନକ ଅଟେ। ପିଲାମାନଙ୍କ ପାଇଁ ଟିକା ସମ୍ବନ୍ଧୀୟ ସୁରକ୍ଷା ଗୁରୁତ୍ୱପୂର୍ଣ୍ଣ ଏବଂ ଆମେ ଏବେ ଖୁସି ଅଛୁ ଯେ” ପିଲାମାନଙ୍କ ପାଇଁ ସୁରକ୍ଷା ଏବଂ ପ୍ରତିରକ୍ଷା ପ୍ରଣାଳୀ ପାଇଁ କୋଭାକ୍ସିନ ଭଲ ପ୍ରମାଣିତ ହୋଇଛି। ଆମେ ବର୍ତ୍ତମାନ ଏହି ଲକ୍ଷ୍ୟ ହାସଲ କରିଛୁ। ଉଭୟ ବୟସ୍କ ଏବଂ ପିଲାମାନଙ୍କ ପାଇଁ କୋଭାକ୍ସିନ ଟୀକା ନିରାପଦ ଏବଂ ପ୍ରଭାବଶାଳୀ।
ଉଲ୍ଲେଖ ଯୋଗ୍ୟ ଯେ, ଚଳିତ ବର୍ଷ ଜୁନ୍-ସେପ୍ଟେମ୍ବର ମଧ୍ୟରେ ପିଲାମାନଙ୍କ ଉପରେ କରାଯାଇଥିବା ଟୀକାକରଣର କ୍ଲିନିକାଲ୍ ପରୀକ୍ଷଣରେ ଦୃଢ ସୁରକ୍ଷା ଏବଂ ରୋଗ ପ୍ରତିରୋଧକ ଶକ୍ତି ଦେଖାଯାଇଛି। ଅକ୍ଟୋବର ୨୦୨୧ ମସିହାରେ ଏହାର ତଥ୍ୟ କେନ୍ଦ୍ରୀୟ ଡ୍ରଗ୍ସ ଷ୍ଟାଣ୍ଡାର୍ଡ କଣ୍ଟ୍ରୋଲ୍ ଅର୍ଗାନାଇଜେସନ୍ (CDSCO) ରେ ଦାଖଲ କରାଯାଇଥିଲା ଏବଂ ନିକଟରେ ଡ୍ରଗ୍ସ କଣ୍ଟ୍ରୋଲର୍ ଜେନେରାଲ୍ ଅଫ୍ ଇଣ୍ଡିଆ (DCGI) ୧୨-୧୮ ବର୍ଷ ବୟସର ପିଲାମାନଙ୍କ ପାଇଁ କୋଭାକ୍ସିନ୍ ଜରୁରୀକାଳୀନ ବ୍ୟବହାର କରିବାକୁ ଅନୁମତି ଦେଇଥିଲା। ଏହା ମଧ୍ୟ କୁହାଯାଇଛି ଯେ ଅଧ୍ୟୟନରେ କୌଣସି ଗୁରୁତର ପ୍ରତିକୂଳ ଘଟଣା ଘଟିନାହିଁ।