ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାରଣାସୀରୁ ନିଜର ନାମାଙ୍କନ ଦାଖଲ କରିଛନ୍ତି। ଶୁକ୍ରବାର ବିଜେପି ରାଷ୍ଟ୍ରୀୟ ସଭାପତି ଅମିତ ଶାହ, ଅନ୍ୟ ଦଳୀୟ ଏବଂ ସହଯୋଗୀ ରାଜନେତାଙ୍କ ସହ ଉତ୍ତର ପ୍ରଦେଶର ବାରଣାସୀରୁ ମୋଦି ନିଜର ନାମାଙ୍କନ ଦାଖଲ କରିଛନ୍ତି। ନାମାଙ୍କନ ଦାଖଲ ପୂର୍ବରୁ ଏକ ସହଯୋଗୀ ରାଜନେତାଙ୍କ ସହିତ ମୋଦି ଏକ ବିରାଟ ରୋଡ ଶୋ ଜରିଆରେ ବିଜେପିର ଶକ୍ତି ପ୍ରଦର୍ଶନ କରିଥିଲେ। ମୋଦିଙ୍କ ନାମାଙ୍କନ ଦାଖଲ କାର୍ଯ୍ୟକ୍ରମରେ ଏନ୍ଡିଏର ବିଭିନ୍ନ ସହଯୋଗୀ ଦଳର ସଦସ୍ୟ ମଧ୍ୟ ଉପସ୍ଥିତ ଥିଲେ। ଶିବସେନା ମୁଖ୍ୟ ଉଦ୍ଧବ ଠାକ୍ରେ, ବିହାର ମୁଖ୍ୟମନ୍ତ୍ରୀ ନୀତିଶ କୁମାର, ଶିରୋମଣୀ ଅକାଳୀ ଦଳ ମୁଖ୍ୟ ପ୍ରକାଶ ସିଂ ବାଦଲ ଏବଂ ଏଲ୍ଜେପି ମୁଖ୍ୟ ରାମ ବିଳାଶ ପାଶ୍ବାନ ଉପସ୍ଥିତ ଥିଲେ। ଏମାନଙ୍କ ବ୍ୟତିତ ଅପ୍ନା ଦଳ, ନର୍ଥ ଇଷ୍ଟ ଡେମୋକ୍ରିଟିକ୍ ପାର୍ଟି ଏବଂ ଏଆଇଡିଏମ୍କେର ସଦସ୍ୟ ମାନେ ମଧ୍ୟ ମୋଦିଙ୍କ ନାମାଙ୍କନ ସମୟରେ ଉପସ୍ଥିତ ଥିଲେ। ସୂଚନା ଯୋଗ୍ୟ ଯେ, ବାରଣାସୀ ଲୋକସଭା ଆସନରୁ ମୋଦିଙ୍କ ବିପକ୍ଷରେ କଂଗ୍ରେସର ଅଜୟ ରାୟ ଏବଂ ସମାଜବାଦୀ ପାର୍ଟିର ଶାଳିନୀ ଯାଦବ ପ୍ରତିଦ୍ବନ୍ଦିତା କରୁଛନ୍ତି। ଚଳିତ ନିର୍ବାଚନର ଶେଷ ପର୍ଯ୍ୟାୟରେ ମେ ୧୯ ତାରିଖରେ ବାରଣାସୀରେ ନିର୍ବାଚନ ଅନୁଷ୍ଠିତ ହେବ।
