ପୋଲିଓ କର୍ମୀଙ୍କ ଉପରେ ବର୍ଦ୍ଧିତ ଆକ୍ରମଣ କାରଣରୁ ପୋଲିଓ ମିଶନ ବନ୍ଦ କରିଛି ପାକିସ୍ତାନ। ବିଗତ ୭ ବର୍ଷ ମଧ୍ୟରେ ଟୀକାକରଣ ନିମନ୍ତେ ଆସୁଥିବା ୬୮ କର୍ମୀଙ୍କ ପ୍ରାଣହାନି ପରେ ପାକିସ୍ତାନ ସରକାର ଏହି ନିଷ୍ପତ୍ତି ନେଇଛନ୍ତି। ୨୦୧୨ପରଠାରୁ ଦେଶର ବିଭିନ୍ନ ସ୍ଥାନରେ କର୍ମୀଙ୍କ ଉପରେ ହୋଇଥିବା ଆକ୍ରମଣରେ ୬୮ ଜଣ କର୍ମୀ ପ୍ରାଣ ହରାଇଥିବା ବେଳେ ଅନେକ କର୍ମୀ ଆହତ ହୋଇଛନ୍ତି। ପାକିସ୍ତାନରେ ୩.୯କୋଟି ପିଲାଙ୍କୁ ପୋଲିଓ ଟୀକାକରଣ ପାଇଁ ଯୋଜନା ରଖାଯାଇଥିବା ବେଳେ ଏ ନେଇ ୨ଲକ୍ଷ ୬୦ହଜାର ଟୀକାକରଣ କର୍ମୀଙ୍କୁ ନିଯୁକ୍ତ କରାଯାଇଥିଲା। ପେଶାଓ୍ବାରରେ ଟୀକାକରଣ ପରେ କିଛି ଶିଶୁ ଅସୁସ୍ଥ ହୋଇ ପଡିବା ପରେ କର୍ମୀଙ୍କ ଉପରେ ଆକ୍ରମଣ ଜୋରଦାର ହୋଇଥିଲା। ଉତ୍ତର ପଶ୍ଚିମ ପାକିସ୍ତାନରେ କିଛି କର୍ମୀଙ୍କୁ ଅଜଣା ଆତତାୟୀ ଗୁଳି କରି ହତ୍ୟା କରିବା ପରେ ସରକାର ଏହି ନିଷ୍ପତ୍ତି ନେଇଛନ୍ତି। ସେହିପରି ପୋଲିଓ ଅଭିଯାନକୁ ବନ୍ଦ କରିବା ପାଇଁ ବିପକ୍ଷ ଗୋଷ୍ଠୀଙ୍କର ଏହା ଚକ୍ରାନ୍ତ ବୋଲି କହିବା ସହିତ ଖୁବ୍ ଶୀଘ୍ର ଏହି ପ୍ରକ୍ରିୟା ପୁନର୍ବାର ଆରମ୍ଭ କରାଯିବ ବୋଲି ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ କହିଛନ୍ତି।
polio mission postpones in pakistan due to attacked on polio workers