ଭୁବନେଶ୍ୱର: ଭୁବନେଶ୍ୱର ଏମ୍ସ ଇଏନଟିରେ ଅନୁବୁତି ଚାରିଟେବୁଲ ଟ୍ରଷ୍ଟ ଫାଉଣ୍ଡେସନ ଏବଂ କୋକ୍ଲିୟର କ୍ରୁଜ୍ ସହଯୋଗରେ ଷଷ୍ଠ ଆନ୍ତର୍ଜାତୀୟ କୋକ୍ଲିୟର ସମ୍ମିଳନୀ ଅନୁଷ୍ଠିତ ହୋଇ ଯାଇଛି। ଏହି ଅବସରରେ ଭାରତ ତଥା ବିଦେଶର ଡାକ୍ତରମାନଙ୍କୁ କୋକ୍ଲିୟର ପ୍ରତିରୋପଣ ସର୍ଜରୀର ତାଲିମ ଦିଆଯାଇଛି। ଏହି ସର୍ଜରୀ ଦ୍ୱାରା ଶିଶୁଙ୍କ ଠାରୁ ବୟସ୍କଙ୍କ ପର୍ଯ୍ୟନ୍ତ ଯେଉଁମାନେ ଶ୍ରବଣ ଶକ୍ତି ହରାଇଛନ୍ତି ସେମାନେ ପୁନର୍ବାର ସେମାନଙ୍କର ଶ୍ରବଣଶକ୍ତି ଫେରିପାଆନ୍ତି। ଭୁବନେଶ୍ୱର ଏମ୍ସର ଇଏନଟି ବିଭାଗ ଏହି କାର୍ଯ୍ୟରେ ସକ୍ରିୟ ଭାବରେ ଜଡିତ ରହିଛି ଓ ଅନେକ କୁନିପିଲା ଓ ବୟସ୍କଙ୍କୁ ଶ୍ରବଣଶକ୍ତି ଉପହାର ଦେଇଛି।
ଏହି ଅବସରରେ ‘ନୀରବତାର ଶବ୍ଦ: ବଧିରତା ବିରୋଧରେ ଲଢ଼ନ୍ତୁ’ ଶୀର୍ଷକରେ ମେ ଫେୟାର ସମ୍ମିଳନୀ କକ୍ଷରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ଏହାସହ କୋକ୍ଲିୟର ପ୍ରତ୍ୟାରୋପଣ ସମ୍ପର୍କିତ ଏକ ପୁସ୍ତକ ମଧ୍ୟ ଲୋକାର୍ପିତ ହୋଇଥିଲା।
ତେବେ ଏହି କୋକ୍ଲିୟର ଚିକିତ୍ସା ଦ୍ୱାରା ଶ୍ରବଣଶକ୍ତି ଫେରି ପାଇଥିବା ଶିଶୁମାନେ ଏବେ ସାଧାରଣ ଶିଶୁମାନଙ୍କ ଭଳି ବିଦ୍ୟାଳୟକୁ ଯାଉଛନ୍ତି ଏବଂ ଗୀତ, ବକ୍ତୃତା ଆଦି ପ୍ରଦାନ କରି ମାନ୍ୟଗଣ୍ୟ ବ୍ୟକ୍ତିଙ୍କ ଦ୍ୱାରା ପୁରସ୍କୃତ ହୋଇଛନ୍ତି। ସେହପରି ସ୍ୱାସ୍ଥ୍ୟସେବାରେ ଉତ୍କୃଷ୍ଟତା ଦେଖାଇଥିବା ଦେଶ ବିଦେଶର ଡାକ୍ତରମାନେ ମଧ୍ୟ ସମ୍ମାନିତ ହୋଇଥିଲେ। ଏହି ଅବସରରେ ଗରୀବ ଓ ଅଭାବୀ ରୋଗୀଙ୍କୁ ମାଗଣା ଶ୍ରବଣ ଯନ୍ତ୍ର ବଣ୍ଟନ କରାଯାଇଥିଲା।
ଏହି କାର୍ଯ୍ୟକ୍ରମରେ ରାଜ୍ୟ ସ୍ୱାସ୍ଥ୍ୟ ଓ ପରିବାରକଲ୍ୟାଣ ମନ୍ତ୍ରୀ ନବକିଶୋର ଦାସ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଅଭିନେତା ତଥା ସମାଜସେବୀ ସବ୍ୟସାଚ୍ଚୀ ମିଶ୍ର ସମ୍ମାନିତ ଅତିଥୀ ଭାବେ ଯୋଗ ଦେଇଥିଲେ।
ଭୁବନେଶ୍ୱର ପାଠ୍ୟକ୍ରମ ସଂଯୋଜକ ଡ. ସି ପ୍ରିତମ, ଜୟପୁରର ଡ. ମୋହନିଶ ଗ୍ରୋଭର ଏବଂ ବିକାନିରର ଡ. ଗୌରବ ଗୁପ୍ତା ପ୍ରମୁଖ ଏହି ଚିକତ୍ସା ଉପରେ ଆଲୋକପାତ କରିଥିବା ବେଳେ ଭାରତରେ ଶ୍ରବଣଶକ୍ତି ହ୍ରାସ ପାଇବା ପ୍ରାୟ ୬.୩ ପ୍ରତିଶତ ବୋଲି କହିଥିଲେ। ତେବେ ଜନ୍ମ ହୋଇଥିବା ପ୍ରତି ହଜାରେ ଶିଶୁଙ୍କ ମଧ୍ୟରେ ମାତ୍ର ୪ ଜଣ କୋକ୍ଲିୟର ପ୍ରତ୍ୟାରୋପଣ ଆବଶ୍ୟକ କରନ୍ତି ବୋଲି ବରିଷ୍ଠ ଚିକିତ୍ସକମାନେ ମତ ପ୍ରକାଶ କରିଥିଲେ। ତେବେ ଓଡିଶାରେ ପ୍ରଥମ ଥର ପାଇଁ ଏଭଳି ଏକ ପାଠ୍ୟକ୍ରମ ଆୟୋଜନ କରାଯାଉଛି।
