ଭୁବନେଶ୍ୱର: କରୋନା ଯୋଗୁ ଶିକ୍ଷାଦାନ ବାଧାପ୍ରାପ୍ତ ହୋଇଥିବାରୁ ତାହାକୁ ଲର୍ଣ୍ଣିଙ୍ଗ ରିକଭରି ପ୍ରୋଗ୍ରାମ ମାଧ୍ୟମରେ ରାଜ୍ୟ ସରକାର ବିଦ୍ୟାଳୟରେ ପାଠ ପଢାଇବା ପାଇଁ ଘରୋଇ ସଂସ୍ଥାକୁ ଆପଣେଇବାକୁ ଯେଉଁ ପ୍ରୟାସ କରିବାକୁ ଯାଉଛନ୍ତି ତାହାକୁ ଓଡ଼ିଶା କନିଷ୍ଠ ଶିକ୍ଷକ ସଂଘ ଦୃଢ ବିରୋଧ କରିବା ସହ ଆବଶ୍ୟକ ଭିତ୍ତିଭୂମିର ସୁଦୃଢୀକରଣ ଓ କନିଷ୍ଠ ଶିକ୍ଷକ ନିଯୁକ୍ତ କରି ଶିକ୍ଷାଦାନ ପ୍ରକ୍ରିୟାକୁ ସହଜ ଓ ସରଳୀକରଣ କରିବା ପାଇଁ ଦାବି ଉପସ୍ଥାପନ କରୁଛି। ବିଗତ ଦିନମାନଙ୍କରେ କରୋନାର ପ୍ରଭାବ କିଛି ମାତ୍ରାରେ କମିବା ପରେ ଶିକ୍ଷକମାନେ ଘର ଘର ବୁଲି ଶିକ୍ଷାର୍ଥୀମାନଙ୍କୁ ଶିକ୍ଷାଦାନ କରିବା ସହ ଦୀର୍ଘ ୨ ମାସ ହେବ ବିଦ୍ୟାଳୟରେ ଶିକ୍ଷାଦାନ କରି ଏଫ୍ଏଲଏନ୍, ଏଲ୍ଇପି ଭଳି କାର୍ଯ୍ୟକ୍ରମ କରିଆସୁଛନ୍ତି। ନିର୍ଦ୍ଧାରିତ ସମୟଠାରୁ ଅଧିକ ସମୟ ଧରି ଶିକ୍ଷାଦାନ କରିବା ସହ ଶିକ୍ଷାର୍ଥୀମାନଙ୍କର କିପରି ଶୈକ୍ଷିକସ୍ତର ବୃଦ୍ଧି ଘଟିବ ତାହାକୁ ଗୁରତ୍ୱର ସହ ନେଇ ଶିକ୍ଷାଦାନ କରାଯାଉଛି। କୋଭିଡ଼ ସଚେତନତା ସହ ଅଂଶୁଘାତରୁ ରକ୍ଷା ପାଇବା ପାଇଁ ବିଭିନ୍ନ କୌଶଳମାନ ଶିକ୍ଷା ଦିଆଯାଉଛି।
ଅନେକ ଶିକ୍ଷକ ଶିକ୍ଷୟିତ୍ରୀମାନଙ୍କ ଦ୍ୱାର ୟୁ-ଟୁବ ଅନଲାଇନ କ୍ଲାସ ମାଧ୍ୟମରେ ଶିକ୍ଷାଦାନ କରି ଶିକ୍ଷାଦାନ କାର୍ଯ୍ୟକ୍ରମକୁ ଆଗକୁ ନିଆଯାଇଥିଲା। ରାଜ୍ୟର ଶିକ୍ଷକ ଶିକ୍ଷୟିତ୍ରୀ ଶିକ୍ଷାଦାନ କ୍ଷେତ୍ରରେ ହେଉ ଅବା ସଚେତନତା କ୍ଷେତ୍ରରେ କୌଣସି ଗୁଣରେ ଘରୋଇ ସଂସ୍ଥାଠାରୁ କମ୍ ନଥିବା ସତ୍ତ୍ୱେ ସରକାର କାହିଁକି ଶିକ୍ଷାକ୍ଷେତ୍ରକୁ ଘରୋଇ ସଂସ୍ଥାକୁ ଟେକି ଦେବାର ହୀନ ମାନସିକତା କରୁଛନ୍ତି ବୋଲି ସଂଘ ପ୍ରଶ୍ନ କରିଛି। ଶିକ୍ଷକ ଅଭାବକୁ ପୂରଣ ନକରି ଏବଂ ଭିତ୍ତିଭୂମି ସୁଦୃଢ ନକରି ଶିକ୍ଷା ବ୍ୟବସ୍ଥାକୁ ଘରୋଇକରଣ କଲେ ଶିକ୍ଷାର ଅଗ୍ରଗତି ଅସମ୍ଭବ ବୋଲି ସଂଘ ଯୁକ୍ତି ବାଢିଛି। ତେଣୁ ପ୍ରାଥମକତା ଭିତ୍ତିରେ ଉଚ୍ଚ ବିଦ୍ୟାଳମାନଙ୍କ ପରି ପ୍ରାଥମିକ ବିଦ୍ୟାଳୟକୁ ଆଦର୍ଶ ବିଦ୍ୟାଳୟରେ ପରିଣତ କରି ଭିତ୍ତଭୂମି ସୁଦୃଢ କରିବା ସହ ଶିକ୍ଷକ ନିଯୁକ୍ତି କଲେ ଶିକ୍ଷାର ମାନବୃଦ୍ଧି ହେବା ସହ ସରକାରଙ୍କର ମହତ୍ତ୍ୱ ଉଦ୍ଦେଶ୍ୟ ସାଧନ ହେବ ବୋଲି ସଂଘ ଦାବି କରିଛି।
ବର୍ତ୍ତମାନସ୍ଥିତିରେ ରାଜ୍ୟରେ ମୁଣ୍ଡଫଟା ଖରା ଜାରି ରହିଥିବା ବେଳେ ଆଗକୁ ଆହୁରି ବଢିବାର ସମ୍ଭାବନା ସରକାରଙ୍କ ପାଣିପାଗ ବିଭାଗ ନିଶ୍ଚିତ କରିଛି। ରାଜ୍ୟରେ ବର୍ତ୍ତମାନ ୧୫ରୁ ଅଧିକ ସହରର ତାପମାତ୍ରା ୪୦ ଡିଗ୍ରୀ ଟପିଲାଣି ବୋଲି ପାଣିପାଗ ବିଭାଗ ଠାରୁ ସୂଚନା ମିଳିଛି। ଏହି ସମୟରେ ସକରାର ଛୋଟ ଛୋଟ ପିଲାମାନଙ୍କର ସ୍ୱାସ୍ଥ୍ୟପ୍ରତି ସଚେତନ ହେବାର ସର୍ବାଧିକ ଆବଶ୍ୟକତା ରହିଛି। ରାଜ୍ୟର ଅର୍ଦ୍ଧାଧିକ ବିଦ୍ୟାଳୟରେ ବିଦ୍ୟୁତ୍ ସଂଯୋଗ ହୋଇନାହିଁ କି ଅଂଶୁଘାତକୁ ଦୃଷ୍ଟିରେ ରଖି ବିଦ୍ୟାଳୟରେ କୌଣସି ବ୍ୟବସ୍ଥା କରାଯାଇନାହିଁ। ସହରାଞ୍ଚଳକୁ ଛାଡ଼ିଦେଲେ ଗ୍ରାମାଞ୍ଚଳ ଓ ଉପାନ୍ତ ଅଞ୍ଚଳରେ ପିଲାମାନେ ଏବଂ ଜନସାଧାରଣ ଅଂଶୁଘାତକୁ ନେଇ ସଚେତନ ନାହାଁନ୍ତି। ତେଣୁ ବିଦ୍ୟାଳୟ ଖୋଲିବା ପରେ ପ୍ରଥମ କାଳାଂଶକୁ ବ୍ରିଜ କୋର୍ସ ବା ଲର୍ଣ୍ଣିଂ ରିକଭରି ପାଠ ପଢାଇବା ପରେ ଅନ୍ୟ ବିଷୟଗୁଡ଼ିକୁ ଶିକ୍ଷାଦାନ କଲେ ଭଲ ହେବ ବୋଲି ସଂଘ ମତବ୍ୟକ୍ତ କରିଛି। ଅଭିଭାବକ ଓ ଛାତ୍ରଛାତ୍ରୀମାନେ ଖରାଛୁଟି ବନ୍ଦ ହବାକୁ ନେଇ ବିଭିନ୍ନ ସ୍ଥାନରେ ତୀବ୍ର ଅସନ୍ତୋଷ ପ୍ରକାଶ କରୁଥିବା ନଜରକୁ ଆସୁଛି।
ତେଣୁ ଏ ସମସ୍ତ ବିଷୟକୁ ସରକାର ସହୃଦୟତାର ସହ ବିଚାର କରି ନେଇଥିବା ନିଷ୍ପତ୍ତିର ପୁନର୍ବିଚାର କରିବା ପାଇଁ ଓଡ଼ିଶା କନିଷ୍ଠ ଶିକ୍ଷକ ସଂଘ ସାଭପତି ଶ୍ରୀ ଅକ୍ଷୟ କୁମାର ପାଢୀ, ସମ୍ପାଦକ ନେତ୍ରାନନ୍ଦ ପ୍ରଧାନ, ମହାସଚିବ ଆଦିତ୍ୟ ନାରାୟଣ ସ୍ୱାଇଁଙ୍କ ସମେତ ଅନ୍ୟାନ୍ୟ କର୍ମକର୍ତ୍ତାମାନେ ପ୍ରେସ୍ ବିବୃତ୍ତି ମାଧ୍ୟମରେ ଜଣାଇଛନ୍ତି।