ଭୁବନେଶ୍ୱର: ସମ ଅଲ୍ଟିମେଟ ମେଡିକେୟାରର କ୍ରିଟିକାଲ୍ କେୟାର ବିଭାଗ ମୁଖ୍ୟ ଡାକ୍ତର ବାନାମ୍ବର ରାୟଙ୍କୁ ଗତ ମେ ୫ ତାରିଖ ଦିନ ଗଙ୍ଗା ଆନେସ୍ଥେସିଆ ରିଫ୍ରେଶର କୋର୍ସ (ଗାର୍କ)ର ସ୍ୱତନ୍ତ୍ର କାର୍ଯ୍ୟକ୍ରମରେ ସମ୍ମାନଜନକ ମେଂଟର ଆୱାର୍ଡରେ ସମ୍ବର୍ଦ୍ଧିତ କରାଯାଇଛି।
କୋଏମ୍ବାଟୁର ସ୍ଥିତ ଗଙ୍ଗା ହସ୍ପିଟାଲ୍ରେ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଏହି ସମ୍ମାନ ଗ୍ରହଣ କରିଛନ୍ତି ଡାକ୍ତର ରାୟ। ଆନେସ୍ଥେସିଆରେ ପ୍ରଥମ ଥର ପାଇଁ ଏହି ଆୱାର୍ଡ ଦିଆଯାଇଛି।
ଡାକ୍ତର ରାୟଙ୍କ ସମେତ ଅନ୍ୟ ଚାରି ଜଣ ଡାକ୍ତରଙ୍କୁ ମଧ୍ୟ ଏହି ସମ୍ମାନ ପ୍ରଦାନ କରାଯାଇଛି। ସେମାନେ ହେଲେ କୋଲକାତାର ବ୍ରିଗେଡିୟର ଆର.ସେଟଲୁର, ଲୁଧିଆନାର ଡାକ୍ତର ଅଭତାର ସିଂହ, ମୁମ୍ବାଇର ଡାକ୍ତର ଦିପଙ୍କର ଦାସଗୁପ୍ତା ଏବଂ ଚେନ୍ନାଇର ଡାକ୍ତର ଭି. ନାଗାସ୍ୱାମୀ।
ଦୀର୍ଘ ବର୍ଷ ଧରି କାର୍ଯ୍ୟଶୈଳୀର ଗୁଣାବତା ଏବଂ ନିଜ ସହକର୍ମୀ ଓ ଛାତ୍ରଛାତ୍ରୀମାନଙ୍କ ସହିତ ବୃତ୍ତିଗତ ଉତ୍କର୍ଷତାକୁ ଅନୁଧ୍ୟାନ କରି ଏହି ସମ୍ମାନ ପ୍ରଦାନ କରାଯାଇଛି।
“ଆନେସ୍ଥେସିଆ ଲିଡରସିପ୍ ସମିଟ” ନାମରେ ଆୟୋଜିତ ହୋଇଥିବା ଏହି ସମ୍ମାନସ୍ପଦ ଉତ୍ସବରେ ଆନେସ୍ଥେସିଓଲୋଜି କ୍ଷେତ୍ରର ପ୍ରତିଷ୍ଠିତ ବ୍ୟକ୍ତି ବିଶେଷ ଏବଂ ରୋଗୀ ସେବା କ୍ଷେତ୍ରରେ ଆଗଧାଡିରେ ଥିବା ବିଚକ୍ଷଣ ବ୍ୟକ୍ତିମାନେ ଏହି କାର୍ଯ୍ୟକ୍ରମରେ ସାମିଲ ହୋଇଥିଲେ।