ସମୀକ୍ଷା ବ୍ୟୁରୋ
ନିର୍ବାଚନରେ ବିଜେପି ନେତା ଟଙ୍କା ବାଣ୍ଟୁଥିବାର ଅଭିଯୋଗ ଆଣି ଆକ୍ରମଣ କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଜେଡ୍ ପ୍ଲସ୍ ସୁରକ୍ଷା ବ୍ୟବସ୍ଥା ମଧ୍ୟରେ ବିଜେପି ନେତା ଅର୍ଥ ବାଣ୍ଟୁଛନ୍ତି ବୋଲି ଶୁକ୍ରବାର ଅଭିଯୋଗ କରିଛନ୍ତି ମମତା । ଚିତ୍ରଗୁଡାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହେଲିକପ୍ଟରରୁ କଳାବାକ୍ସ ନେଇ ଚର୍ଚ୍ଚା ଲାଗି ରହିଥିବା ବେଳେ ଗତକାଲି ଘୋଟାଲାରୁ ବିଜେପି ପ୍ରାର୍ଥୀ ଭାରତୀ ଘୋଷଙ୍କ କାରରୁ ୧ ଲକ୍ଷ ୧୩ହଜାର ୮୯୫ ଟଙ୍କା ଉଦ୍ଧାର କରାଯିବା ଏହାର ସ୍ପଷ୍ଟ ପ୍ରମାଣ ବୋଲି ମମତା କହିଛନ୍ତି । ବିଜେପି ନେତାଙ୍କୁ ଜେଡ୍ ପ୍ଲସ୍ ସୁରକ୍ଷା ମିଳିଥିବାରୁ ସେମାନେ ସହଜରେ ସୁରକ୍ଷା ବ୍ୟବସ୍ଥାକୁ ପାର ହୋଇ ଅର୍ଥ ବାଣ୍ଟିବାରେ ସଫଳ ହେଉଛନ୍ତି ବୋଲି ଅଭିଯୋଗ କରିଛନ୍ତି ମମତା । ଉତ୍ତର ୨୪ ପ୍ରଗଣାର ଅଶୋକ ନଗରରେ ଏକ ନିର୍ବାଚନୀ ରାଲିରେ ଅଭିଭାଷଣ ପ୍ରଦାନ ସମୟରେ ମମତା ଏହି ଅଭିଯୋଗ ଉଠାଇଥିଲେ । ଉଲ୍ଲେଖଯୋଗ୍ୟ ଯେ, କେନ୍ଦ୍ର ସରକାରଙ୍କ ପକ୍ଷରୁ ନିକଟରେ ୧୦ ଜଣ ପଶ୍ଚିମବଙ୍ଗ ନେତାଙ୍କୁ ଜେଡ୍ ଏବଂ ଓ୍ବାଇ ଶ୍ରେଣୀର ସୁରକ୍ଷା ବ୍ୟବସ୍ଥା ପ୍ରଦାନ କରାଯାଇଥିଲା ।