ନୂଆଦିଲ୍ଲୀ: ଜାତୀୟ ରାଜପଥ ପ୍ରାଧିକରଣ ପକ୍ଷରୁ ସ୍ୱାଧୀନତାର ୭୫ବର୍ଷ ପୂର୍ତ୍ତି ଉପଲକ୍ଷେ ଆଜାଦି କା ଅମୃତ ମହୋତ୍ସବ ପାଳନ ଅବସରରେ ଏକ ବିଶେଷ ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ପରିପ୍ରେକ୍ଷୀରେ ଗୋଟିଏ ଦିନରେ ଏକାକାଳୀନ ଜାତୀୟ ରାଜପଥର ଚାରୋଟି ସ୍ଥାନରେ ପ୍ରାୟ ୧୦୦୦ରୁ ଅଧିକ ବୃକ୍ଷରୋପଣ କରାଯାଇଛି। ଏ ପ୍ରକାର ଅଭିଯାନ ରାଷ୍ଟ୍ରବ୍ୟାପୀ ୧୦୦ଟି ଭିନ୍ନଭିନ୍ନ ସ୍ଥାନରେ ସଂଗଠିତ ହେଉଛି।
ଓଡିଶାର ବ୍ରାହ୍ମଣୀ ବାଏପାସର ରାଜାମୁଣ୍ଡା, ଟାଙ୍ଗି-ଭୁବନେଶ୍ୱର, ବାହାରଗୋଡା-ସିଙ୍ଗେଡା ଏବଂ ତେଲେଇବଣୀ-ସମ୍ବଲପୁର ଅଞ୍ଚଳରେ ଅନୁଷ୍ଠିତ ଏହି ମେଗା କାର୍ଯ୍ୟକ୍ରମରେ ଜାତୀୟ ରାଜପଥ ପ୍ରାଧିକରଣର ମୁଖ୍ୟ କାର୍ଯ୍ୟାଳୟ ନୂଆଦିଲ୍ଲୀର ଅଧିକାରୀଙ୍କ ସମେତ ସ୍ଥାନୀୟ ଅଧିକାରୀମାନେ ଉପସ୍ଥିତ ଥିଲେ। ସମ୍ବନ୍ଧିତ ପ୍ରକଳ୍ପ ନିର୍ଦ୍ଦେଶକମାନଙ୍କ ଦ୍ୱାରା ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା।
ଏହା ବ୍ୟତୀତ ପିଆଇୟୁ-କେନ୍ଦୁଝର ଏବଂ ଭୁବନେଶ୍ୱରରେ ମଧ୍ୟ ସିଙ୍ଗେଡା-ବିଂଝାବାହଲ, ପାଣିକୋଇଲି-ରିମୁଲି ଏବଂ ଭୁବନେଶ୍ୱର-ପୁରୀ ଜାତୀୟ ରାଜପଥରେ ମଧ୍ୟ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ ହୋଇଛି। ସ୍ଥାନୀୟ ସ୍କୁଲ ଏବଂ କଲେଜର ଛାତ୍ରଛାତ୍ରୀମାନଙ୍କୁ ମଧ୍ୟ ସେମାନଙ୍କର ସାମାଜିକ, ବ୍ୟକ୍ତିଗତ ଓ ବୌଦ୍ଧିକ ବିକାଶର ଉନ୍ନତି ପାଇଁ ଏହି ସଚେତନତାଧର୍ମୀ କାର୍ଯ୍ୟକ୍ରମରେ ଅଂଶଗ୍ରହଣ କରିବାକୁ ପ୍ରେରିତ କରାଯାଇଥିଲା। ଏଥିସହ ସ୍ଥାନୀୟ ଲୋକମାନେ ମଧ୍ୟ ଅତ୍ୟନ୍ତ ଉତ୍ସାହର ସହ ଏହି ବୃକ୍ଷରୋପଣ କାର୍ଯ୍ୟକ୍ରମରେ ଭାଗ ନେଇ ଚାରାରୋପଣରେ ପରସ୍ପରକୁ ସାହାଯ୍ୟ କରିଥିଲେ।
ଏନ୍ଏଚଏଆଇର ବୃକ୍ଷରୋପଣ କାର୍ଯ୍ୟକ୍ରମରେ ଉଭୟ ସଡ଼କ ପାର୍ଶ୍ଵ ଏବଂ ମଧ୍ୟବର୍ତ୍ତୀ ସ୍ଥାନ ଅନ୍ତର୍ଭୁକ୍ତ। ଏହି କାର୍ଯ୍ୟକ୍ରମର ମୂଳ ଉଦ୍ଦେଶ୍ୟ ହେଉଛି ପରିବେଶ ପ୍ରଦୂଷଣ, ମୃତ୍ତିକା ଅବକ୍ଷୟ, ବିଶ୍ୱ ତାପନ ହ୍ରାସ ସହ ଜାତୀୟ ରାଜପଥ କଡ଼ରେ ପ୍ରକୃତିର ସୁନ୍ଦରତା ଓ ସନ୍ତୁଳନକୁ ବଜାୟ ରଖିବା। ବୃକ୍ଷଗୁଡ଼ିକ ମଧ୍ୟ ଯାନବାହନରୁ ନିର୍ଗତ ବିଷାକ୍ତ ଧୁଆଁ ଓ ଧୂଳିକୁ ଅବଶୋଷଣ କରିବା ସହ ପ୍ରଦୂଷଣ ହ୍ରାସ କରିବାରେ ସାହାଯ୍ୟ କରିବେ। ଲିମ୍ବ, ମହାଲିମ୍ବ, ଆଲଷ୍ଟୋନିଆ, ଟର୍ମିନାଲିଆ, ଲ୍ୟାଗରଷ୍ଟ୍ରୋମିଆ ଇତ୍ୟାଦି ଜାତୀୟ ଦୀର୍ଘ ଏବଂ ହୃଷ୍ଟପୃଷ୍ଟ ଚାରାଗୁଡ଼ିକ ଶବ୍ଦରୋଧୀ ଏବଂ ରାସ୍ତାରୁ ଧୂଳି ଅବଶୋଷଣକାରୀ ଭାବେ କାମ କରିଥାନ୍ତି।
ମଧ୍ୟମ ପ୍ରଜାତିର ଚାରା ଯଥା ବୌଗେନଭିଲେଆ, ସିଜେଲପିନିଆ ଓ ଟେକୋମା ରାତିରେ ବିପରିତ ଦିଗରୁ ଆସୁଥିବା ଅତ୍ୟୁଜ୍ଜ୍ୱଳ ଆଲୋକକୁ ଅବରୋଧ କରିବା ସହ ଯାତ୍ରୀମାନଙ୍କୁ ସୁନ୍ଦର ଦୃଶ୍ୟ ପ୍ରଦାନ କରିଥାନ୍ତି। ଏହି ଦିନିକିଆ କାର୍ଯ୍ୟକ୍ରମ ଅପରାହ୍ଣ ୪ଟା ସୁଦ୍ଧା ଶେଷ ହୋଇଥିଲା। ତେବେ ବାର୍ଷିକ ବୃକ୍ଷରୋପଣ କ୍ରିୟା ଯୋଜନା ୨୦୨୨-୨୩ର କାର୍ଯ୍ୟନ୍ୱୟନ ଦେଶର ବିଭିନ୍ନ ସ୍ଥାନରେ ଚଳିତ ବର୍ଷ ମୌସୁମୀ ଶେଷ ପର୍ଯ୍ୟନ୍ତ ଜାରୀ ରହିବ।
ଏନ୍ଏଚ୍ଏଆଇ ଓଡ଼ିଶାରେ ଚଳିତ ବିତ୍ତୀୟ ବର୍ଷ ୨୦୨୨-୨୩ରେ ଉଭୟ ମାର୍ଗରେ ତଥା ମଧ୍ୟାଞ୍ଚଳରେ ୩,୩୨,୧୦୦ ଟି ଚାରା ଲଗାଯିବାରକୁ ଲକ୍ଷ୍ୟ ଧାର୍ଯ୍ୟ କରିଥିଲା, ତନ୍ମଧ୍ୟରୁ ବର୍ତ୍ତମାନ ସୁଦ୍ଧା ୧,୨୫,୦୦୦ଟି ଚାରା ଏହି ବୃହତ୍ ଅଭିଯାନରେ ରୋପଣ କରାଯାଇଥିବା ଭାରତୀୟ ଜାତୀୟ ରାଜପଥ ପ୍ରାଧିକରଣର ମୁଖ୍ୟ ମହାପ୍ରବନ୍ଧକ ତଥା ଆଂଚଳିକ ଅଧିକାରୀ, ଓଡିଶା, ଡଃ ରାମ ପ୍ରସାଦ ପଣ୍ଡାଙ୍କଠାରୁ ପ୍ରକାଶ। ଅଧିକ ସୂଚନା ଦେଇ ସେ କହିଛନ୍ତି ଯେ ଓଡ଼ିଶାରେ ଏନ୍ଏଚ୍ଏଆଇ ପକ୍ଷରୁ ବିଗତ ଦୁଇ ବିତ୍ତୀୟ ବର୍ଷ ଯଥା ୨୦୨୦-୨୧ ଓ ୨୦୨୧-୨୨ରେ ଯଥାକ୍ରମେ ୧,୯୨,୬୧୧ ଏବଂ ୩,୭୮,୦୦୦ଟି ଚାରା ରୋପଣ କରାଯାଇଛି।