ନୂଆଦିଲ୍ଲୀ: ଉପରାଷ୍ଟ୍ରପତି ନିର୍ବାଚନରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଦଳ ଟିଏମସି ଭୋଟ୍ ପ୍ରକ୍ରିୟାରୁ ଦୂରେଇ ରହିବ। ବୈଠକ ପରେ ଟିଏମସି ସାଧାରଣ ସମ୍ପାଦକ ଅଭିଷେକ ବାନାର୍ଜୀ କହିଛନ୍ତି ଯେ ଅଧିକାଂଶ ସାଂସଦ ଏହି ପ୍ରସଙ୍ଗରେ ମମତା ବାନାର୍ଜୀଙ୍କୁ ଅନୁରୋଧ କରିଛନ୍ତି। ସେ କହିଛନ୍ତି ଯେ, ବିନା ପରାମର୍ଶରେ ବିରୋଧୀ ଦଳ ମାର୍ଗରେଟ୍ ଆଲଭାଙ୍କ ନାମ ଘୋଷଣା କରିଥିଲେ।
ଅଭିଷେକ ବାନାର୍ଜୀ କହିଛନ୍ତି, ମାର୍ଗରେଟ୍ ଅଲଭା ଏବଂ ମମତା ବାନାର୍ଜୀଙ୍କ ସମ୍ପର୍କ ଭଲ, କିନ୍ତୁ ବ୍ୟକ୍ତିଗତ ସମୀକରଣ ଆଧାରରେ ଦେଶର ଉପରାଷ୍ଟ୍ରପତି ନିର୍ବାଚନ କରାଯିବ ନାହିଁ। ଆମର ୮୫ ପ୍ରତିଶତ ସାଂସଦ ନିଷ୍ପତ୍ତି ନେଇଛନ୍ତି ଯେ, ଆମେ ଭୋଟ୍ ଦେବା ଠାରୁ ଦୂରେଇ ରହିବା ଉଚିତ୍।
ବାନାର୍ଜୀ କହିଛନ୍ତି ଯେ, ଅଧିକାଂଶ ସାଂସଦ ନିଷ୍ପତ୍ତି ନେଇଛନ୍ତି ଯେ, ଯେକୌଣସି ପ୍ରକାରେ ଏନଡିଏ ପ୍ରାର୍ଥୀ ଜଗଦୀପ ଧନଖଡଙ୍କୁ ସମର୍ଥନ କରିବୁ ନାହିଁ।
ଏଥି ସହିତ ଅଲଭାଙ୍କୁ ସମର୍ଥନ ନକରିବାକୁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ନିଷ୍ପତ୍ତି ବିରୋଧୀ ଶିବିର ପାଇଁ ଏକ ବଡ ପ୍ରତିବନ୍ଧକ ବୋଲି କୁହାଯାଉଛି।
ମଙ୍ଗଳବାର ଦିନ ଅଲଭା ତାଙ୍କ ନାମାଙ୍କନପତ୍ର ଦାଖଲ କରିଥିଲେ। ଟିଏମସି ପ୍ରତିନିଧୀମାନେ ମଧ୍ୟ ଏହି ସମୟରେ ଉପସ୍ଥିତ ନଥିଲେ। ଜୁଲାଇ ୧୭ ତାରିଖରେ ପ୍ରାର୍ଥୀ ବାଛିବା ପାଇଁ ବିରୋଧୀ ଦଳର ଏକ ବୈଠକ ଅନୁଷ୍ଠିତ ହୋଇଥିଲା। ଟିଏମସି ନେତାମାନେ ମଧ୍ୟ ଏହି ବୈଠକରେ ଯୋଗ ଦେଇନଥିଲେ। ତା’ପରେ ଏନସିପି ମୁଖ୍ୟ ଶରଦ ପାୱାର କହିଥିଲେ ଯେ, ଆମେ ମମତା ବାନାର୍ଜୀଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରିବୁ। ଉପରାଷ୍ଟ୍ରପତି ନିର୍ବାଚନ ପାଇଁ ମତଦାନ ଅଗଷ୍ଟ ୬ ତାରିଖରେ ଅନୁଷ୍ଠିତ ହେବ।
