ସୀତାରାମ ଅଗ୍ରୱାଲ
ବାଲୁଗାଁ: ଆଜି ପୂର୍ବାହ୍ନରେ ଚିଲିକାର ପୂର୍ବତନ ବିଧାୟକ ରଘୁନାଥ ସାହୁଙ୍କ ବିରୋଧରେ ଖୋର୍ଦ୍ଧା ଜିଲ୍ଲା ବାଲୁଗାଁ ଏନଏସି କାର୍ଯ୍ୟାଳୟରେ ଅଭିଯୋଗ କରାଯାଇଛି। ୧୦ ନମ୍ବର ୱାର୍ଡ ରାମପୁର ଗ୍ରାମର ଶତାଧିକ ବାସିନ୍ଦା ବାଲୁଗାଁ ଏନଏସିର କାର୍ଯ୍ୟନିର୍ବାହୀ ଅଧିକାରୀଙ୍କ ନିକଟରେ ଫେରାଦ ହୋଇ ପୂର୍ବତନ ବିଧାୟକଙ୍କ ବିରୋଧରେ ଏକ ଅଭିଯୋଗ ପତ୍ର ଦାଖଲ କରିଛନ୍ତି।
ଅଭିଯୋଗ ମୁତାବକ ରାମପୁର ଗ୍ରାମ ଦେଇ ଯାଇଥିବା ସରକାରୀ ନାଳ ପାର୍ଶ୍ୱରେ ପୂର୍ବତନ ବିଧାୟକ ଶ୍ରୀ ସାହୁଙ୍କ କାର୍ଯ୍ୟାଳୟ ଓ ଭଡ଼ା ଦେଇଥିବା ଗୋଦାମ ଗୃହ ଅବସ୍ଥିତ ହୋଇଥିବା ବେଳେ ଶ୍ରୀ ସାହୁ ନାଳକୁ ଜବରଦଖଲ କରି ଏକ ପ୍ରାଚୀର ନିର୍ମାଣ କରାଇଛନ୍ତି। ଯାହା ଦ୍ଵାରା ବର୍ଷା ଜଳ ନିଷ୍କାସନରେ ବାଧାପ୍ରାପ୍ତ ହୋଇ ଉକ୍ତ ଜଳ ୧୦ ନମ୍ବର ୱାର୍ଡ ମଧ୍ୟରେ ପ୍ରବେଶ କରୁଛି।
ଅନୁରୂପ ଭାବେ ପୂର୍ବତନ ବିଧାୟକ ରାମପୁର ଗ୍ରାମ ସରକାରୀ କଂକ୍ରିଟ ରୋଡ଼କୁ ଭାଙ୍ଗି ବେଆଇନ ଭାବେ ନିଜ କାର୍ଯ୍ୟାଳୟ ଓ ଗୋଦାମ ପାଇଁ ସ୍ଲାଇଡିଙ୍ଗ ଗେଟ ନିର୍ମାଣ କରୁଥିବାର ଅଭିଯୋଗ କରିଛନ୍ତି ଗ୍ରାମବାସୀ। ଗ୍ରାମବାସୀଙ୍କ କହିବା କଥା ସେମାନେ ପୂର୍ବତନ ବିଧାୟକଙ୍କୁ ଏ ଦୁଇଗୋଟି ବେଆଇନ ନିର୍ମାଣ କାର୍ଯ୍ୟ ବନ୍ଦ କରିବା ପାଇଁ କହିଥିଲେ ସୁଦ୍ଧା ଶ୍ରୀ ସାହୁ ତାହାକୁ ବେଖାତିର କରି ବେଆଇନ ନିର୍ମାଣ ଜାରି ରଖିଛନ୍ତି।
ଉକ୍ତ ବେଆଇନ କାର୍ଯ୍ୟ ବିରୁଦ୍ଧରେ ତଦନ୍ତ କରି ତୁରନ୍ତ ପ୍ରଶାସନ ଯଦି କାର୍ଯ୍ୟାନୁଷ୍ଠାନ ନ ନିଏ, ତେବେ ରାମପୁର ଗ୍ରାମବାସୀ ମାନେ ବାଣପୁର-ବାଲୁଗାଁ ରାସ୍ତା ଅବରୋଧ କରି ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।
ତେବେ ଏ ନେଇ ବାଲୁଗାଁ ଏନଏସି କାର୍ଯ୍ୟନିର୍ବାହୀ ଅଧିକାରୀ ପ୍ରାଣନାଥ ସେଠଙ୍କୁ ପଚାରିବାରୁ ସେ ସରକାରୀ ନାଳର ଡିମାର୍କେସନ ପାଇଁ ତହସିଲ ପ୍ରଶାସନକୁ ଚିଠି ଲେଖିବା ସହ ଏନଏସି ଜେଇ ଓ ଅମିନଙ୍କୁ ଉକ୍ତ ଅଞ୍ଚଳ ଯାଇ ତଦନ୍ତ କରି ରିପୋର୍ଟ ଦାଖଲ କରିବା ପାଇଁ ନିର୍ଦ୍ଦେଶ ଦେଇଥିବାର କହିଛନ୍ତି। ଯଦି ସେଠାରେ ବେଆଇନ ନିର୍ମାଣ ହେବା ନେଇ ରିପୋର୍ଟ ମିଳେ ତେବେ ପୂର୍ବତନ ବିଧାୟକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବା ନେଇ ଶ୍ରୀ ସେଠ କହିଛନ୍ତି।
ଅନୁରୂପ ଭାବେ ଏ ନେଇ ପୂର୍ବତନ ବିଧାୟକ ରଘୁନାଥ ସାହୁଙ୍କୁ ପଚାରିବାରୁ ସମସ୍ତ କାର୍ଯ୍ୟ ଆଇନ ଅନୁଯାୟୀ ହୋଇଛି ଏବଂ ସରକାରୀ ଜାଗା ଜବରଦଖଲ ହୋଇନଥିବାର କହିଛନ୍ତି। ଏପରିକି ପୁର୍ବରୁ ଉକ୍ତ ସ୍ଥାନ ଏନଏସି କାର୍ଯ୍ୟନିର୍ବାହୀ ଅଧିକାରୀ ଏବଂ ଜେଇ ପରିଦର୍ଶନ କରି କିଛି ଆପତ୍ତି ନଥିବା କହିଥିଲେ ଏବଂ ଯଦି ଚାହୁଁଛନ୍ତି ତେବେ ପୁନର୍ବାର ମଧ୍ୟ ଉକ୍ତ ସ୍ଥାନ ପ୍ରଶାସନ ଯାଞ୍ଚ କରିପାରିବ ବୋଲି ଶ୍ରୀ ସାହୁ କହିଛନ୍ତି।
