ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଗାନ୍ଧିନଗର ସ୍ଥିତ ଗିଫ୍ଟସିଟିରେ ଇଣ୍ଟର ନେଶନାଲ ଫାଇନାନ୍ସିଆଲ ସର୍ଭିସ ସେଣ୍ଟର ଅଥରିଟି (ଆଇଏଫ୍ଏସ୍ସିଏ) ସଦର କାର୍ଯ୍ୟାଳୟର ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ଏହି ଅବସରରେ ସେ ମଧ୍ୟ ଗିଫ୍ଟ-ଆଇଏଫ୍ଏସ୍ସିରେ ଭାରତ ପ୍ରଥମ ଆନ୍ତର୍ଜାତିକ ବୁଲିୟନ ଏକ୍ସଚେଞ୍ଜ (ଆଇଆଇବିଏକ୍ସ)ର ଶୁଭାରମ୍ଭ କରିଛନ୍ତି। ଏହାଛଡା ପ୍ରଧାନମନ୍ତ୍ରୀଙ୍କ ଦ୍ୱାରା ମଧ୍ୟ ନେଶନାଲ ଷ୍ଟକ ଏକ୍ସଚେଞ୍ଚର ଆଇଏଫ୍ଏସ୍ସି ଏସ୍ଜିଏକ୍ସ କନେକ୍ଟର ଶୁଭାରମ୍ଭ କରାଯାଇଛି।
ଏହି କାର୍ଯ୍ୟକ୍ରମରେ ଗୁଜରାଟର ମୁଖ୍ୟମନ୍ତ୍ରୀ ଭୂପେନ୍ଦ୍ର ଭାଇ ପଟେଲ, କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମନ ଓ ଅନ୍ୟାନ୍ୟ କେନ୍ଦ୍ର ଓ ରାଜ୍ୟମନ୍ତ୍ରୀ, କୂଟନୀତିଜ୍ଞ, ବିଶିଷ୍ଟ ବ୍ୟବସାୟୀ ଓ ଉଦ୍ୟୋଗଜଗତର ନେତାଗଣ ଉପସ୍ଥିତ ଥିଲେ।
ପ୍ରଧାନମନ୍ତ୍ରୀ ତାଙ୍କ ଭାଷଣରେ କହିଥିଲେ ଯେ ଆଜିର ଦିନଟି ଭାରତର କ୍ରମବର୍ଦ୍ଧିଷ୍ଣୁ ଅର୍ଥନୀତି ଓ ଟେକ୍ନୋଲୋଜି ଶକ୍ତି ପାଇଁ ବିଶେଷ ଗୁରୁତ୍ୱପୂର୍ଣ୍ଣ। ଭାରତ ଉପରେ ବିଶ୍ୱର ବିଶ୍ୱାସ ବୃଦ୍ଧିକୁ ଏହା ପ୍ରମାଣିତ କରୁଛି। ଆଜି ଗିଫ୍ଟ ସିଟିରେ ଆଇଏଫ୍ଏସ୍ସିଏର ସଦର କାର୍ଯ୍ୟାଳୟର ଭିତ୍ତିପ୍ରସ୍ତର ସ୍ଥାପିତ ହୋଇଛି। ଏହି ଭବନ ଦେଖିବାକୁ ଯେପିର ଅତି ପ୍ରକାଣ୍ଡ ଓ କମନୀୟ ହେବ, ଭାରତକୁ ବିଶ୍ୱର ଏକ ପ୍ରମୁଖ ଆର୍ଥିକ ଶକ୍ତିରେ ପରିଣତ କରିବାରେ ସେପରି ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବ ବୋଲି ମୋର ଆଶା। ଏହି ସଂଗଠନ ଇନୋଭେସନକୁ ପ୍ରୋତ୍ସାହିତ କରି ଅଭିବୃଦ୍ଧିର ବାହକ ହେବ। ଆଜି ଯେଉଁ ପ୍ରତିଷ୍ଠାନ ଓ ଫ୍ଲାଟଫର୍ମ ସବୁ ଉଦ୍ଘାଟିତ ହୋଇଛି ତାହା ୧୩୦କୋଟି ଭାରତୀୟଙ୍କୁ ଆଧୁନିକ ବିଶ୍ୱ ଅର୍ଥନୀତି ସହ ସଂଯୁକ୍ତ କରିବ। ଏବେ ବିଶ୍ୱ ଅର୍ଥନୀତିକୁ ଦିଗ୍ଦର୍ଶନ କରୁଥିବା ଆମେରିକା, ବ୍ରିଟେନ ଓ ସିଙ୍ଗାପରୁ ଭଳି ରାଷ୍ଟ୍ରଙ୍କ ଗହଣରେ ସାମିଲ ହେବାକୁ ଭାରତ ଆରମ୍ଭ କରୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି।
ଗିଫ୍ଟସିଟି ସମ୍ପର୍କରେ ପ୍ରଧାନମନ୍ତ୍ରୀ କହିଛନ୍ତି ଯେ ଏହା କେବଳ ବେପାର ବଣିକ ପାଇଁ ଉଦ୍ଦିଷ୍ଟ ନୁହେଁ। ମୂଳରୁ ଏହା ସହିତ ଦେଶର ସାଧାରଣ ଜନତାଙ୍କ ଆଶା ଆକାଂକ୍ଷା ପୂରଣ କରିବାର ଲକ୍ଷ୍ୟ ନିହିତ। ଭାରତର ଭବିଷ୍ୟତର ଲକ୍ଷ୍ୟ ଗିଫ୍ଟି ସିଟି ସହିତ ସମ୍ପୃକ୍ତ ଏବଂ ଭାରତର ସ୍ୱର୍ଣ୍ଣିମ ଅତୀତର ସ୍ୱପ୍ନ ମଧ୍ୟ ଏହା ସହ ଜଡିତ।
ପ୍ରଧାନମନ୍ତ୍ରୀ କହିଥିଲେ ଯେ ୨୦୦୮ରେ ସମଗ୍ର ବିଶ୍ୱ ଯେତେବେଳେ ଗୁରୁତର ଆର୍ଥିକ ମାନ୍ଦାବସ୍ଥାର ସମ୍ମୁଖୀନ ହୋଇଥିଲା ସେତେବେଳେ ଭାରତରେ ନୀତିଗତ ପକ୍ଷାଘାତର ସ୍ଥିତି ଦେଖାଦେଇଥିଲା। ମାତ୍ର ସେହି ସମୟରେ ଗୁଜରାଟ ନୂଆ ପଦକ୍ଷେପ ମାନ ଗ୍ରହଣ କରିଥିଲା। ଫିନ୍ଟେକ କ୍ଷେତ୍ରରେ ନୂଆ ପ୍ରୟାସ ବଡ ପରିବର୍ତ୍ତନ ଆଣିବାରେ ସଫଳ ହୋଇଥିଲା। ସେହି ବିଚାର ଓ ପ୍ରୟାସ ସଫଳ ହୋଇ ଆଜି ଏହି ସ୍ଥିତିରେ ପହଞ୍ଚିଥିବାରୁ ମୁଁ ଆନନ୍ଦିତ।
ସେ ଆହୁରି କହିଥିଲେ ଯେ ଗିଫ୍ଟସିଟି ଏବେ ବାଣିଜ୍ୟ ଓ ଟେକ୍ନୋଲୋଜିର ଏକ ସଫଳ ହକ୍ ଭାବେ ନିଜର ସ୍ଥିତି ଜାହିର କରିଛି। ଏଥିରେ ଉଭୟ ଧନ ଓ ଜ୍ଞାନର ଉପାସନା କରାଯାଉଛି। ଏହା ବୈଶ୍ୱିକ ସେବା ଯୋଗାଣ କ୍ଷେତ୍ରରେ ଭାରତକୁ ଅଗ୍ରଗାମୀ କରାଇବା ନିଶ୍ଚିତ ଆନନ୍ଦର ବିଷୟ। ଏଠାରେ ବିଶ୍ୱର ଶ୍ରେଷ୍ଠ ପ୍ରତିଭା ଓ ମସ୍ତିଷ୍କ ମାନ ନିୟୋଜିତ ଏବଂ ସେମାନେ ନିଜର ଜ୍ଞାନର ଉପଯୋଗ କରି ଧନ ଅର୍ଜନ କରୁଛନ୍ତି। ଅର୍ଥ ଓ ବ୍ୟବସାୟ କ୍ଷେତ୍ରର ଭାରତର ଶ୍ରେଷ୍ଠତାର ପୂର୍ବ ଗୌରବ ଫେରାଇ ଆଣିବାରେ ଗିଫ୍ଟସିଟି ଏକ ମାଧ୍ୟମ ପାଲଟିଛି। ସମୃଦ୍ଧ ଫିନ୍ଟେକ୍ କ୍ଷେତ୍ର କେବଳ ବେପାର ବଣିକକୁ ସୁଗମ କରିବାକୁ ଉଦ୍ଦିଷ୍ଟ ନୁହେଁ, ଏହା ମଧ୍ୟ ବିଭିନ୍ନ କ୍ଷେତ୍ରରେ କାର୍ଯ୍ୟରତ ପେସାଦାରମାନଙ୍କୁ ଉତ୍ତମ ଜୀବନ ଓ ନୂଆ ସୁଯୋଗ ଯୋଗାଇ ଦେବାକୁ ଅଭିପ୍ରେତ।
ପ୍ରଧାନମନ୍ତ୍ରୀ କହିଥିଲେ ଯେ ଯୁଗ ବଦଳିବା ସହିତ ଭାରତ ବଦଳୁଛି ଏବଂ ନୂଆ ଭାରତ ବେପାର ବଣିଜ, ଅର୍ଥ, ଟେକ୍ନୋଲୋଜି କ୍ଷେତ୍ରରେ ସମଗ୍ର ବିଶ୍ୱ ସହିତ ଦ୍ରୁତଗତିରେ ଯୋଡି ହେଉଛି। ବିଶ୍ୱ ବଜାର ସହିତ ସମନ୍ୱିତ ହେବା ଉପରେ ଏବେ ଆମେ ବିଶେଷ ଗୁରୁତ୍ୱ ଦେଉଛୁ ଏବଂ ଏହା ଆମର ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟସୂଚୀ। ଆମେ ମଧ୍ୟ ଏବେ ବିଶ୍ୱବଜାର ଓ ଆନ୍ତର୍ଜାତିକ ଯୋଗାଣ ଶୃଙ୍ଖଳା ସହିତ ଦ୍ରୁତଗତିରେ ଯୋଡି ହେବାରେ ଲାଗିଛୁ। ଭାରତୀୟ ଆନ୍ତର୍ଜାତିକ ସୁବିଧା ସୁଯୋଗ ସହିତ ସଂଯୋଜିତ ହେବାରେ ଗିଫ୍ଟସିଟି ଏକ ଗୁରୁତ୍ୱପୂର୍ଣ୍ଣ ପ୍ରବେଶ ଦ୍ୱାରା ପାଲଟିଛି। ସମଗ୍ର ବିଶ୍ୱ ସହିତ ଆମେ ସଂଯୋଜିତ ହୋଇପାରୁଛୁ।
ସେ କହିଛନ୍ତି ଯେ ଭାରତ ଏବେ ବିଶ୍ୱର ଏକ ଅନ୍ୟତମ ବୃହତ୍ ଅର୍ଥନୀତି। ଆଗକୁ ଆମ ଅର୍ଥନୀତିର ଆକାର ଆହୁରି ବଡ ହେବ। ସେଥି ପାଇଁ ଆମକୁ ଏବେଠାରୁ ପ୍ରସ୍ତୁତ ହେବାକୁ ପଡିବ। ଏଥିପାଇଁ ନୂଆ ଅନୁଷ୍ଠାନ, ପ୍ରତିଷ୍ଠାନ ମାନ ଆମର ଲୋଡା; ଯାହା ଆମର ବର୍ତ୍ତମାନର ଆବଶ୍ୟକତା ପୂରଣ କରିବା ସହିତ ବିଶ୍ୱ ଅର୍ଥନୈତିକ ଚାହିଦାକୁ ପୂରଣ କରିବାରେ ସମର୍ଥ ହୋଇପାରିବ। ଇଣ୍ଡିଆ ଇଣ୍ଟର ନ୍ୟାସନାଲ ବୁଲିୟନ ଏକ୍ସଚେଞ୍ଚ-ଆଇଆଇବିଏକ୍ସ ଏ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।
ଏହି ଅବସରରେ ସେ ଭାରତୀୟ ମହିଳା ଆର୍ଥିକ ସଶକ୍ତିକରଣରେ ସୁନାର ଗୁରୁତ୍ୱ ସମ୍ପର୍କରେ ସୂଚନା ଦେଇଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ଭାରତର ପରିଚୟ କେବଳ ଏକ ବଡ ବଜାରରେ ସୀମିତ ହୋଇ ରହିବା ଅନୁଚିତ। ଏହା ବଜାର ନିର୍ମାଣ ବା ମାର୍କେଟ ନିର୍ମାତା ହେବା ଆବଶ୍ୟକ। ଗୋଟିଏ ପଟରେ ଆମେ ସ୍ଥାନୀୟ କଲ୍ୟାଣ ପାଇଁ ବୈଶ୍ୱିକ ପୁଞ୍ଜି ଆଣୁଥିବାବେଳେ ଅନ୍ୟପକ୍ଷରେ ଆମେ ବିଶ୍ୱ କଲ୍ୟାଣ ପାଇଁ ସ୍ଥାନୀୟ ଉତ୍ପାଦକତାକୁ ବିନିଯୋଗ କରୁଛୁ।
ପ୍ରଧାନମନ୍ତ୍ରୀ ଶ୍ରୀ ମୋଦୀ ଆହୁରି କହିଥିଲେ, ବିଶ୍ୱର ଅର୍ଥନୀତିକ ସଙ୍କଟ ଓ ଯୋଗାଣ ଶୃଙ୍ଖଳା ବିଘ୍ନିତ ହେବା ସମୟରେ ଭାରତ ସାରା ପୃଥିବୀକୁ ଉଚ୍ଚ ମାନର ସାମଗ୍ରୀ ଓ ସେବା ଯୋଗାଇ ଦେବାରେ ସଫଳ ହୋଇଥିଲା। ଏକବିଂଶ ଶତାବ୍ଦୀ ଅର୍ଥ ଓ ଟେକ୍ନୋଲୋଜିର ଯୁଗ। ଏହି ଦୁଇ କ୍ଷେତ୍ର ମଧ୍ୟରେ ଅଧିକ ସମନ୍ୱୟର ଆବଶ୍ୟକତା ରହିଛି। ଟେକ୍ନୋଲୋଜି, ବିଜ୍ଞାନ ଓ ସଫ୍ଟଓୟାର କ୍ଷେତ୍ରରେ ଭାରତର ଉଭୟ ଅଗ୍ରଣୀ ଓ ଅଭିଜ୍ଞ। ତେଣୁ ଏହି ଶକ୍ତି ଓ ସାମର୍ଥ୍ୟର ଶ୍ରେଷ୍ଠ ଉପଯୋଗ ଉପରେ ସେ ଗୁରୁତ୍ୱ ଦେଇଛନ୍ତି।
ପ୍ରଧାନମନ୍ତ୍ରୀ ତାଙ୍କ ଭାଷଣରେ ଆଶାବ୍ୟକ୍ତ କରିଛନ୍ତି ଯେ ଗିଫ୍ଟ – ଆଇଏଫ୍ଏସ୍ସି ଫିନ୍ଟେକ କ୍ଷେତ୍ରରେ ବୈଶ୍ୱିକ ପ୍ରୟୋଗଶାଳାରେ ପରିଣତ ହେବ ଏବଂ ଇନେଭେସନ କ୍ଷେତ୍ରରେ ନୂଆ କୀର୍ତ୍ତିମାନ ସୃଷ୍ଟି କରିବ। ବିଶ୍ୱର ଅର୍ଥ ଓ ବାଣିଜ୍ୟ ବ୍ୟବସ୍ଥାରେ ନୂଆ ମାନ ଓ ନିୟାମକ ସ୍ଥାପନ କରି ଆଇଏଫ୍ଏମ୍ସିଏ ବିଶ୍ୱର ମନ ପସନ୍ଦରେ ଆବ୍ରି୍ରଟେସନ କେନ୍ଦ୍ର ଭାବେ ପ୍ରତିଷ୍ଠା ଲାଭ କରିବ ବୋଲି ପ୍ରଧାନମନ୍ତ୍ରୀ ଆଶା ପୋଷଣ କରିଛନ୍ତି। ସେ କହିଛନ୍ତି ଯେ ଦୁବାଇ ଓ ସିଙ୍ଗାପୁର ଭଳି ଦେଶଠୁ ଏ କ୍ଷେତ୍ରରେ ଭାରତକୁ ଆଗେଇ ନେବାକୁ ଲକ୍ଷ୍ୟ ରଖିବାକୁ ହେବ।
ଦେଶର ଅର୍ଥନୈତିକ ବିକାଶ କ୍ଷେତ୍ରରେ ଘରୋଇ ଉଦ୍ୟୋଗର ଭୂମିକାକୁ ସେ ପ୍ରଶଂସା କରିବା ସହିତ ଏ କ୍ଷେତ୍ରରେ ଅଧିକ ସହଯୋଗ କାମନା କରିଛନ୍ତି।