ବରିଷ୍ଠ ଅଭିନେତା ତଥା ରାଜନେତା କମଲ ହାସନଙ୍କ ଉପରକୁ ଚପଲ ମାଡ଼ ହୋଇଛି। ଗତକାଲି ସଂଧ୍ୟାରେ ତାମିଲନାଡୁର ମଦୁରାଇ ନିକଟସ୍ଥ ତିରୁପରନକୁନ୍ଦ୍ରମ ନିର୍ବାଚନ ମଣ୍ଡଳୀରେ ପ୍ରଚାର କରୁଥିବାବେଳେ ତାଙ୍କ ଉପରକୁ ଚପଲ ମାଡ଼ ହୋଇଥିଲା। ହେଲେ ଚପଲଟି ତାଙ୍କ ଦେହରେ ବାଜି ନଥିବା ଜଣାପଡ଼ିଛି। ଜାତିର ପିତା ମହାତ୍ମା ଗାନ୍ଧିଙ୍କ ହତ୍ୟାକାରୀ ନାଥୁରାମ ଗଡସେ ସ୍ୱାଧୀନ ଭାରତର ‘ପ୍ରଥମ ହିନ୍ଦୁ ଉଗ୍ରବାଦୀ’ ବୋଲି କମଲ ହାସନ ରବିବାର ଦିନ କହିଥିଲେ। ନିର୍ବାଚନ ବେଳେ ଧର୍ମକୁ ନେଇ ତାଙ୍କର ଏହି ମନ୍ତବ୍ୟକୁ ଅନେକ ବିରୋଧ କରିଥିଲେ। ଏହାପରେ ସେ ଚପଲ ଆକ୍ରମଣର ଶିକାର ହୋଇଛନ୍ତି। ବିଜେପି ଓ ହନୁମାନ ସେନାର କର୍ମୀମାନେ କମଲ ହାସନଙ୍କ ଉପରକୁ ଚପଲ ଫିଙ୍ଗି ଥିବା ସ୍ଥାନୀୟ ଥାନାରେ ଅଭିଯୋଗ ହୋଇଛି। ମୋଟ ୧୧ ଜଣଙ୍କ ନାଁରେ ଅଭିଯୋଗ ହୋଇଛି। କମଲଙ୍କ ଏହି ମନ୍ତବ୍ୟକୁ ନେଇ ପରବର୍ତ୍ତୀ ସମୟରେ ଦେଶର ରାଜନୈତିକ ମହଲ ବେଶ୍ ସରଗରମ ହୋଇ ଉଠିଥିଲା। କମଲ ହାସନଙ୍କ ଏପରି ମନ୍ତବ୍ୟକୁ ତାମିଲନାଡୁ ବିଜେପି ସଭାପତି ଓ ଶାସକ ଦଳ ଏଆଇଡିଏମକେ ବିରୋଧ କରିଥିବା ବେଳେ ଡିଏମକେ, କଂଗ୍ରେସ ଆଦି ସମର୍ଥନ କରିଛନ୍ତି। ଧର୍ମ ଆଧାରରେ କମଲ ହାସନ ଏପରି ମନ୍ତବ୍ୟ ଦେବା ପରେ ତାଙ୍କ ବିରୋଧରେ ତାମିଲନାଡୁ ପୁଲିସ୍ ମାମଲା ରୁଜୁ କରିଛି। ସେହିଭଳି ଏନେଇ ବିଜେପି ନିର୍ବାଚନ କମିଶନଙ୍କ ଦ୍ୱାରସ୍ଥ ହୋଇଛି।
Slippers Thrown At Kamal Haasan Amid Controversy Over Godse Remark