ଦେଶରେ ସପ୍ତଦଶ ଲୋକସଭାର ନିର୍ବାଚନ ସରିଯାଇଛି। ଏବେ ମେ ୨୩କୁ ଅପେକ୍ଷା। ସରକାର ଗଢିବା ନେଇ ଏବେ ଚାଲିଛି କଳ୍ପନାଜଳ୍ପନା। ଯଦିଓ ଏକ୍ଜିଟ୍ ପୋଲ୍ ଏନ୍ଡିଏକୁ ବହୁମତ ଦେଇ ପୁନଃସରକାର ଗଠନ କରିବା ନେଇ ମତ ଦେଇଛି, ତେବେ ଅସଲ କଥା ତ ମେ ୨୩ରେ ଜଣାପଡିବ। ତେବେ ଏହି ଭିତରେ ଉତ୍ତରପ୍ରଦେଶରେ ବିଜେପିର ସହଯୋଗୀ ଦଳ ସୁହେଲ୍ଦେବ ଭାରତୀୟ ସମାଜ ପାର୍ଟିର ପ୍ରମୁଖ ଓମ୍ପ୍ରକାଶ ରାଜଭର୍ଙ୍କୁ ୟୁପି କ୍ୟାବିନେଟ୍ରୁ ବହିଷ୍କାର କରିବା ପାଇଁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରାଜ୍ୟପାଳଙ୍କୁ ସୁପାରିଶ୍ କରିଛନ୍ତି। ଉତ୍ତରପ୍ରଦେଶରେ ବିଜେପିର ସହଯୋଗୀ ଦଳ ଭାବେ ସୁଭାସପା ୨୦୧୭ ବିଧାନସଭା ନିର୍ବାଚନରେ ୪ଟି ଆସନ ଜିତିଥିଲେ। କିନ୍ତୁ ଲୋକସଭା ନିର୍ବାଚନରେ ରାଜଭରଙ୍କ ଦଳ ବିଜେପି ସହିତ ମିଶିକରି ନିର୍ବାଚନ ଲଢିନଥିଲେ। ଚଳିତ ଥର ରାଜଭରଙ୍କ ଦଳ ୩୯ ପ୍ରାର୍ଥୀଙ୍କୁ ନିର୍ବାଚନ ଲଢିଥିଲେ। ଏବଂ କିଛି ଆସନ ପାଇଁ ବିଜେପି ପ୍ରାର୍ଥୀଙ୍କ ବିରୋଧରେ ମଧ୍ୟ ପ୍ରଚାର କରିଥିଲେ। ତେବେ, ରାଜଭରଙ୍କ ପୁତ୍ର ତଥା ସୁଭାସପାର ମହାସଚିବ ଅରୁଣ ରାଜଭର ସ୍ପଷ୍ଟ କରି କହିଛନ୍ତି ଯେ, ବିଜେପି ସହିତ ବିଧାନସଭା ନିର୍ବାଚନ ପାଇଁ ମେଣ୍ଟ ରହିଥିଲା, କିନ୍ତୁ ଲୋକସଭା ନିର୍ବାଚନ ପାଇଁ ନୁହେଁ। ଚଳିତ ଲୋକସଭା ନିର୍ବାଚନ ପୂର୍ବରୁ ବିଜେପି ବିରୋଧରେ ଲଗାତାର ଭାବେ ରାଜଭର ଆକ୍ରମଣ କରିବା ସହିତ ସିଧାସଳଖ ଯୋଗୀଙ୍କୁ ଟାର୍ଗେଟ୍ କରିଥିଲେ। ନିକଟରେ ରାଜଭର ପୂର୍ବାଞ୍ଚଳରେ ୩୦ଟି ଆସନରୁ ବିଜେପି କେବଳ ତିନୋଟି ଆସନ ପାଇବ ବୋଲି କହିଥିଲେ।ରାଜଭର ନିର୍ବାଚନୀ ପ୍ରଚାର ସଭାରେ ଭବିଷ୍ୟତରେ କେନ୍ଦ୍ର ଏବଂ ଉତ୍ତରପ୍ରଦେଶରେ ସପା – ବସପାର ସହଯୋଗ ଦ୍ବାରା କୌଣସି ଦଳ ସରକାର ଗଢିବେ ବୋଲି ଦାବା କରିଥିଲେ । ରାଜଭର୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ କଟାକ୍ଷ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମିଛ କହୁଛନ୍ତି, ନିଜକୁ ପଛୁଆ ବୋଲି କହୁଛନ୍ତି, ପୂର୍ବରୁ ନିଜକୁ ଉଚ୍ଚ ବର୍ଗ କହିଥିଲେ।
UP Governor sacks Rajbhar on Yogi's recommendation