![](https://thesamikhsya.com/odia/wp-content/uploads/2022/09/delet-364.jpg)
ଭୁବନେଶ୍ବର: ଦିବ୍ୟାଙ୍ଗମାନଙ୍କର ସମାବେଶୀ ପୁନର୍ବାସ କ୍ଷେତ୍ରରେ ଏସଭିନିର୍ତାର ଉଲ୍ଲେଖନୀୟ କାର୍ଯ୍ୟ କରୁଛି ବୋଲି କେନ୍ଦ୍ର ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରୀ ଡକ୍ଟର ବୀରେନ୍ଦ୍ର କୁମାର କହିଛନ୍ତି।
ଶୁକ୍ରବାର କଟକ ଜିଲ୍ଲା ଓଲଟପୁର ଠାରେ ଥିବା ସ୍ବାମୀ ବିବେକାନନ୍ଦ ଜାତୀୟ ପୁନର୍ବାସ, ପ୍ରଶିକ୍ଷଣ ଏବଂ ଗବେଷଣା ସଂସ୍ଥାନ (ଏସଭିନିର୍ତାର) ଠାରେ ଏକ ୧୦୦ ଶଯ୍ୟା ବିଶିଷ୍ଟ ପୁନର୍ବାସ ଉପଭବନ, ଥେରାପି ପାର୍କ ଉଦଘାଟନ କରାଯିବା ସହିତ ସ୍ବାମୀ ବିବେକାନନ୍ଦଙ୍କ ପ୍ରତିମୂର୍ତ୍ତି ଉନ୍ମୋଚନ କରାଯାଇଥିଲା। ଏହି ଅବସରରେ କେନ୍ଦ୍ର ମନ୍ତ୍ରୀ ଡକ୍ଟର କୁମାର ଗଣମାଧ୍ୟମକୁ ସମ୍ବୋଧିତ କରି କହିଥିଲେ ଯେ, ଏସଭିନିର୍ତାର ଠାରେ ୧୦୦ ଶଯ୍ୟା ବିଶିଷ୍ଟ ଉପଭବନ ବା ଚିକିତ୍ସାଳୟ ଉଦଘାଟନ ହେବା ଦ୍ବାରା ଦିବ୍ୟାଙ୍ଗମାନଙ୍କୁ ବିଭିନ୍ନ ପ୍ରକାରର ପୁନର୍ବାସ ସେବା ଯୋଗାଇ ଦେବା ଲାଗି ଏହି ପ୍ରତିଷ୍ଠାନର କ୍ଷମତା ବୃଦ୍ଧି ପାଇବ।
ଦିବ୍ୟାଙ୍ଗମାନଙ୍କର ଚିକିତ୍ସା, ପ୍ରଶିକ୍ଷଣ ଏବଂ ପୁନର୍ବାସ କ୍ଷେତ୍ରରେ ଏହି ପ୍ରତିଷ୍ଠାନ କେବଳ ଓଡ଼ିଶା ଲୋକମାନଙ୍କୁ ନୁହେଁ ବରଂ ସାରା ଦେଶର ଲୋକମାନଙ୍କୁ ସେବା ଯୋଗାଇ ଦେଉଛି। ଏଠାରେ ଦିଆଯାଉଥିବା ଡିପ୍ଲୋମା, ସ୍ନାତକ, ସ୍ନାତକୋତ୍ତର କାର୍ଯ୍ୟକ୍ରମ ଉନ୍ନତମାନର ମାନବସମ୍ବଳ ସୃଷ୍ଟି କରୁଛି ବୋଲି ଡକ୍ଟର କୁମାର କହିଥିଲେ।
ସେ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କ୍ଷମତାକୁ ଆସିବା ପରେ ଦିବ୍ୟାଙ୍ଗଜନଙ୍କ କଲ୍ୟାଣ ପାଇଁ ଅନେକ ପଦକ୍ଷେପ ଗ୍ରହଣ କରିଛନ୍ତି। ଦିବ୍ୟାଙ୍ଗ ଜନ ଅଧିକାର ଆଇନ, ୨୦୧୬ ଅଧୀନରେ, ସରକାର ଦିବ୍ୟାଙ୍ଗମାନଙ୍କ ପାଇଁ ସରକାରୀ ଚାକିରି କ୍ଷେତ୍ରରେ ସଂରକ୍ଷଣକୁ ୩ରୁ ୪ ପ୍ରତିଶତ ଏବଂ ଶିକ୍ଷା କ୍ଷେତ୍ରରେ ସଂରକ୍ଷଣକୁ ୩ରୁ ୫ ପ୍ରତିଶତକୁ ବୃଦ୍ଧି କରିଥିବା କେନ୍ଦ୍ର ମନ୍ତ୍ରୀ କହିଥିଲେ।
ଡକ୍ଟର କୁମାର ଆହୁରି କହିଥିଲେ ଯେ, ସରକାର ଦିବ୍ୟାଙ୍ଗ ଜନମାନଙ୍କୁ ଆର୍ଥିକ ସହାୟତା ଯୋଗାଇ ଦେବା ସହିତ କୌଶଳ ପ୍ରଶିକ୍ଷଣ ଦେବା ପାଇଁ ଏକାଧିକ ପଦକ୍ଷେପ ଗ୍ରହଣ କରୁଛନ୍ତି। ଓଡ଼ିଶା ମାଟି ଅନେକ ପ୍ରକାରର ହସ୍ତତନ୍ତ ଏବଂ ହସ୍ତଶିଳ୍ପରେ ସମୃଦ୍ଧ। ଏଭଳି କଳା ଓ ଶିଳ୍ପ ପ୍ରଶିକ୍ଷଣ ପ୍ରଦାନ କରି ଦିବ୍ୟାଙ୍ଗମାନଙ୍କୁ ରୋଜଗାର ଦିଆଯାଇ ପାରିବ ବୋଲି କେନ୍ଦ୍ର ମନ୍ତ୍ରୀ କହିଥିଲେ। ସେ କହିଥିଲେ ଯେ ଦିବ୍ୟାଙ୍ଗମାନେ ଆତ୍ମନିର୍ଭର ହୋଇପାରିଲେ ତାଙ୍କ ପରିବାର ମଧ୍ୟ ଆତ୍ମନିର୍ଭର ହୋଇଥାନ୍ତି ଏବଂ ଏପରି ଭାବେ ସମଗ୍ର ସମାଜ ଆତ୍ମନିର୍ଭରଶୀଳ ହୋଇଥାଏ।
ଅନ୍ୟପଟେ ଆଜି ସାଂସଦ ଜଗତ ପ୍ରକାଶ ନଡ୍ଡା ୧୦୦ ଶଯ୍ୟା ବିଶିଷ୍ଟ ପୁନର୍ବାସ ଉପଭବନ ଏବଂ ଥେରାପି ପାର୍କକୁ ଉଦଘାଟନ କରିଥିଲେ। ଏସଭି ନିର୍ତାର ପରିସରରେ ସ୍ବାମୀ ବିବେକାନନ୍ଦଙ୍କର ଏକ ପ୍ରତିମୂର୍ତ୍ତି ଅନାବରଣ କରାଯାଇଥିଲା। ଏହି ଅବସରରେ କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରୀ ଡକ୍ଟର ବୀରେନ୍ଦ୍ର କୁମାର ଉପସ୍ଥିତ ଥିଲେ। ମୁଖ୍ୟ ଅତିଥି ଜଗତ ପ୍ରକାଶ ନଡ୍ଡା କହିଥିଲେ ଯେ, ଗତ ଆଠ ବର୍ଷ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ବରେ ଦେଶର ସ୍ବାସ୍ଥ୍ୟ, ଶିକ୍ଷା ଏବଂ ସାମାଜିକ କ୍ଷେତ୍ରରେ ଅନେକ ପ୍ରଗତି ହାସଲ କରାଯାଇ ପାରିଛି। ସେ କହିଥିଲେ ଯେ ଓଡ଼ିଶାରେ ଗତ ଆଠ ବର୍ଷ ମଧ୍ୟରେ ୬ଟି ମେଡ଼ିକାଲ କଲେଜ ପ୍ରତିଷ୍ଠା କରାଯାଇଛି ଏବଂ ଯାଜପୁର ଓ କଳାହାଣ୍ଡିରେ ଖୁବଶୀଘ୍ର ଆଉ ଦୁଇଟି ମେଡ଼ିକାଲ କଲେଜ ନିର୍ମାଣ ହେବ।
ଭାରତ କିଭଳି କୋଭିଡ ମହାମାରୀ ମୁକାବିଲା କରିଥିଲା ସେ ସମ୍ପର୍କରେ ମତବ୍ୟକ୍ତ କରି ଶ୍ରୀ ନଡ୍ଡା କହିଥିଲେ ଯେ, ସାରା ବିଶ୍ବ ଶତାବ୍ଦୀର ସବୁଠୁ ବଡ଼ ମହାମାରୀର ସମ୍ମୁଖିନ ହୋଇଥିଲା। ଭାରତ ଦୃଢ଼ ପଦକ୍ଷେପ ଗ୍ରହଣ କରିବା ସହିତ ମାତ୍ର ୯ ମାସ ମଧ୍ୟରେ ଦୁଇଟି ସ୍ବଦେଶୀ ଟିକା ବିକଶିତ କରିଥିଲା। ଭାରତ ଆତ୍ମନିର୍ଭରଶୀଳ ହୋଇସାରିଥିବା ସାରା ବିଶ୍ବକୁ ଦେଖାଇ ଦେଇଥିଲା।
ସମାରୋହକୁ ସମ୍ବୋଧିତ କରି ଡକ୍ଟର ବୀରେନ୍ଦ୍ର କୁମାର କହିଥିଲେ ଯେ ସରକାର ଏସଭିନିର୍ତାର ପରିସରରେ ଏକ କୌଶଳ ବିକାଶ କେନ୍ଦ୍ର ବିକଶିତ କରୁଛନ୍ତି। ଆସନ୍ତା କିଛି ମାସ ମଧ୍ୟରେ ଏହି କୌଶଳ କେନ୍ଦ୍ର ପ୍ରସ୍ତୁତ ହୋଇଯିବ ଏବଂ ଏହା ଦିବ୍ୟାଙ୍ଗମାନଙ୍କୁ ବିଶେଷ ସହାୟକ ହେବ ବୋଲି ସେ କହିଥିଲେ।
କେନ୍ଦ୍ର ମନ୍ତ୍ରୀ ଧର୍ମନ୍ଦ୍ରେ ପ୍ରଧାନ ଏହି ଅବସରରେ ଉଦବୋଧନ ଦେଇ କହିଥିଲେ ଯେ ଏସଭିନିର୍ତାକୁ ଏକ ଅନ୍ତର୍ଜାତୀୟ ସ୍ତରର ସଂସ୍ଥାନ ଭାବେ ବିକଶିତ କରିବା ଉପରେ ଗୁରୁତ୍ବ ଦିଆଯିବାର ଆବଶ୍ୟକତା ରହିଛି। ଏସଭିନିର୍ତାରକୁ ଏକକ ବିଶ୍ବବିଦ୍ୟାଳୟ ମାନ୍ୟତା ଦେବା ଲାଗି ସାମାଜିକ ନ୍ୟାୟ ମନ୍ତ୍ରଣାଳୟ ଏକ ଯୋଜନା ପ୍ରସ୍ତୁତ କରିବା ଉଚିତ୍ ବୋଲି ଶ୍ରୀ ପ୍ରଧାନ ପରାମର୍ଶ ଦେଇଥିଲେ। ଏଥିସହିତ ଏ ଦିଗରେ ଶିକ୍ଷା ମନ୍ତ୍ରଣାଳୟ ପକ୍ଷରୁ ସମସ୍ତ ଆବଶ୍ୟକ ସହାୟତା ଯୋଗାଇ ଦିଆଯିବ ବୋଲି ସେ ଆଶ୍ବାସନା ଦେଇଥିଲେ।
ଶ୍ରୀ ପ୍ରଧାନ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାର ଦିବ୍ୟାଙ୍ଗମାନଙ୍କୁ ଉପଯୁକ୍ତ ସମ୍ମାନ ଦେଇଛନ୍ତି। ସେମାନଙ୍କୁ ମୁଖ୍ୟଧାରାକୁ ଅଣାଯାଇ ପାରିଛି। ଶିକ୍ଷା ବ୍ୟବସ୍ଥାରେ ନୂଆ ଧରଣର ପରିବର୍ତ୍ତନ ଆସିଛି। ଦିବ୍ୟାଙ୍ଗମାନଙ୍କ ଅଧିକାର ସୁନିଶ୍ଚିତ କରିବା ଲାଗି ପଦକ୍ଷେପ ନିଆଯାଉଛି।
ଶେଷରେ ଅତିଥିମାନେ ଦିବ୍ୟାଙ୍ଗ ହିତାଧିକାରୀମାନଙ୍କୁ ସହାୟତା ଉପକରଣ ବିତରଣ କରିଥିଲେ। ବରଗଡ଼ର ଜଣେ ହିତାଧିକାରୀ ସତ୍ୟନାରାୟଣ ପୋଢ଼ଙ୍କୁ ଏସଭିନିର୍ତାର ଦ୍ବାରା ବିକଶିତ କୃତ୍ରିମ ହାତ ଦିଆଯାଇଥିଲା। ଏହି ଅବସରରେ ସେ କହିଥିଲେ ଯେ, ଏସଭିନିର୍ତାର ପାଇଁ ଆଜି ସେ ଏକ ନୂଆ ଜୀବନ ପାଇଛନ୍ତି। ଏକ ସଡ଼କ ଦୁର୍ଘଟଣାରେ ସେ ତାଙ୍କର ହାତ ହରାଇଥିଲେ।