ନୂଆଦିଲ୍ଲୀ: ପୂର୍ବ ଲଦାଖରେ ଚୀନ୍ ସହିତ ବିବାଦ ମଧ୍ୟରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଆଜି ଏକ ବଡ ବୟାନ ଦେଇଛନ୍ତି। ସେ କହିଛନ୍ତି ଯେ, ଭାରତ କୌଣସି ଦେଶକୁ ଆଘାତ କରିବାକୁ ଚେଷ୍ଟା କରି ନାହିଁ, କିନ୍ତୁ ଯଦି କେହି ଭାରତ ଉପରେ ଖରାପ ନଜର ପକାଏ, ତେବେ ସେମାନଙ୍କୁ ଉପଯୁକ୍ତ ଜବାବ ଦିଆଯିବ। ଏକ ଭର୍ଚୁଆଲ୍ ଇଭେଣ୍ଟରେ ରାଜନାଥ ସିଂ କହିଛନ୍ତି ଯେ, ସୀମା ଉପରେ ତୀକ୍ଷ୍ଣ ନଜର ରଖାଯାଉଛି ଏବଂ ଦେଶ ସମସ୍ତ ଆହ୍ଵାନର ମୁକାବିଲା ପାଇଁ ପ୍ରସ୍ତୁତ ଅଛି।
ସେ ଆହୁରି ମଧ୍ୟ କହିଛନ୍ତି ଯେ ସଶସ୍ତ୍ର ବାହିନୀକୁ ସ୍ୱଦେଶୀ ଅତ୍ୟାଧୁନିକ ଅସ୍ତ୍ରଶସ୍ତ୍ର ସହିତ ସଶକ୍ତ କରିବା ଦ୍ୱାରା ସୁରକ୍ଷା ବ୍ୟବସ୍ଥାକୁ ମଜବୁତ କରିବା ହେଉଛି ସରକାରଙ୍କ ପ୍ରାଥମିକତା।
ରାଜନାଥ ସିଂ କହିଛନ୍ତି ଯେ କ୍ଷେତ୍ର, ଧର୍ମ, ଜାତି ଏବଂ ଭାଷାର ପ୍ରତିବନ୍ଧକରୁ ଉପରକୁ ଉଠି ସଶସ୍ତ୍ର ବାହିନୀର ସୈନିକମାନେ ନିଃସ୍ୱାର୍ଥପର ଭାବରେ ଦେଶ ସେବା କରନ୍ତି। ଭାରତର ଏହି ସାହସୀ ସୈନିକମାନେ ଦେଶକୁ ଅନେକ ପ୍ରକାରର ବିପଦରୁ ରକ୍ଷା କରନ୍ତି। ଏଭଳି ପରିସ୍ଥିତିରେ ଆମର ସ୍ୱାଧୀନତା ସଂଗ୍ରାମୀ ଏବଂ ସୈନିକମାନଙ୍କ ଆଦର୍ଶର ସଂକଳ୍ପ ଆଣିବା ଏବଂ ଦେଶର ଏକତା, ଅଖଣ୍ଡତା ଏବଂ ସାର୍ବଭୌମତ୍ଵ ରକ୍ଷା କରିବା ପ୍ରତ୍ୟେକ ନାଗରିକଙ୍କ କର୍ତ୍ତବ୍ୟ।
